గ్రంథాలయాల అభివృద్ధికి కృషి

ఆదిలాబాద్‌: జిల్లాలో గ్రంథాలయాల అభివృద్ధికి అన్ని విధాలుగా కృషి చేస్తామని జిల్లా గ్రంథాల య సంస్థ చైర్మన్‌ మల్లెపూల నర్సయ్య అన్నారు. గ్రంథాలయ వారోత్సవాల ప్రారంభం సందర్భంగా జిల్లా కేంద్ర గ్రంథాలయంలో శుక్రవారం నిర్వహించిన కార్యక్రమంలో ఆయన మాట్లాడారు. క్షేత్రస్థాయిలో ఉన్న సమస్యలను పరిష్కరిస్తామని అన్నారు. మోడల్‌ లైబ్రెరీలను నిర్మించి అందుబాటులోకి తీసుకువస్తామని తెలిపారు. తలమడుగు, బజార్‌హత్నూర్‌ మండల కేంద్రాల్లో నూతన భవనాలు నిర్మించేందుకు ప్రతిపాదనలు సిద్ధం చేశామని పేర్కొన్నారు. అదనపు కలెక్టర్‌ రాజేశ్వర్‌ మాట్లాడుతూ, గ్రంథాలయాలు ఆధునిక జీవన విద్యాలయాలుగా అభివర్ణించారు. మనిషి సమగ్ర అభివృద్ధికి ఎంతగానో తోడ్పాటు అందిస్తాయన్నారు. తాను సైతం గ్రంథాలయంలో పుస్తకాలతో కుస్తీ పట్టానన్నారు. కార్యక్రమంలో లైబ్రేరియన్‌ శ్రీనివాస్‌, మాజీ కౌన్సిలర్‌ అశోక్‌, గ్రంథాలయ సంస్థ మా జీ సభ్యులు బాబన్న తదితరులు పాల్గొన్నారు.