లక్ష్మీచెన్నకేశవ మార్కాపురం జిల్లాగా నామకరణం చేయాలి

మార్కాపురం టౌన్‌: కొత్త జిల్లాకు లక్ష్మీచెన్నకేశవ మార్కాపురం జిల్లాగా నామకరణం చేయాలని, ఆర్థిక వనరులు లేకుండా మార్కాపురం జిల్లాను ప్రకటించిన ఘనత చంద్రబాబు సర్కార్‌కే దక్కిందని మాజీ ఎమ్మెల్యే, వైఎస్సార్‌ సీపీ నెల్లూరు పార్లమెంట్‌ పరిశీలకుడు జంకె వెంకటరెడ్డి అన్నారు. శనివారం ఆయన తన నివాసంలో ఏర్పాటు చేసిన విలేకరుల సమావేశంలో మాట్లాడారు. పూర్వం కడపలో, తర్వాత కర్నూలు, ఆ తర్వాత ప్రకాశంలో ఉండి ఇప్పుడు మార్కాపురం జిల్లాగా నాయకులు ప్రకటించారన్నారు. కేవలం మార్కాపురం, గిద్దలూరు, యర్రగొండపాలెం, కనిగిరి నియోజకవర్గాలను కలుపుతూ ఏ ప్రాతిపదికన ప్రకటించారో అర్థం కావడం లేదన్నారు. పూర్వం మార్కాపురం పలకల పరిశ్రమతో అంతర్జాతీయ స్థాయి గుర్తింపుతో వ్యాపారం జరిగిందని, ఇప్పుడు కార్డు బోర్డుతో పాటు వివిధ రూపాల్లో పలకలు తయారు చేసుకోవడంతో మార్కాపురం బొడిపలకగా మారి పరిశ్రమ కుంటుపడిందన్నారు. ఇక గిద్దలూరు, యర్రగొండపాలెం అటవీ ప్రాంతాలుగా, కనిగిరి ఫ్లోరైడ్‌ ప్రాంతంగా ఉందని, ఈ జిల్లాకు ఆర్థిక పరిపుష్టికి ఎక్కడి నుంచి వస్తుందో టీడీపీ నాయకులు తెలపాలన్నారు. రాజకీయ ఎత్తుగడ కోసం జిల్లాగా ప్రకటించారన్న ఆలోచనలో ప్రజలు ఉన్నారన్నారు. మార్కాపురం జిల్లాలో దర్శి, కురిచేడును కలపాలని, శిఖరం వరకు సరిహద్దు ఉన్న శ్రీశైలాఇ్న మార్కాపురంలో కలిపే విధంగా మూడు నియోజకవర్గాల ఎమ్మెల్యేలు, ఇన్‌చార్జి మంత్రి ప్రభుత్వంపై ఒత్తిడి తెచ్చి జిల్లాకు ఒకరూపు తేవాలని జంకె డిమాండ్‌ చేశారు. సమావేశంలో పార్టీ నాయకులు ధర్మానాయక్‌, నల్లబోతుల కొండయ్య, పంబి వెంకటరెడ్డి, ఎస్‌.సాంబశివారెడ్డి, గౌస్‌ మోహిద్దీన్‌, రమణారెడ్డి ఉన్నారు.

వైఎస్సార్‌ సీపీ నెల్లూరు పార్లమెంట్‌

పరిశీలకుడు జంకె వెంకటరెడ్డి