పారదర్శకంగా రుణాల మంజూరు

తిరుపతి అర్బన్‌ : పొదుపు మహిళలకు పారదర్శకంగా రుణాలు మంజూరు చేయాలని డీఆర్‌డీఏ ప్రాజెక్టు డైరెక్టర్‌ టీఎన్‌ శోభనబాబు ఆదేశించారు. శనివారం తిరుపతి డీఆర్‌డీఏ కార్యాలయంలో జిల్లా సమాఖ్య సమావేశం నిర్వహించారు. పీడీ మాట్లాడుతూ సీఆర్పీలు బాధ్యతగా పనిచేయాలని కోరారు. చిరువ్యాపారం చేస్తున్న మహిళలు రుణం పొందేందుకు దరఖాస్తు విధానాలను వివరించారు. రుణ మంజూరుకు బ్యాంక్‌లో సమస్యలు ఉంటే తమ దృష్టికి తీసుకురావాలని సూచించారు. సమావేశంలో ఏపీడీ ప్రభావతి, డీపీఎం వెంకటేష్‌ పాల్గొన్నారు. అలాగే తిరుపతి డీఆర్‌డీఏ కార్యాలయంలో శనివారం ఎన్‌జీఓల భాగస్వామ్యంతో రైతు సంఘాలను బలోపేతం చేసేందుకు చేపట్టాల్సిన అంశాలపై సమీక్షించారు. జిల్లాలోని ఏపీఎం, సీసీ, బోర్డ్‌ ఆఫ్‌ డైరెక్టర్లకు వర్క్‌ షాపు నిర్వహించారు. పీడీ శోభనబాబు మాట్లాడుతూ రైతు ఉత్పత్తిదారుల సంఘాల అభివృద్ధికి అందిస్తున్న విత్తనాలు, ఎరువులు, ఇతర రాయితీలను వివరించారు. వాటిని సద్వినియోగం చేసుకోవాలని సూచించారు. కార్యక్రమంలో విజయలక్ష్మి, సుధాకర్‌, ప్రభావతి, ద్రాక్షాయణి పాల్గొన్నారు. అనంతరం పొదుపు సంఘాల వ్యాపారాలకు సంబంధించిన పోస్టర్‌ ఆవిష్కరించారు.