అటు నగదు.. ఇటు వేట

● సిబ్బందికి ఆన్‌లైన్‌లో నగదు జమ ● ఆ తర్వాత పని కానిచ్చేసిన వేటగాళ్లు ● ఓ మాజీ ప్రజాప్రతినిధి బంధువుపై అనుమానాలు

సత్తుపల్లి: సత్తుపల్లి అర్బన్‌పార్కులో స్వేచ్ఛగా విహరిస్తున్న దుప్పులను వేటాడిన వ్యక్తిని గుర్తించేందుకు అటవీశాఖ అధికారులు విచారణ వేగవంతం చేశారు. ఈ విషయమై ‘సాక్షి’లో శనివారం ‘తూటా దూసుకెళ్తోంది...’ శీర్షికన కథనం రావడంతో అటవీశాఖలో కలవరం మొదలైంది. దుప్పులను వేటాడిన వారిని గుర్తించేందుకు మూడు రోజులుగా గాలిస్తున్న అధికారులు విచారణలో వేగం పెంచారు. ఇటీవల ఐదు జీవాలను వేటాడినట్లు ఫిర్యాదు అందడంతో గతంలోనూ వేట జరిగిందా అన్న కోణంలో ఆరా తీస్తున్నారు. కాగా, పార్క్‌లో విధులు నిర్వర్తించే ఒకరిద్దరు సిబ్బందిని మచ్చిక చేసుకున్న వేటగాళ్లు వారికి ఆన్‌లైన్‌లో నగదు జమ చేసి ఆతర్వాత రంగంలోకి దిగినట్లు ప్రచారం జరుగుతోంది. దీంతో సదరు సిబ్బంది బ్యాంకు లావాదేవీలపై అధికారులు ఆరా తీస్తున్నట్లు సమాచారం.

ఆ ఇద్దరు.. విధులకు డుమ్మా

దుప్పుల వేట అంశంపై డీఎఫ్‌ఓ సిద్ధార్థ విక్రమ్‌సింగ్‌ ఆదేశాలతో ఎఫ్‌డీఓ వాడపల్లి మంజుల పర్యవేక్షణలో రేంజర్లు స్నేహలత, శ్రీనివాసరావుతో కూడిన బృందం విచారిస్తోంది. వేటగాళ్లకు అటవీశాఖ నుంచి ఎవరు సహకరించారనే కోణంలో రెగ్యులర్‌ ఉద్యోగులు మొదలు ఔట్‌సోర్సింగ్‌ సిబ్బందిని కూడా ప్రశ్నిస్తున్నారు. ఈక్రమంలోనే అనుమానం ఉన్న ఒక కాంట్రాక్టు ఉద్యోగి రెండు రోజులుగా విధులకు గైర్హాజరు కావడం గమనార్హం. ఇక శనివారం మధ్యాహ్నం వరకు విధుల్లో ఉన్న ఇంకో ఉద్యోగి ఆ తర్వాత వెళ్లిపోవడం, వీరిద్దరి సెల్‌ఫోన్లు స్విచాప్‌ వస్తుండడంతో అన్ని వేళ్లు వీరివైపే చూపిస్తున్నాయి. కాగా, అర్బన్‌ పార్క్‌ ఎంట్రన్స్‌ నుంచి మూడువైపులా నాలుగు సీసీ కెమెరాలను అమర్చారు. కానీ అవి తరచూ మొరాయిస్తుండడంతో వేటగాళ్లు తమ పని చక్కబెట్టుకున్నారని తెలుస్తోంది. వేటగాళ్లు ఎత్తు తక్కువగా ఉన్న ప్రహారీ దూకి వచ్చి ఉండొచ్చని అధికారులకు ఇక్కడి సిబ్బంది భ్రమ కల్పించి.. సీసీ కెమెరాల లోపాలతో ముందు భాగం నుంచే రాకపోకలకు అనుమతించినట్లు సమాచారం.

షార్ప్‌ షూటర్‌ పనేనా?

సత్తుపల్లికి సమీపాన ఉండే ఓ నియోజకవర్గ మాజీ ప్రజాప్రతినిధి సమీప బంధువుకు ఈ ప్రాంతంలోనే షార్ప్‌ షూటర్‌గా పేరు ఉందని సమాచారం. ఆయనతో పాటు సత్తుపల్లి, దమ్మపేట, అశ్వారావుపేట తదితర మండలాల్లో వేటాడే నైపుణ్యం ఉన్న వ్యక్తుల జాబితాపై అధికారులు ఆరా తీస్తున్నట్లు తెలిసింది. అంతేకాక లైసెన్స్‌డ్‌ గన్లు ఎవరి వద్ద ఉన్నాయనే వివరాల కోసం పోలీసుల సహకారాన్ని తీసుకుంటున్నారు. రెండు, మూడు నెలలుగా సదరు వ్యక్తుల కుటుంబాల్లో వేడుకలు జరిగాయా, అక్కడ వన్యప్రాణుల మాంసం వడ్డించారా, ఆ వేడుకలకు ఎవరెవరు హాజరయ్యారనే కోణంలో విచారణను ముమ్మరం చేశారు. కాగా, వేట అంశంపై భద్రాద్రి జోన్‌ సీసీఎఫ్‌(చీఫ్‌ కన్జర్వేటర్‌ ఆఫ్‌ ఫారెస్ట్‌) బీమానాయక్‌ ఖమ్మం డీఎఫ్‌ఓ సిద్ధార్థ విక్రమ్‌సింగ్‌తో మాట్లాడి సమగ్ర విచారణ చేపట్టాలని ఆదేశించినట్లు తెలిసింది.