కరపత్రం.. ‘మీకోసం’!

రైతు సంక్షేమమే లక్ష్యమని చంద్రబాబు ఆర్భాటంగా ప్రకటిస్తుంటారు. వ్యవసాయం దండగంటూ మనసులో మాటను అమలు చేస్తుంటారు. ఇదిగో పథకం అని ఊరిస్తుంటారు. ఆంక్షలు విధించి ఉస్సూరుమనిపిస్తుంటారు. అన్నదాతల మనోభావాలతో ఆడుకుంటూ అణగదొక్కుతుంటారు. అందులో భాగంగానే రైతన్నా.. మీకోసం అంటూ మరో మాయదారి కార్యక్రమం ప్రారంభించారు. సమస్యలన్నీ పరిష్కరిస్తామని కాకమ్మ కబుర్లు చెప్పారు. క్షేత్రస్థాయిలో మాత్రం కర్షకులకు కరపత్రం అందించి చేతులు దులిపేసుకున్నారు. ఇదే బాటలో అధికారులు సైతం రైతులతో ఫొటోలు తీసుకుని సరిపెట్టేశారు. ఘనత వహించిన బాబుగారి సేవలను భజన చేసి ముఖం తప్పించేశారు.

తిరుపతి అర్బన్‌ : అన్నదాతల అగచాట్లు తీర్చడమే లక్ష్యమని చంద్రబాబు ప్రభుత్వం గొప్పగా ప్రకటించుకుంది. అందులో భాగంగా రైతన్నా.. మీకోసం పేరుతో విశిష్ట కార్యక్రమం చేపట్టినట్లు వెల్లడించింది. ఈ మేరకు ఈ నెల 24 నుంచి 29వ తేదీ వరకు క్షేత్రస్థాయిలో రైతుల సమస్యలు తెలుసుకుని, వెంటనే పరిష్కరించాలని ఆదేశాలు జారీ చేసింది. అయితే సర్కారుకు చిత్తశుద్ధి లేకపోవడంతో అధికారులు సైతం తూతూమంత్రంగానే రైతన్నా.. మీకోసం కార్యక్రమాన్ని నిర్వహించారు. అగ్రికల్చర్‌ అధికారులు జిల్లావ్యాప్తంగా సుమారు 1.55లక్షల రైతు కుటుంబాలను కలిశారు. దాదాపు 3.12 లక్షల కరపత్రాలను పంపిణి చేశారు. రైతులతో ఫొటోలు తీసుకుని కార్యక్రమాన్ని ముగించేశారు. పథకాలు అందాయా అని ఒక్కరినీ అడగ లేదు. ఏమైనా సమస్యలు ఉన్నాయా అని ఆరా తీయలేదు. ఎవరైనా సమస్యను ప్రస్తావిస్తే పరిష్కరించిందీ లేదు. ఈ క్రమంలో చంద్రబాబు ప్రభుత్వంపై అన్నదాతలు రగిలిపోతున్నారు. రైతన్నా.. మీకోసం అంటే ఇలా కరపత్రాలు చేతిలో పెట్టడమా అని ఆవేదన వ్యక్తం చేస్తున్నారు. చంద్రబాబు గొప్పలు చెప్పేందుకేనా అధికారులు వచ్చింది అని ప్రశ్నిస్తున్నారు. ఈ మేరకు కొన్నిచోట్ల అధికారులను నిలదీశారు.