ప్రజావాణి రద్దు

భువనగిరిటౌన్‌ : కలెక్టరేట్‌లో ప్రతి సోమవారం నిర్వహించే ప్రజావాణి కార్యక్రమాన్ని రద్దు చేసినట్లు కలెక్టర్‌ హనుమంతరావు శనివారం ఒక ప్రకటనలో తెలిపారు. పంచాయతీ ఎన్నికల కోడ్‌ అమల్లో ఉన్న దష్ట్యా నిబంధనల మేరకు ఈ నిర్ణయం తీసుకున్నట్లు వెల్లడించారు. డిసెంబర్‌ 17 వరకు కోడ్‌ అమల్లో ఉంటుందని, ప్రజలు గమనించి అధికారులకు సహకరించాలని కోరారు.

రెండు తండాలు..

ఒక్కో నామినేషన్‌

బొమ్మలరామారం : మండలంలోని లక్ష్మీతండా, రామస్వామి తండాల్లో సర్పంచ్‌ పదవులకు ఒక్కో నామినేషన్‌ మాత్రమే దాఖలయ్యాయి. లక్ష్మీతండా సర్పంచ్‌ అభ్యర్థిగా దీరావత్‌ భిక్షపతి , రామస్వామితండా సర్పంచ్‌ అభ్యర్థిగా దీరావత్‌ సునీత నామినేషన్‌ వేశారు. వీరి నామినేషన్లలో అన్నీ సవ్యంగా ఉంటే వారిద్దరూ ఏకగ్రీవం కానున్నారు. అదే విధంగా లక్ష్మీతండాలో 8 వార్డుకు, రామస్వామి తండాలోని 6 వార్డులకు గాను ఒక్కో నామినేషన్‌ మాత్రమే వచ్చింది. వార్డు సభ్యుల స్థానాలు కూడా ఏకగ్రీవం కానున్నాయి.

21న లోక్‌ అదాలత్‌

భువనగిరిటౌన్‌ : డిసెంబర్‌ 21న నిర్వహించే జాతీయ లోక్‌ అదాలత్‌లో ఎక్కువ కేసులు పరిష్కారం అయ్యేలా న్యాయవాదులు, పోలీస్‌ అధికారులు చొరవ చూపాలని జిల్లా న్యాయసేవ అధికారి సంస్థ కార్యదర్శి, జడ్జి మాధవిలత కోరారు. జిల్లా ప్రధాన న్యాయమూర్తి జయరాజు సూచనల మేరకు మొదటి అదనపు జిల్లా న్యాయమూర్తి ముక్తిదాతో కలిసి జిల్లాలోని ఏసీపీలతో వర్చువల్‌గా సమావేశం నిర్వహించారు. ఈ సందర్భంగా ఆమె మాట్లాడుతూ.. రాజీపడదగిన కేసులను గుర్తించడంతో పాటు కక్షిదారులు రాజమార్గం అనుసరించేలా కృషి చేయాలని పేర్కొన్నారు. లోక్‌అదాలత్‌పై అవగాహన కల్పించాలని సూచించారు.

నామినేషన్ల పరిశీలన

తుర్కపల్లి: మండలంలోని మాదాపురంలో నామినేషన్ల ప్రక్రియను శనివారం జిల్లా ఎన్నికల అధికారి, కలెక్టర్‌ హనుమంతురావు పరిశీలించారు. మూడు రోజుల్లో మొత్తం దాఖలైన నామినేషన్ల వివరాలు తెలుసుకున్నారు. ఎన్నికల సిబ్బందికి సూచనలు చేశారు. ప్రశాంతమైన వాతావరణంలో ఎన్నికలు జరిగేలా ప్రతి ఒక్కరూ కృషి చేయాలని పేర్కొన్నారు.

గిరి ప్రదక్షిణను విజయవంతం చేయాలి

యాదగిరిగుట్ట: రాష్ట్రంలో అయ్యప్ప మాల ధరించిన భక్తుల కోసం యాదగిరిగుట్ట దేవస్థానం డిసెంబర్‌ 1న ప్రత్యేకంగా గిరిప్రదక్షిణ నిర్వహించనుందని ఆలయ ఈఓ వెంకట్రావ్‌, అయ్యప్ప సేవా సమితి నిర్వాహకులు శనివారం వేర్వేరు ప్రకటనల్లో తెలిపారు. ఉదయం 5గంటలకు యాదగిరి కొండ చుట్టూ ప్రదక్షిణ ప్రారంభం అవుతుందన్నారు. గిరి ప్రదక్షిణ అనంతరం నేరుగా వెళ్లి కొండపైన శ్రీస్వామి వారిని దర్శించుకునే అవకాశం కల్పించినట్లు వెల్లడించారు. అయ్యప్ప మాలధారులు గిరి ప్రదక్షిణలో పాల్గొని, శ్రీస్వామి వారి ఆశీస్సులు పొందాలన్నారు.

‘ప్రీ ప్రైమరీ’ బలోపేతంలో బోధకుల పాత్ర కీలకం

భువనగిరి : ప్రీ ప్రైమరీ పాఠశాలలను బలోపేతం చేయడంలో బోధకుల పాత్ర కీలకమని డీఈఓ సత్యనారాయణ పేర్కొన్నారు. ప్రీ ప్రైమరీ పాఠశాలల్లోని బోధకులకు భువనగిరిలోని బీచ్‌ మహల్లా ప్రభుత్వ ఉన్నత పాఠశాలలో ఐదు రోజులుగా నిర్వహిస్తున్న శిక్షణ తరగతులు శనివారం ముగిశాయి. ముగింపు కార్యక్రమానికి ఆయన హాజరై మాట్లాడారు. శిక్షణ తరగతుల్లోని అంశాలను ఓపిక, సహనంతో చిన్నారులకు నేర్పించాలన్నారు. ఏఎంఓ జాని అఫ్ఘని, జిల్లా రిసోర్స్‌ పర్సన్లు జ్యోతిర్మయి, కృష్ణవేణి, భిక్షమయ్య, రహీం పాల్గొన్నారు.

ప్రజావాణి రద్దు