మాదకద్రవ్యాల రవాణాను అరికట్టాలి

పార్వతీపురం: జిల్లాలో మాదకద్రవ్యాలు, మత్తు పదార్థాల రవాణాను పూర్తిగా అరికట్టాలని కలెక్టర్‌ డాక్టర్‌ ఎన్‌.ప్రభాకరరెడ్డి అధికారులను ఆదేశించారు. మాదకద్రవ్యాల నియంత్రణ కమిటీ జిల్లా స్థాయి సమావేశం, జిల్లా స్థాయి రహదారి భద్రత కమిటీ సమావేశం కలెక్టర్‌, ఎస్పీ మాధవరెడ్డి అధ్యక్షతన శనివారం స్థానిక కలెక్టరేట్‌లో నిర్వహించారు. ఈ సందర్భంగా కలెక్టర్‌ ప్రభాకరరెడ్డి మాట్లాడుతూ.. గ్రామస్థాయిలో డ్రగ్స్‌, గంజాయి నివారణపై విస్తృతంగా ప్రచారం చేపట్టాలన్నారు. ఇందుకోసం ప్రతి పది ఇళ్లకు ఒక వలంటీర్‌ను ఏర్పాటు చేసుకుని గ్రామాల్లో అవగాహన కల్పించాలన్నారు. ఫొటోల కోసం కాకుండా నివారణే అంతిమ లక్ష్యంగా భావించి అధికారులు పని చేయాలన్నారు. రవాణా, అటవీ, ఆర్టీసీ, ఎకై ్సజ్‌, తదితర శాఖల ద్వారా నిర్వహిస్తున్న ర్యాలీలు, చైతన్య కార్యక్రమాల వివరాలను ఎప్పటికప్పుడు తెలియజేయాలన్నారు. ఎస్పీ మాధవరెడ్డి మాట్లాడుతూ.. రహదారి ప్రమాదాల నివారణకు ప్రతి ఒక్కరూ సహకరించాలని సూచించారు. ప్రమాదాల నివారణకు అవగాహన సదస్సులు నిర్వహిస్తున్నట్లు చెప్పారు. సమావేశంలో సబ్‌ కలెక్టర్‌ ఆర్‌.వైశాలి, డీఎస్పీ ఎం.రాంబాబు, ఎస్టీసీ పి.ధర్మచంద్రారెడ్డి, డీఆర్‌డీఏ పీడీ ఎం.సుధారాణి, పశుసంవర్థక శాఖాధికారి ఎస్‌.మన్మధరావు, డీఎంహెచ్‌ఓ ఎస్‌.భాస్కరరావు, సీపీఓ ఎస్‌ఎస్‌ఆర్‌ పట్నాయక్‌, డీటీఓ దుర్గాప్రసాద్‌, డీపీటీఓ వెంకటేశ్వరరావు తదితరులు పాల్గొన్నారు.

కలెక్టర్‌ ప్రభాకరరెడ్డి