‘స్థానిక’ంపై ఉత్కంఠ

కైలాస్‌నగర్‌: స్థానిక సంస్థల ఎన్నికలపై ప్రభుత్వం తీసుకోనున్న నిర్ణయంపై సర్వత్రా ఉత్కంఠగా ఎదురుచూస్తున్నారు. ఇప్పటివరకు నెలకొన్న సందిగ్ధతకు ఇకనైనా తెరపడుతుందా? లేక అలాగే కొనసాగుతుందా? అనేది రెండు, మూడు రోజుల్లో తేలనుంది. రాష్ట్ర ప్రభుత్వం బీసీలకు 42శాతం రిజర్వేషన్లతో ఎన్నికల నిర్వహణకు సిద్ధపడగా అందుకు హైకోర్టు అభ్యంతరం తెలిపిన సంగతి తెలిసిందే. దీంతో ఈ ప్రక్రియకు ముందడుగు పడలేదు. కోర్టు నిర్ణయానికి అనుగుణంగానే ఎన్నికలకు వెళ్తామని ప్రభుత్వం స్పష్టం చేసింది. ఈ నేపథ్యంలో ఈనెల 17నాటి రాష్ట్ర కేబినెట్‌లో మంత్రివర్గం తీసుకునే నిర్ణయం.. 24న హైకోర్టు వెలువరించే తీర్పు కోసం ప్రజలంతా ఆసక్తిగా ఎదురుచూస్తున్నారు.

నిలిచిన నిధుల విడుదల

పంచాయతీలు, మున్సిపాలిటీకి పాలకవర్గాలు లేక కేంద్ర, రాష్ట్ర ప్రభుత్వాల నుంచి రావాల్సిన నిధుల విడుదల నిలిచిపోయింది. దీంతో ఎన్నికలు త్వరగా నిర్వహించాలనే అభిప్రాయం అంతటా వినిపిస్తోంది. గ్రామపంచాయతీల పాలకవర్గాల గడువు ము గిసి దాదాపు ఏడాదిన్నరైంది. అలాగే, మండల, జి ల్లా పరిషత్‌ పాలకవర్గాలు, ఆదిలాబాద్‌ మున్సి పల్‌ కౌన్సిల్‌ గడువు ముగిసి ఏడాది దాటింది. ప్రస్తుతం వీటన్నింట్లో ప్రత్యేకాధికారుల పాలన సాగుతోంది. పాలకవర్గాలు లేకపోవడంతో కేంద్ర, రాష్ట్ర ప్రభుత్వాల నుంచి రావాల్సిన 15వ ఆర్థిక సంఘం (ఎఫ్‌ ఎఫ్‌సీ), రాష్ట్ర ఆర్థిక సంఘం (ఎస్‌ఎఫ్‌సీ) నిధుల విడుదల పూర్తిగా నిలిచింది. దీంతో స్థానిక వనరులపైనే ఆధారపడాల్సి వస్తోంది. సరిపడా నిధులు లేక అభివృద్ధి పూర్తిగా నిలిచింది. కొన్ని పంచాయతీల్లో ట్రాక్టర్‌ డీజిల్‌, కిస్తీలు, విద్యుత్‌ బిల్లులు చెల్లించలేని దుస్థితి ఉంది. పారిశుధ్యం, తాగునీటి పనులకు పంచాయతీ సెక్రటరీలు అప్పులు చేయాల్సి వస్తోంది. దీంతో ‘స్థానిక’ ఎన్నికలు నిర్వహించాల నే డిమాండ్‌ ప్రజల్లో బలంగా ఉంది. రాజకీయ పార్టీలన్నీ ఇదే అభిప్రాయాన్ని వ్యక్తం చేస్తున్నాయి.

జనవరిలో నగారా మోగేనా?

జూబ్లీహిల్స్‌ నియోజకవర్గ ఉప ఎన్నికల ఫలితం శుర కవారం వెల్లడి కానుంది. సర్వేలన్నీ సూచించినట్లు కాంగ్రెస్‌ గెలుపొందితే ఇదే ఉత్సాహంతో రాష్ట్ర ప్రభుత్వం స్థానిక సంస్థల ఎన్నికలకు వెళ్లే అవకాశముంది. ఈ నేపథ్యంలో ఈనెల 17న రాష్ట్ర కేబినెట్‌ సమావేశం జరగనుంది. స్థానిక సంస్థల ఎన్నికల నిర్వహణపై కేబినెట్‌లో నిర్ణయం తీసుకునే అవకాశముంది. ఇందులో బీసీ రిజర్వేషన్ల అమలు, ఎన్నిక ల నిర్వహణకు తీసుకునే నిర్ణయాలను నివేదిక రూపంలో ఈ నెల 24న రాష్ట్ర హైకోర్టుకు ప్రభుత్వం అందించాల్సి ఉంది. సీఎం రేవంత్‌రెడ్డి ప్రకటించినట్లు పార్టీపరంగా బీసీలకు రిజర్వేషన్లు కల్పించి ఎన్నికలకు వెళ్తారా? లేదా.. 42 శాతం రిజర్వేషన్లకు చట్టబద్ధత లభించాకే ఎన్నికలు నిర్వహించేలా నిర్ణయం తీసుకుంటారా? అనే సందిగ్ధతకు తెరపడే అవకాశముంది. కాగా, ఎన్నికల సంఘం ‘స్థానిక’ పోరుకు అవసరమైన పూర్తి కసరత్తు చేసిన నేపథ్యంలో ఈసారి ప్రభుత్వం ఎన్నికలపై స్పష్టమైన నిర్ణయాన్ని ప్రకటిస్తుందనే అభిప్రాయం అందరిలో వ్యక్తమవుతోంది. డిసెంబర్‌ రెండో వారం.. లేదంటే జనవరి మొదటి వారంలో పరిషత్‌ లేదా పంచాయ తీ ఎన్నికలకు నగారా మోగనున్నట్లు తెలుస్తోంది. 50శాతం రిజర్వేషన్లు దాటకుండానే కోర్టు నిర్ణయానికి అనుగుణంగా ప్రభుత్వం ఎన్నికలకు వెళ్లే అవకాశమున్నట్లు వివిధ రాజకీయ పార్టీల నాయకులంతా అభిప్రాయపడుతున్నారు.

జిల్లాలోని స్థానిక సంస్థల వివరాలు

గ్రామపంచాయతీలు 473

వార్డు స్థానాలు 3,870

జెడ్పీటీసీ స్థానాలు 20

ఎంపీటీసీ స్థానాలు 166

మున్సిపల్‌ పరిధిలోని వార్డులు 49