ఆగని హాహాకారాలు!

కేజీహెచ్‌లో వరుస ప్రమాదాలతో రోగుల ఆందోళన
కార్డియాలజీ విభాగంలో కలకలం

● ఇటీవల యూజీ కేబుల్స్‌ తవ్వకాలతో విద్యుత్‌ సరఫరాకు అంతరాయం

● గత ఏడాది కార్పొరేట్‌ బిల్డింగ్‌లో అగ్ని ప్రమాదం

● కేజీహెచ్‌కి వెళ్లాలంటేనే భయపడుతున్న రోగులు

● చంద్రబాబు ప్రభుత్వ నిర్లక్ష్యమే ప్రమాదాలకు ప్రధాన కారణం!

కాలిన పోయిన కంప్యూటర్‌ పరికరాలు

బూడిదతో నల్లగా మారిన బెడ్‌ షీట్‌

● 2024 జూన్‌ 17న అర్ధరాత్రి సీఎస్సార్‌ బ్లాక్‌ మూడో అంతస్తులో ఒక్కసారిగా మంటలు చెలరేగాయి. ఐసీయూ వార్డులోని వెంటిలేటర్‌ బ్యాటరీ పేలడంతో దట్టమైన పొగతో మంటలు వ్యాపించాయి. ఐసీయూలో ఉన్న ఏడుగురు రోగుల్ని, పిల్లల్ని సర్జికల్‌ వార్డుకు తరలించారు. గంట సేపు రోగులు ఇబ్బందులు ఎదుర్కొన్నారు.

● 2025 నవంబర్‌ 6న మధ్యాహ్నం 12 గంటల సమయంలో విద్యుత్‌ సరఫరాకు అంతరాయం ఏర్పడింది. నిర్మాణ పనులు చేస్తున్న సమయంలో అండర్‌ గ్రౌండ్‌ కేబుల్‌ని తవ్వేయడంతో సరఫరా నిలిచిపోయింది. ఏడు వార్డుల్లో అంధకారం నెలకొంది. ప్రత్యామ్నాయ ఏర్పాట్లు చేయడంలో ప్రభుత్వం విఫలమవ్వడంతో.. రోగులు, నవజాత శిశువులు, బాలింతలు, వెంటిలేటర్‌పై చికిత్స పొందుతున్నవారు తీవ్ర ఇబ్బందులు పడ్డారు. దాదాపు 12 గంటల పాటు సరఫరా నిలిచిపోయింది. కేజీహెచ్‌ చరిత్రలో ఇలా జరగడం ఇదే మొదటిసారి.

సాక్షి, విశాఖపట్నం/మహరాణిపేట: ఉత్తరాంధ్ర ఆరోగ్య ప్రదాయిని కింగ్‌ జార్జ్‌ ఆస్పత్రిలో ఏ క్షణం ఏం జరుగుతుందోనని ఆందోళన వెంటాడుతోంది. ఇక్కడికి వచ్చే రోగులు క్షేమంగా ఇంటికి వెళ్తే చాలనుకునే పరిస్థితి దాపురించింది. పేదల వైద్యంపై చంద్రబాబు ప్రభుత్వం చూపిస్తున్న నిర్లక్ష్యం.. కేజీహెచ్‌ ప్రతిష్టను పాతాళానికి పడేసింది. ఏడాదిన్నర కాలంలోనే రెండు అగ్ని ప్రమాదాలు.. 12 గంటల పాటు విద్యుత్‌ సరఫరా లేక రోగులు విలవిల్లాడిన ఘటనలతో కేజీహెచ్‌కు వెళ్లాలంటేనే రోగులు భయపడుతున్నారు. ఓపీ దగ్గర మొదలుపెడితే.. తిరిగి కేజీహెచ్‌ గేటు బయటకు వచ్చేంత వరకూ రోగుల ఆరోగ్యానికి భరోసా కరువవుతోంది. కేజీహెచ్‌కు వచ్చే వారంతా పేద, మధ్యతరగతి కుటుంబాలకు చెందిన ప్రజలే అయినా.. వారికి అందించాల్సిన వైద్యం పట్ల చంద్రబాబు ప్రభుత్వం పూర్తిగా నిర్లక్ష్యం ప్రదర్శిస్తోంది. వరుస ప్రమాదాలు జరుగుతున్నా దిద్దుబాటు చర్యలు చేపట్టకపోవడంతో ఉత్తరాంధ్ర సంజీవకి సుస్తీ చేస్తోంది.

