పేదలకు ఉచిత వైద్యం దూరం చేయొద్దు

సాక్షి, విశాఖపట్నం: రాష్ట్రంలో విద్య, వైద్య రంగాలతో వ్యాపారం చేయవద్దు. సామాన్య ప్రజలకు ఉచిత విద్యను, వైద్యాన్ని దూరం చేయవద్దని వైఎస్సార్‌ సీపీ జిల్లా అధ్యక్షుడు కేకే రాజు అన్నారు. వైఎస్సార్‌ సీపీ యువజన విభాగం ఆధ్వర్యంలో జీవీఎంసీ గాంధీ విగ్రహం వద్ద శనివారం కోటి సంతకాల సేకరణ కార్యక్రమం జరిగింది. ప్రభుత్వ మెడికల్‌ కళాశాలల ప్రైవేటీకరణకు వ్యతిరేకంగా చేపట్టిన ఈ కార్యక్రమానికి విద్యార్థులు, మేధావులు, సామాన్య ప్రజలు మద్దతు పలికి, స్వచ్ఛందంగా సంతకాలు చేశారు. ఈ సందర్భంగా కేకే రాజు మాట్లాడుతూ.. చంద్రబాబు ప్రభుత్వం అధికారంలోకి వచ్చిన తర్వాత ప్రజారోగ్యం పట్ల నిర్లక్ష్య ధోరణితో వ్యవహరిస్తోందన్నారు. సామాన్యులకు ఉచిత వైద్య సేవలు, వైద్య విద్య అందకుండా మెడికల్‌ కళాశాలలను ప్రైవేటు వ్యక్తులకు ధారదత్తం చేస్తోందని మండిపడ్డారు. ప్రజాభిప్రాయానికి వ్యతిరేకంగా చంద్రబాబు ప్రభుత్వం తీసుకున్న నిర్ణయాన్ని వ్యతిరేకిస్తూ.. శాంతియుతంగా పలుమార్లు నిరసనలు చేపట్టామన్నారు. ఇందులో భాగంగా కోటి సంతకాల సేకరణ కార్యక్రమం యజ్ఞంలా సాగుతోందన్నారు. మెడికల్‌ కళాశాలల ప్రైవేటీకరణ నిర్ణయాన్ని వెనక్కి తీసుకోకపోతే.. తగిన మూల్యం చెల్లించుకోక తప్పదని హెచ్చరించారు.

పీపీపీ పేరుతో కుట్ర

వైఎస్సార్‌ సీపీ మహిళా విభాగం అధ్యక్షురాలు, ఎమ్మెల్సీ వరుదు కల్యాణి మాట్లాడుతూ.. మెడికల్‌ కళాశాలల ప్రైవేటీకరణ నిర్ణయాన్ని చంద్రబాబు ప్రభుత్వం వెనక్కి తీసుకునేలా ఒత్తిడి తెచ్చేందుకు.. రాష్ట్రంలోని మేధావులు, విద్యార్థులు, యువత, సామాన్య ప్రజలు కోటి సంతకాల సేకరణ కార్యక్రమంలో పాల్గొని మద్దతు తెలుపుతున్నారని చెప్పారు. పేదలు కూడా డాక్టర్‌ లాంటి ఉన్నత చదువులు చదువుకోవాలనే ఉద్దేశంతో రాష్ట్రంలో 17 ప్రభుత్వ మెడికల్‌ కళాశాలలను తీసుకొస్తే.. వాటిని పీపీపీ పద్ధతిలో ప్రైవేటీకరణ చేసే కుట్రకు చంద్రబాబు పాల్పడుతున్నారని ఆరోపించారు. కార్యక్రమంలో సమన్వయకర్తలు తిప్పల దేవన్‌రెడ్డి, మొల్లి అప్పారావు, మాజీ ఎమ్మెల్యే తైనాల విజయ్‌కుమార్‌, రాష్ట్ర అధికార ప్రతినిధి కొండా రాజీవ్‌ గాంధీ, రాష్ట్ర అనుబంధ విభాగ అధ్యక్షుడు పేర్ల ఖాదర్‌ భాషా, పేర్ల విజయ్‌ చందర్‌, జిల్లా యువజన విభాగం అధ్యక్షుడు వురుకూటి రామచంద్రరావు, యువజన విభాగం జోన్‌ అధ్యక్షుడు అంబటి శైలేష్‌, యువజన విభాగం ప్రధాన కార్యదర్శి దొడ్డి కిరణ్‌, యువజన విభాగం అధికార ప్రతినిధి మహమ్మద్‌ ఇమ్రాన్‌, జిల్లా అనుబంధ విభాగం అధ్యక్షులు పేడాడ రమణి కుమారి, ఎం. సునీల్‌, పీలా ప్రేమ్‌ కిరణ్‌, నీలి రవి, బొండా ఉమా మహేశ్వర్‌, ముఖ్య నేతలు అల్లంపల్లి రాజాబాబు, పల్లా దుర్గారావు, శ్రీనివాస్‌ గౌడ్‌, మువ్వల సంతోష్‌, తుళ్లి చంద్రశేఖర్‌, పీతల వాసు, ఉమ్మడి కల్యాణ్‌, జగదీశ్‌ రెడ్డి, భవాని శంకర్‌, మౌళి, బొట్టారాజు, గాలి ప్రసాద్‌ తదితరులు పాల్గొన్నారు.