నకిలీ పాలసేకరణ కేంద్రంపై దాడి

దర్శి: కల్తీపాలు తయారు చేస్తే చర్యలు తీసుకుంటామని జిల్లా ఫుడ్‌ సేప్టీ అధికారి శివతేజ హెచ్చరించారు. మండలంలోని చలివేంద్రంలో కల్తీపాల తయారీ స్థావరంపై ఫుడ్‌ సేఫ్టీ అధికారులు శనివారం ఆకస్మికంగా దాడులు చేశారు. అక్కడ తయారు చేస్తున్న కల్తీపాలు, అందుకు ఉపయోగించే ఆయిల్‌ ప్యాకెట్‌లను భారీగా స్వాధీనం చేసుకున్నారు. పాల శాంపిళ్లను సేకరించి ల్యాబ్‌కు పంపించారు. ఈ సందర్భంగా శివతేజ మాట్లాడుతూ తమకు అందిన ప్రాథమిక సమాచారం మేరకు చలివేంద్రలో సందు రామాంజనేయులు అనే వ్యక్తి పాల సేకరణ కేద్రం ఏర్పాటు చేసుకుని పలు డెయిరీలకు పాలు పంపిణీ చేస్తున్నట్లు గుర్తించామని చెప్పారు. ఆ పాలతో పాటు మరికొన్ని కల్తీపాలు తయారు చేసి వాటిలో కలిపి డెయిరీలకు సరఫరా చేస్తున్నట్లు సమాచారం అందిందని చెప్పారు. రెండు రోజులుగా గ్రామంలో రెక్కీ నిర్వహించి డాడులు చేసి నకిలీ పాలను పట్టుకున్నట్లు ఆయన వివరించారు. నకిలీ పాలు తయారు చేసేందుకు ఉపయోగించే సామగ్రి, సన్‌ఫ్లవర్‌ ఆయిల్‌ ప్యాకెట్‌లు స్వాధీనం చేసుకున్నామని చెప్పారు. పాలలో ఆయిల్‌ కలపడంతో ఫ్యాట్‌ పర్సంటేజ్‌ పెరుగుతుందని కొందరు అక్రమ మార్గంలో డబ్బులు సంపాదించేందుకు కల్తీపాలు చేస్తున్నారన్నారు. అలాంటి వారిపై చట్టరీత్యా కఠిన చర్యలు తీసుకుంటామని హెచ్చరించారు. కల్తీపాలు తయారు చేసేందుకు ఉపయోగించిన ఆయిల్‌ ప్యాకెట్‌లు, పాలు శాంపిల్స్‌ తీసుకున్నామని చెప్పారు. వాటిని ల్యాబ్‌కు పంపి రిపోర్టు ఆధారంగా చర్యలు తీసుకుంటామని హెచ్చరించారు. ఎక్కడైనా కల్తీపాలు తయారు చేస్తుంటే తమకు సమాచారం ఇవ్వాలని, ఇచ్చిన వారి సమాచారం గోప్యంగా ఉంచుతామని శివతేజ చెప్పారు.

పలు శాంపిళ్లు స్వాధీనం

కల్తీపాలు తయారు చేస్తే చర్యలు

జిల్లా ఫుడ్‌ సేఫ్టీ అధికారి శివతేజ

నకిలీ పాలసేకరణ కేంద్రంపై దాడి