‘వైద్యం’ ప్రైవేటీకరణతో పేదలకు తీవ్ర నష్టం

అల్లిపురం: విద్య, వైద్యం పూర్తిగా ప్రభుత్వ రంగంలోనే కొనసాగాలని నాగార్జున యూనివర్సిటీ పూర్వ ఉపకులపతి ప్రొఫెసర్‌ వి.బాల మోహనదాస్‌ అన్నా రు. అల్లూరి విజ్ఞాన కేంద్రంలో, ప్రభుత్వ మెడికల్‌ కళాశాలల పరిరక్షణ కమిటీ ఆధ్వర్యంలో.. పీపీపీ పేరుతో ప్రభుత్వ మెడికల్‌ కళాశాలల ప్రైవేటీకరణను నిరసిస్తూ శనివారం వివిధ రాజకీయ పార్టీలు, పౌర సంఘాల నేతలతో రౌండ్‌ టేబుల్‌ సమావేశం జరిగింది. ఈ సందర్భంగా ఆయన మాట్లాడుతూ వైద్య రంగాన్ని వ్యాపార దోపిడీ నుంచి కాపాడాలని ఉద్ఘాటించారు. కోవిడ్‌ సమయంలో ప్రభుత్వ ఆసుపత్రుల కృషి అమోఘమని, ప్రైవేట్‌ ఆసుపత్రులు ధనార్జన కేంద్రాలుగా మారాయని గుర్తు చేశారు. దాతల సహకారంతోనైనా మెడికల్‌ కళాశాలల నిర్మా ణం చేపట్టడానికి చొరవ తీసుకోవాలని కోరారు.

రిజర్వేషన్లు అమలు కావు

ప్రభుత్వ మెడికల్‌ కళాశాలల పరిరక్షణ కమిటీ రాష్ట్ర కో–కన్వీనర్‌ వల్లంరెడ్డి లక్ష్మణరెడ్డి మాట్లాడుతూ..10 ప్రభుత్వ మెడికల్‌ కాలేజీలను పీపీపీ విధానంలో ప్రైవేటీకరించడం వలన పేద ప్రజలకు తీవ్ర నష్టం జరుగుతుందన్నారు. పీపీపీ విధానం వాస్తవానికి ప్రైవేటీకరణకు కొత్త ముసుగు మాత్రమేనని వ్యాఖ్యానించారు. ఈ విధానంలో ఉద్యోగుల నియామకాల్లో రిజర్వేషన్లు అమలు కావని, సామాజిక న్యాయానికి తిలోదకాలిస్తారని, ఉద్యోగుల నియామకాల్లో ప్రభు త్వ పాత్ర ఉండదని ఆందోళన వ్యక్తం చేశారు. 10 మెడికల్‌ కళాశాలలకు చెందిన దాదాపు 600 ఎకరాల భూమి, కొన్ని లక్షల చదరపు అడుగుల నిర్మాణం బడా వైద్య సంస్థలకు అప్పనంగా ప్రభుత్వం ధారా దత్తం చేస్తోందన్నారు. రాష్ట్రంలో కలిసి వచ్చే రాజకీయ పార్టీలను, పౌర సంఘాలను, విద్యార్థి యువజన సంఘాలను కలుపుకుని.. ప్రభుత్వ మెడికల్‌ కళాశాలల ప్రైవేటీకరణకు వ్యతిరేకంగా ఉద్యమిస్తామని ప్రకటించారు.

రూ.5 వేల కోట్లు ఖర్చు చేయలేరా?

సీఐటీయూ రాష్ట్ర ప్రధాన కార్యదర్శి సీహెచ్‌ నరసింగరావు మాట్లాడుతూ.. రూ.3 లక్షల 50 వేల కోట్ల బడ్జెట్‌ ఉన్న రాష్ట్రంలో.. 10 ప్రభుత్వ వైద్య కళాశాలలకు ప్రభుత్వం కేవలం రూ.5వేల కోట్లు ఖర్చు చేయలేదా? అని ప్రశ్నించారు. యోగాంధ్ర లాంటి ఈవెంట్స్‌కు వేలాది కోట్లు ఖర్చు చేస్తున్నారని, అభివృద్ధి పేరుతో బడా కంపెనీలకు వందలాది ఎకరాలను 99 పైసలకే లీజుకు ధారాదత్తం చేస్తున్నారని ఆరోపించారు. ఆమ్‌ ఆద్మీ పార్టీ రాష్ట్ర అధ్యక్షుడు ఎస్‌.రమేష్‌ కుమార్‌, సీపీఐ జిల్లా కార్యదర్శి షేక్‌ రెహమాన్‌, కాంగ్రెస్‌ రాష్ట్ర సహాయ కార్యదర్శి ఎస్‌.సుధాకర్‌, సీపీఐ(ఎంఎల్‌) ప్రజా పోరు నేత కె.మహిత, లయన్స్‌ క్లబ్‌ పూర్వ గవర్నర్‌ డా. ఎన్‌.వి.ఎన్‌.దుర్గా ప్రసాదరావు, ప్రజా ఆరోగ్య వేదిక రాష్ట్ర ప్రధాన కార్యదర్శి టి.కామేశ్వరరావు, పౌర గ్రంథాలయ పరిరక్షణ సమితి నేత బి.ఎల్‌.నారాయణ, పీపుల్స్‌ ఫర్‌ ఇండియా నేత ఎ.వి.ఆర్‌.కె.మూర్తి, కుల వివక్షత పోరాట సమితి నేత చిరంజీవి, ఎస్‌ఎఫ్‌ఐ జిల్లా కార్యదర్శి డి.రమణ, విశాఖ జిల్లా నివాస్‌ అధ్యక్షుడు పి.నారాయణమూర్తి తదితరులు పాల్గొని.. మెడికల్‌ కాలేజీల ప్రైవేటీకరణ తగదన్నారు.