కేజీహెచ్‌పై శీతకన్ను?

చంద్రబాబు ప్రభుత్వం అధికారంలోకి వచ్చిన తర్వాత.. ప్రైవేట్‌ ఆస్పత్రులపై ప్రేమ కురిపిస్తూ.. ప్రభుత్వ వైద్యంపై శీతకన్ను వేసింది. పీహెచ్‌సీలు, సీహెచ్‌సీల్లో వైద్య సిబ్బంది నియామకాన్ని గాలికొదిలేసింది. అర్బన్‌ హెల్త్‌ సెంటర్లు అస్తవ్యస్తంగా మారిపోయాయి. ఇక కేజీహెచ్‌ పరిస్థితి దారుణంగా తయారైంది. ఓపీ కోసం గంటల తరబడి వేచి చూడాల్సిన పరిస్థితి దాపురించింది. మందులు కూడా రోగులకు సరిపడా సరఫరా చేయడం లేదు. ఫలితంగా పేదలంతా మందులు బయట కొనుగోలు చేయాల్సి వస్తోంది. గత వైఎస్సార్‌సీపీ ప్రభుత్వ హయాంలో ఓపెన్‌ హార్ట్‌ సర్జరీలు జరిగితే.. ఈ ప్రభుత్వం వచ్చిన తర్వాత పూర్తిగా గుండె ఆపరేషన్లు ఆగిపోయాయంటే.. పేదోడి వైద్యంపై ఎలా వ్యవహరిస్తోందో అర్థం చేసుకోవచ్చు. దీనిపై వైఎస్సార్‌సీపీ విమర్శల దాడి చేస్తే.. మళ్లీ ఇటీవలే ఆపరేషన్లు మొదలు పెట్టారు.

పొగతో ఉక్కిరిబిక్కిరి

నేను గత కొద్ది రోజులుగా ఆయాసం కారణంగా కార్డియాలజీ వార్డులో చికిత్స పొందుతున్నాను. ఇక తగ్గిపోతుందన్న సమయంలో అగ్ని ప్రమాదం వల్ల దగ్గు, ఆయాసం మరింత ఎక్కువయ్యాయి. ఒక్కసారిగా నల్లటి పొగ రావడంతో ఉక్కిరిబిక్కిరి అయ్యాను. వార్డులో నాతో పాటు ఉన్న ఇతర రోగులు కూడా భయపడ్డారు. నన్ను ఎప్పుడు డిశ్చార్జ్‌ చేస్తారోనని ఆందోళన చెందుతున్నాను.

– ఎ.రామస్వామి, అల్లిపురం

భయాందోళన చెందాం

నా వయసు 63 ఏళ్లు. గుండెలో నొప్పి రావడంతో కార్డియాలజీ వార్డులో చికిత్స పొందుతున్నాను. కొద్దిగా కోలుకోవడంతో ఇటీవల ఐసీయూ నుంచి సాధారణ వార్డుకు మార్చారు. శనివారం ఉదయం జరిగిన ప్రమాదంలో వార్డు అంతా పొగ అలుముకోవడంతో చాలా భయపడ్డాను. దీంతో మళ్లీ దగ్గు ఎక్కువగా వచ్చింది. ఈ విషయాన్ని వైద్య సిబ్బంది, వైద్యులకు చెప్పాను. వైద్యులు వచ్చి పరిస్థితిని పరిశీలించారు. మరికొన్ని రోజులు ఉండాల్సి వస్తుందన్నారు.

– సారిపల్లి రమణమ్మ, సీతంపేట

శనివారం ఉదయం కార్డియాలజీ విభాగంలో అగ్నిప్రమాదం

పర్యవేక్షణ లోపం..

