గడువులోపు పనులు పూర్తి చేయాలి

కై లాస్‌నగర్‌: ప్రభుత్వ పాఠశాలల్లో చేపట్టిన అభివృద్ధి పనులు గడువులోపు పూర్తి చేయాలని కలెక్టర్‌ రాజర్షి షా అధికారులను ఆదేశించారు. జిల్లా పరిషత్‌ సమావేశ మందిరంలో బజార్‌హత్నూర్‌, ఇంద్రవెల్లి, తలమడుగు, తాంసి, ఉట్నూర్‌ మండలాల ఎంపీడీవోలు, ఎంఈవోలు, హెచ్‌ఎంలు , ఇంజినీరింగ్‌ శాఖల అధికారులతో బుధవారం సమీక్ష నిర్వహించారు. మండలాల వారీగా పనుల ప్రగతిపై ఆరా తీశారు. ఈ సందర్భంగా ఆయన మాట్లాడుతూ, నిధులు ఇప్పటికే విడుదలైనందున పనులు నాణ్యతతో పాటు వేగవంతం చేయాలన్నారు. యూడైస్‌ పోర్టల్‌లో పనుల పురోగతిని ఎప్పటికప్పుడు అప్‌డేట్‌ చేయాలన్నారు. సమావేశంలో ఐటీడీఏ పీవో యువరాజ్‌ మర్మాట్‌, అదనపు కలెక్టర్‌, జిల్లా విద్యాధికారి ఎస్‌.రాజేశ్వర్‌, క్లస్టర్‌ రిసోర్స్‌ పర్సన్లు, కోఆర్డినేటర్లు తదితరులు పాల్గొన్నారు.

కౌలు రైతులు పంట వివరాలు నమోదు చేసుకోవాలి

జిల్లాలో కౌలు రైతులు తక్షణమే పంట వివరాలు నమోదు చేసుకోవాలని కలెక్టర్‌ రాజర్షి షా ప్రకటనలో సూచించారు. పత్తి సాగు చేసిన వారు సంబంధిత వ్యవసాయ విస్తరణ అధికారుల వద్ద కౌలు వివరాలు నమోదు చేయించుకోవాలని పేర్కొన్నారు. ఇందుకోసం రైతులు కౌలు చీటీ, స్వీయ వివరాలు, పట్టాదారు వివరాలు సమర్పించాలని తెలిపారు. నమోదు సమయంలో పట్టాదారు మొబైల్‌ నంబర్‌కు ఓటీపీ వస్తుందని, ఆ నంబర్‌ను ఏఈవోకు తెలుపాలని పేర్కొన్నారు. కౌలు ఒప్పంద పత్రం సమర్పించిన తర్వాత పంట నమోదు ప్రక్రియ పూర్తి అవుతుందని తెలిపారు. నమోదైన రైతుల వివరాలు కపాస్‌ కిసాన్‌ యాప్‌తో అనుసంధానమవుతాయని పేర్కొన్నారు. ఆ యాప్‌ ద్వారా రైతులు స్లాట్‌ బుకింగ్‌ చేసుకుని సీసీఐ కేంద్రాల్లో పత్తిని కనీస మద్దతు ధరకు విక్రయించుకోవచ్చని తెలిపారు. అలాగే డిజిటల్‌ సంతకం లేని భూములు, పీపీ ల్యాండ్‌, పార్ట్‌–3 భూములు కలిగిన రైతులు తాము సాగు చేసిన మొక్కజొన్న, సోయా, పత్తి పంటలను ప్రభుత్వ కొనుగోలు కేంద్రాల్లో అమ్మాలంటే పంట వివరాలను వ్యవసాయ విస్తరణ అధికారుల వద్ద తప్పనిసరిగా నమోదు చేసుకోవాలని సూచించారు.