86 మందికి జరిమానా

తిరుపతి లీగల్‌: మద్యం తాగి తిరుపతిలో వాహనాలు నిర్లక్ష్యంగా నడుపుతున్న 37 మందికి ఒక్కొక్కరికీ రూ.10వేల చొప్పున జరిమానా విధిస్తూ తిరుపతి మూడవ అదనపు జూనియర్‌ జడ్జి సంధ్యారాణి శనివారం తీర్పు చెప్పారు. అలాగే నగరంలో ట్రాఫిక్‌కు అంతరాయం కలిగిస్తున్న 49 మందికి ఒక్కొక్కరికీ రూ.500 చొప్పున జరిమానా విధించారు. తిరుపతి ట్రాఫిక్‌ పోలీసులు నగరంలో తనిఖీలు నిర్వహించి నేరాలకు పాల్పడుతున్న వారిపై కేసులు నమోదు చేసి కోర్టులో హాజరపరిచారు.

ఎస్వీయూతో ఎస్‌ఆర్‌ఎం అవగాహన ఒప్పదం

తిరుపతి సిటీ: ఎస్వీయూ, ఎస్‌ఆర్‌ఎం వర్సిటీల మధ్య కీలక ఒప్పదం కుదిరింది. ఎస్వీయూలో శనివారం వీసీ టాటా నర్సింగరావు, ఎస్‌ఆర్‌ఎం అధికారులు ఒప్పందపు పత్రాలను మార్చుకున్నారు. ఎస్వీయూ వీసీ మాట్లాడుతూ డీప్‌ టెక్‌ రంగాలలో జాతీయ పురోగతిని వేగవంతం చేసేందుకు, సూపర్‌ కంప్యూటింగ్‌, క్వాంటం క్విట్‌లు, క్వాంటం కంప్యూటింగ్‌, క్వాంటం నావిగేషన్‌, థిన్‌–ఫిల్మ్‌ టెక్నాలజీలు, డైమండ్‌ థిన్‌–ఫిల్మ్‌ పరిశోధన, సముద్రపు నీటి విద్యుద్విశ్లేషణ, గ్రీన్‌ హైడ్రోజన్‌, హైడ్రోజన్‌ నిల్వ, హైడ్రోజన్‌–శక్తితో కూడిన డేటా సెంటర్‌లతో సహా క్లీన్‌–ఎనర్జీ పరిష్కారాలు వంటి అంశాలపై ఎస్‌ఆర్‌ఎం వర్సిటీతో ఒప్పందం కుదుర్చుకున్నామని తెలిపారు. కార్యక్రమంలో ఎస్‌ఆర్‌ఎం వీసీ ఆచార్య సతీష్‌ కుమార్‌, ఎస్వీయూ రెక్టార్‌ అప్పారావు పాల్గొన్నారు

జేసీబీ..

నాలుగు ట్రాక్టర్లు సీజ్‌

శ్రీకాళహస్తి: శ్రీకాళహస్తీశ్వరాలయ సమీపంలో ఎంజీఎం హోటల్‌ వెనుక శుక్రవారం అర్ధరాత్రి అక్రమంగా ఇసుక తవ్వుతున్న జేసీబీ, నాలుగు ట్రాక్టర్లను పోలీసులు సీజ్‌ చేశారు. స్థానికులు గుర్తించి డయల్‌ 100కు సమాచారం ఇవ్వడంతో వారు ఘటనా స్థలానికి చేరుకున్నారు. అధికార పార్టీ నాయకులకు చెందిన వాహనాలు కావడంతో ఆ విషయాన్ని పోలీసులు గోప్యంగా ఉంచారు. అనంతరం పట్టుబడ్డ వారిని తహసీల్దార్‌ ముందు హాజరు పరిచి, నామమాత్రపు ఫైన్‌తో విడుదల చేసినట్టు సమాచారం.

ఒకటిన్నర ఏడాదిగా ఇదే తంతు

బాబు ప్రభుత్వం వచ్చాక ఇసుకాసురలు చెలరేగిపోతున్నారు. ఒకటిన్నర సంవత్సరంగా ఇష్టారాజ్యంగా ఇసుక తవ్వేస్తూ జేబులు నింపుకుంటున్నారు. పోలీసులకు పట్టుబడ్డా నామమాత్రపు ఫైన్‌తో బయటకు వస్తున్నారు. దీంతో మళ్లీ ఇసుక అక్రమ రవాణాకు పూనుకుంటున్నారు. దీనిపై కలెక్టర్‌ దృష్టిసారించాలని స్థానికులు కోరుతున్నారు.

కలంకారీ కళాకారుడి మృతి

శ్రీకాళహస్తి: పట్టణానికి చెందిన కలంకారీ కళాకారుడు ఆవులకొండ విజయకుమార్‌ (72) అనారోగ్యంతో శనివారం మృతి చెందారు. సుమారు 20 ఏళ్లపాటు చైన్నె మ్యూజియంలోని సాంప్రదాయ కలంకారి ఆర్ట్‌ శిక్షణాలయంలో ఇన్‌స్ట్రక్టర్‌గా పనిచేశారు. దాదాపు 3వేల మందికి పైగా విద్యార్థులకు కలంకారీ శిక్షణ అందించారు. చైన్నెలోని కళాక్షేత్రలో ఇప్పటికీ ఆయన రూపొందించిన కలంకారీ చిత్రాలు ప్రదర్శనలో ఉన్నాయి.

86 మందికి జరిమానా