తొలి విడత సాఫీగా..

సాక్షి ప్రతినిధి, ఖమ్మం: గ్రామపంచాయతీ ఎన్నికల్లో భాగంగా మొదటి విడత జీపీల్లో నామినేషన్ల దాఖలు గడువు శనివారంతో ముగిసింది. చివరగా అందిన సమాచారం ప్రకారం ఏడు మండలాల్లోని 192 జీపీల్లో సర్పంచ్‌ స్థానాలకు 814, 1,740 వార్డులకు 3,139 నామినేషన్లు దాఖలయ్యాయి. వచ్చేనెల 3వ తేదీన మధ్యాహ్నం 3గంటల వరకు నామినేషన్ల ఉపసంహరణకు అవకాశం కల్పించి అదేరోజు బరిలో మిగిలిన అభ్యర్థులను ప్రకటిస్తారు. కాగా, నామినేషన్ల దాఖలుకు చివరి రోజు కావడంతో శనివారం రాత్రి వరకు కేంద్రాల వద్ద అభ్యర్థులు బారులు దీరారు.

చివరి రోజు జోరు..

మొదటి విడత గ్రామపంచాయతీ ఎన్నికలు కొణిజర్ల, రఘునాథపాలెం, వైరా, బోనకల్‌, చింతకాని, మధిర, ఎర్రుపాలెం మండలాల్లోని 192 గ్రామపంచాయతీలు, 1,740 వార్డుల్లో నిర్వహించనున్నారు. ఇందుకోసం ఈనెల 27న నోటిఫికేషన్‌ జారీ చేయగా, మొదటి రోజున సర్పంచ్‌ స్థానాలకు 100, వార్డులకు 49 నామినేషన్లు వచ్చాయి. రెండో రోజు సర్పంచ్‌ స్థానాలకు 257, వార్డు సభ్యుల స్థానాలకు 374 నామినేషన్లు దాఖలయ్యాయి. చివరి రోజైన శనివారం మాత్రం ఎక్కువ మంది ముందుకొచ్చారు. కార్యాలయాల వద్ద అభ్యర్థులు బారులుదీరడంతో సాయంత్రం 5గంటల వరకు ఉన్న వారికి కూపన్లు జారీ చేసి అందరి నుంచి నామినేషన్లు స్వీకరించారు. దీంతో కొన్నిచోట్ల అర్ధరాత్రి 12గంటల వరకు కూడా ప్రక్రియ కొనసాగింది.

ఈనెల 11న ఎన్నికలు..

మొదటి విడత ఎన్నికలకు దాఖలైన నామినేషన్లను ఆదివారం పరిశీలించి చెల్లుబాటు అయ్యే అభ్యర్థుల జాబితా ప్రకటిస్తారు. వచ్చేనెల 1న సాయంత్రం 5గంటల వరకు అప్పీళ్లు స్వీకరించి 2వ తేదీన పరిష్కరిస్తారు. ఇక వచ్చేనెల 3న సాయంత్రం 3గంటల వరకు అభ్యర్థులు తమ నామినేషన్లను ఉపసంహరించుకునే అవకాశం ఉండగా, ఆతర్వాత తుది జాబితా విడుదల చేస్తారు. వచ్చేనెల 11న ఉదయం 7గంటల నుంచి మధ్యాహ్నం ఒంటి గంట వరకు పోలింగ్‌ నిర్వహించి ఆతర్వాత ఓట్లు ఎక్కించి సర్పంచ్‌, వార్డుసభ్యులుగా గెలిచిన వారిని ప్రకటించడమే కాక ఉప సర్పంచ్‌ ఎన్నిక కూడా పూర్తిచేస్తారు.

ఉపసంహరణలపై దృష్టి

చాలాచోట్ల ఆశావహులు పోటాపోటీగా నామినేషన్లు దాఖలు చేశారు. వీరిలో ఎవరికి వారు పార్టీల మద్దతు తమకే ఉందని ప్రకటించుకుంటున్నారు. కాంగ్రెస్‌, బీఆర్‌ఎస్‌లో పోటీ ఎక్కువగా ఉండడంతో బలమైన అభ్యర్థిని బరిలో నిలిపి, మిగిలిన వారితో నామినేషన్‌ ఉపసంహరించేలా ఆయా పార్టీల నేతలు చర్చలు జరుపుతున్నారు. ఈ విషయమై వ్యక్తిగత సర్వేలతో పాటు స్థానికంగా పట్టు ఉన్న నేతల గుర్తించి వారినే బరిలో మిగల్చడంతో పాటు ఇతరులను బుజ్జగించడంపై దృష్టి సారించారు.

రెండో విడత జీపీ ఎన్నికల ప్రక్రియ ఆదివారం మొదలుకానుంది. కామేపల్లి, ఖమ్మంరూరల్‌, కూసుమంచి, ముదిగొండ, నేలకొండపల్లి, తిరుమలాయపాలెం మండలాల్లోని 183గ్రామపంచాయతీలు, 1,686 వార్డుల్లో ఈ దఫా ఎన్నికలు జరుగుతాయి. ఆదివారం నుంచి వచ్చేనెల 2వ తేదీ వరకు నామినేషన్ల దాఖలుకు అవకాశం ఉండగా, 14వ తేదీన పోలింగ్‌ జరగనుంది.

మొదటి విడత ఎన్నికలకు ముగిసిన నామినేషన్ల స్వీకరణ