చిరు వ్యాపారం.. దృఢ సంకల్పం

కోల్‌సిటీ(రామగుండం): పెద్దపల్లి జిల్లా రామగుండం నగరపాలక సంస్థ పరిధిలోని అల్లూరు ప్రాంతానికి చెందిన సామాన్య గృహిణి, చిన్న కిరాణంతో జీవనం మొదలుపెట్టింది బాలసాని నిర్మల. ఆమె దృఢసంకల్పానికి అబ్బురపడిన కేంద్రప్రభుత్వం ఆమెకు అరుదైన గౌరవం ఇచ్చింది. వచ్చేఏడాది జనవరి 26న న్యూఢిల్లీలో జరిగే గణతంత్ర వేడుకల్లో పాల్గొనడానికి ఆహ్వానం పంపించింది. ఈ వేడుకల్లో నిర్మల తన భర్త బాలసాని రవికుమార్‌గౌడ్‌తో కలిసి పాల్గొనడానికి ప్రభుత్వం తరఫున ఆహ్వానిస్తూ మెప్మా, మిషన్‌ డైరెక్టర్‌ అధికారికంగా సమాచారం అందించారు.

అభినందించిన బల్దియా కమిషనర్‌

చిరు వ్యాపారి బాలసాని నిర్మలకు ప్రభుత్వం తరఫున ఆహ్వానం రావడంపై రామగుండం నగరపాలక సంస్థ కమిషనర్‌ జల్దా అరుణశ్రీ అభినందనలు తెలిపారు. ఈ మేరకు శనివారం తన చాంబర్‌కు నిర్మలను పిలిపించుకుని శాలువా కప్పి అభినందనలు తెలిపారు. చిరువ్యాపారులు కష్టపడితే ఎలాంటి శిఖరాన్నైనా అధిరోహించవచ్చని నిర్మల నిరూపించారని కమిషనర్‌ ప్రశంసించారు.

స్వనిధి రుణంతో నవచైతన్యం..

నిర్మల నవచైతన్యం –2020లో పీఎం స్వనిధి పథకంలో మొదలయ్యింది. తొలి విడతగా రూ.10వేలు రుణం పొందిన నిర్మల.. ఇంట్లో కిరాణం ప్రారంభించారు. క్రమశిక్షణగా రుణ వాయిదాలు చెల్లించడంతో ప్రభుత్వం రెండోవిడతగా రూ.20వేలు మంజూరు చేయగా, కిరాణంతోపాటు చీరల వ్యా పారం కూడా ప్రారంభించి సక్సెస్‌ అయ్యారు. వ్యా పారం విజయవంతంగా సాగడంతో ఇటీవల మూ డోవిడతగా రూ.50వేల రుణం కూడా పొందారు. చిన్న వ్యాపారిగా పట్టుదలతో ముందుకు సాగిన నిర్మల, నగరపాలక సంస్థలో ఆదర్శంగా నిలిచారు.

క్యాష్‌లెస్‌ లావాదేవీల్లో రికార్డు..

ప్రభుత్వం ప్రోత్సహిస్తున్న డిజిటల్‌ చెల్లింపులపై నిర్మల ప్రత్యేక శ్రద్ధ పెట్టారు. నగదు రహిత లావాదేవీలు నిర్వహించిన వీధి వ్యాపారులకు ప్రభుత్వం అందించిన క్యాష్‌ బ్యాక్‌ ప్రోత్సాహకాన్ని కూడా ని ర్మల సద్వినియోగం చేసుకుంటున్నారు. అత్యధికంగా రూ.5,340 క్యాష్‌ బ్యాక్‌ సంపాదించి ప్రత్యేక గుర్తింపు తెచ్చుకున్నారు.

న్యూఢిల్లీ నుంచి ఆహ్వానం..

కుటుంబానికి గర్వకారణం

నిర్మల ప్రయాణం, పట్టుదల, వ్యాపార వృద్ధిని పరిగణనలోకి తీసుకున్న మెప్మా, మిషన్‌ డైరెక్టర్‌.. న్యూఢిల్లో వచ్చే జనవరిలో జరిగే గణతంత్ర వేడుకలకు నిర్మల దంపతులకు ఆహ్వానం పంపచిన్నవ్యాపారికి కేంద్రస్థాయి గుర్తింపు దక్కడంపై స్థానిక ప్రజల్లో హర్షం వ్యక్తమవుతోంది. అల్లూరు గ్రామం నుంచి న్యూఢిల్లీ రాజ్‌పథ్‌ వరకూ నిర్మల చేసిన చిరువ్యాపార ప్రయాణం ఎన్నో చిరు వ్యాపారులకు స్ఫూర్తి నింపుతోంది.