ఆ జీపీలు.. ఏకగ్రీవం!

● పలు గ్రామపంచాయతీల్లో సర్పంచ్‌ పదవికి సింగిల్‌ నామినేషన్‌! ● ఇప్పటివరకు ఆరు.. ఇంకా పెరిగే అవకాశం ● కొన్నిచోట్ల వార్డులకూ కూడా ఒక్కొక్కటే..

సాక్షిప్రతినిధి, ఖమ్మం: మొదటి విడత గ్రామపంచాయతీ ఎన్నికలకు నామినేషన్లు సమర్పించే గడువు శనివారం ముగియగా.. కొన్నిచోట్ల సర్పంచ్‌ పదవుల ఏకగ్రీవం లాంఛనమైంది. ఆయా జీపీల్లో సర్పంచ్‌లుగా ఒక్కొక్కరే నామినేషన్‌ దాఖలు చేయగా, కొన్నిచోట్ల వార్డులకు కూడా ఒక్కో నామినేషనే అందింది. తొలి దఫా 192పంచాయతీలకు ఎన్నికలు జరగనుండగా కొన్నిచోట్ల సర్పంచ్‌ స్థానానికి ఏకగ్రీవం కోసం ఒప్పందాలు చేసుకున్నారు. ఇంకొన్ని చోట్ల గ్రామస్తులు స్వచ్ఛందంగా ముందుకొచ్చినట్లు తెలిసింది. అయితే, ఏకగ్రీవాన్ని అధికారికంగా ప్రకటించాల్సి ఉంది. ఇంకొన్ని చోట్ల చర్చల దశలో ఉండడంతో నామినేషన్ల ఉపసంహరణ నాటికి ఏకగ్రీవ జీపీల సంఖ్య పెరుగుతుందని భావిస్తున్నారు.