వైన్‌షాపులో చోరీ

కంభం:

స్థానిక బస్టాండ్‌ సమీపంలోని ఓ మద్యం దుకాణంలో దొంగలు పడి నగదు అపహరించుకెళ్లారు. ఈ సంఘటన శుక్రవారం రాత్రి జరగగా శనివారం ఉదయం వెలుగులోకి వచ్చింది. వివరాలు.. బస్టాండ్‌ ఎదురుగా ఉన్న విజయదుర్గ వైన్స్‌ షాపును రోజూలాగే రాత్రి మూసి వెళ్లి శనివారం ఉదయం షాపు తెరిచారు. అనంతరం దొంగతనం జరిగినట్లు గుర్తించారు. షాపు వెనుక వైపు నుంచి లోపలికి ప్రవేశించిన దొంగలు కౌంటర్‌ లోని నగదును అపహరించుకెళ్లినట్లు గుర్తించారు. కౌంటర్‌లో ఉన్న సుమారు రూ.లక్షన్నర వరకు నగదు పోయిందని, మద్యం బాటిల్స్‌ ఎన్ని పోయాయో లెక్కవేస్తే తెలుస్తుందని షాపు యజమానులు తెలిపారు. దొంగలు తమ ఆనవాళ్లు తెలియకుండా ఉండేందుకు సీసీ కెమెరా డివిఆర్‌ను, మానిటర్‌ను కాలువలో పడేసి పారిపోయారు. బాధితుల ఫిర్యాదు మేరకు సీఐ కె.మల్లికార్జున చోరీ జరిగిన దుకాణాన్ని పరిశీలించి వివరాలు సేకరించారు. మార్కాపురం నుంచి వచ్చిన క్లూస్‌ టీమ్‌ వేలిముద్రలు సేకరించింది. ఇటీవల ఇదే షాపునకు ఎదురుగా రెండు దుకాణాల్లో చోరీ జరిగిన విషయం విధితమే. పది రోజులు తిరగక ముందే మళ్లీ చోరీ జరగడంతో బస్టాండ్‌ పరిసరాల్లోని దుకాణాల యజమానులు ఆందోళన చెందుతున్నారు. రక్షణ కోసం సీసీ కెమెరాలు ఏర్పాటు చేసుకుంటున్నా వాటిని కూడా దొంగతనానికి వచ్చిన వారు ధ్వంసం చేస్తుండటం ఆందోళన కలిగిస్తోంది. రాత్రి పూట పోలీసులు గస్తీ పెంచి దొంగతనాల నివారణకు పటిష్ట చర్యలు తీసుకోవాలని పట్టణ వాసులు కోరుతున్నారు.

రూ.లక్షన్నర నగదు మాయం

వైన్‌షాపులో చోరీ