TV
రూ.కోటి స్వాహా అనడం దుర్మార్గం
సంతనూతలపాడు: భవన నిర్మాణమే రూ.98 లక్షలైతే కోటి రూపాయల అవినీతి ఎలా సాధ్యమని సంతనూతలపాడు సిండికేట్‌ రైతు సొసైటీ మాజీ అధ్యక్షులు దుంపా యల్లమందారెడ్డి, మాదాల వెంకట్రావు, వైఎస్సార్‌ సీపీ మండల కన్వీనర్‌ దుంపా చెంచిరెడ్డి ప్రశ్నించారు. స్థానిక వైఎస్సార్‌ సీపీ కార్యాలయంలో శనివారం సాయంత్రం జరిగిన విలేకరుల సమావేశంలో వారు మాట్లాడారు. కాంగ్రెస్‌, వైఎస్సార్‌ సీపీ పాలనల్లో సొసైటీకి స్థలం కేటాయించి భవన నిర్మాణం చేపట్టామని, టీడీపీ పాలనలో పట్టించుకున్న దాఖలు లేవని మండిపడ్డారు. వైఎస్సార్‌ సీపీ ప్రభుత్వ హయాంలో జిల్లాలో ఎక్కడా లేని విధంగా సొసైటీకి భారీ భవనాన్ని నిర్మిస్తే దాన్ని ఓర్చుకోలేక నేటి చైర్మన్‌, ఆడిటర్‌ ప్రోద్బలంతో పత్రికల్లో మాజీ అధ్యక్షుల వ్యక్తిత్వంపై బురద జల్లే కార్యక్రమం చేపట్టారని ఆగ్రహం వ్యక్తం చేశారు. బిల్డింగ్‌ నిర్మాణానికి సంబంధించి ప్రతి ఒక్క రూపాయి ఎంబుక్‌లో రికార్డు చేసి ఉందని స్పష్టం చేశారు. తమ హయాంలో క్రాప్‌ లోన్లకు వడ్డీ రేట్లు కూడా తగ్గించామని, రుణాలు, డిపాజిట్లు భారీగా పెరిగాయన్నారు. ఇటువంటి తప్పుడు ఆరోపణలపై నేడు డిపాజిదారులు, బ్యాంకర్లు ఆందోళన చెందుతున్నారని ఆవేదన వ్యక్తం చేశారు. ఇటువంటి తప్పుడు ఆరోపణతో సొసైటీ రోడ్డున పడే పరిస్థితి తీసుకొస్తున్నారన్నారు. ఇటీవల ఓ పత్రికకు పార్టీ తరఫున చైర్మన్‌ ఇచ్చిన ప్రైవేట్‌ యాడ్‌కు సొసైటీ నుంచి నిధులు ఎలా చెల్లిస్తారని ప్రశ్నించారు. ఈ సందర్భంగా ప్రస్తుత సొసైటీ ఆడిటర్‌ పక్షపాత వైఖరితో ఇతరుల పోద్బలంతో తప్పుడు నివేదికలను తయారు చేసి ఇచ్చారని, దీనిలో ఇచ్చినవి నిరూపించకపోతే లీగల్గా పోరాటం చేయనున్నట్లు స్పష్టం చేశారు. తమ పాలనలో ఎటువంటి అవినీతి జరగలేదని పేర్కొన్నారు. వైఎస్సార్‌ సీపీ మండల కన్వీనర్‌ దుంపా చెంచిరెడ్డి మాట్లాడుతూ ఆడిటర్‌ ఆడిటింగ్‌ చేయకుండా రాజకీయాలు చేస్తూన్నారని, వీలైతే ఆడిట్‌ చేసి ఏదైనా తప్పు జరిగి ఉంటే సదరు వ్యక్తులపై చర్యలు తీసుకోవాలిగానీ ఈ విధంగా లీకులతో ప్రజలను తప్పుదోవ పట్టించే ప్రయత్నం చేయడం ఎంతవరకు సమంజసమని ప్రశ్నించారు. సమావేశంలో సొసైటీ మాజీ డైరెక్టర్లు తన్నీరు మోహన్‌రావు, కొనికి కోటేశ్వరరావు, కొడవటి హరిబాబు పాల్గొన్నారు.
సంతనూతలపాడు సిండికేట్‌ రైతు సొసైటీ మాజీ చైర్మన్‌, డైరెక్టర్లు
రూ.కోటి స్వాహా అనడం దుర్మార్గం