కేజీహెచ్‌లో నిర్వహణ లోపాలు కొట్టొచ్చినట్లు కనిపిస్తున్నాయి. అధికారుల మధ్య సమన్వయం లేకపోవడంతో తరచూ ఈ తరహా ఘటనలు సంభవిస్తున్నాయి. దీనికి కారణం.. కేజీహెచ్‌ నిర్వహణను చంద్రబాబు ప్రభుత్వం గాలికొదిలేయడమే. కేజీహెచ్‌లో సగానికి పైగా వెంటిలేటర్లు మూలనపడ్డాయి. సీఎస్‌ఆర్‌ బ్లాక్‌లో లిఫ్ట్‌లు పనిచేయడం లేదు. ఇటీవల కాలంలో లిఫ్ట్‌ల పనిచేయక సైరన్‌ మోత మోగడంతో రోగులు ఒక్కసారిగా ఆందోళనలకు గురయ్యారు. తాగునీటి కోసం రోగులు అవస్థలు పడాల్సిన పరిస్థితి ఏర్పడింది. పలు వ్యాధులు నిర్ధారించే ఆర్టీరియల్‌ బ్లడ్‌ గ్యాస్‌(ఏబీజీ) పరీక్షలకు కావాల్సిన రీజెంట్స్‌ లిక్విడ్‌ని ప్రభుత్వం సరఫరా చేయకపోవడంతో ఇవి కూడా నిలిచిపోయాయి. కేజీహెచ్‌లో ఉన్న 217 ఏసీలకు గాను 90కి పైగా పనిచేయడం లేదు. ఇన్ని సమస్యలున్నా ప్రభుత్వం మాత్రం ఏమీ పట్టనట్లుగా వ్యవహరిస్తోంది. ఏదైనా ఘటన జరిగినప్పుడు మంత్రులు హుటాహుటిన వచ్చి.. భవిష్యత్తులో ఇలాంటి ప్రమాదాలు జరగకుండా చర్యలు తీసుకుంటామని చెప్పి చేతులు దులిపేసుకుంటున్నారే తప్ప.. ఉత్తరాంధ్ర ఆరోగ్య ప్రదాయానికి ఊపిరి పోయడం లేదు.

చంద్రబాబు ప్రభుత్వం వచ్చిన తర్వాత కేజీహెచ్‌లో వరుస సంఘటనలు కలకలం రేపుతున్నాయి. శనివారం ఉదయం కార్డియాలజీ విభాగంలో ఉన్న ఆరోగ్యశ్రీ డేటా ఎంట్రీ రూమ్‌లో అగ్ని ప్రమాదం సంభవించింది. ఉదయం 9.30 గంటల నుంచి 9.45 మధ్యలో జరిగిన షార్ట్‌ సర్క్యూట్‌ వల్ల జరిగిన ప్రమాదంలో రెండు కంప్యూటర్లు, ఒక ఏసీ, ఫర్నీచర్‌ అగ్నికి ఆహుతయ్యాయి. ఒక్కసారిగా చెలరేగిన మంటలతో రోగులు భయాందోళనలకు గురై.. ఉరుకులు పరుగులు తీశారు. దట్టంగా అలముకున్న పొగల వల్ల ఇబ్బందులు పడుతున్న హృద్రోగుల్ని పక్కనే ఉన్న రెండు వార్డులకు తరలించారు. సుమారు 43 మంది రోగులను గైనిక్‌ విభాగంలోకి, కుటుంబ సంక్షేమ వార్డులోకి తరలించి వారికి వైద్య సేవలు అందించారు. దాదాపు 2 గంటలకు పైగా శ్రమించి మంటల్ని అదుపులోకి తీసుకొచ్చారు. అగ్ని ప్రమాదం వల్ల రోగులకు ఎలాంటి ఇబ్బంది లేదని కేజీహెచ్‌ సూపరింటెండెంట్‌ డాక్టర్‌ ఐ.వాణి తెలిపారు.

ఆగని హాహాకారాలు!

ఆగని హాహాకారాలు!