తెలంగాణను తీర్చిదిద్దిన శిల్పి కేసీఆర్‌

బాన్సువాడ : తెలంగాణ ఖ్యాతిని తీర్చిదిద్దిన శిల్పి మాజీ సీఎం కేసీఆర్‌ అని మాజీ ఎమ్మెల్యే బాజిరెడ్డి గోవర్ధన్‌ అభివర్ణించాడు. శనివారం బాన్సువాడలో దీక్ష దివాస్‌ కార్యక్రమానికి ఆయన హాజరయ్యారు. ముందుగా సోమేశ్వర్‌ నుంచి బాన్సువాడ వరకు భారీ ర్యాలీ నిర్వహించారు. కొయ్యగుట్ట వద్ద ఉన్న అమరవీరుల స్థూపం వద్ద నివాళులు అర్పించారు. పట్టణంలో ప్రొఫెసర్‌ జయశంకర్‌ విగ్రహానికి పూలమాల వేసి నినాదాలు చేశారు. అంబేడ్కర్‌ విగ్రహానికి పూల మాల వేశారు. ఈ సందర్భంగా దీక్ష దివాస్‌లో ప్రసంగించారు. ప్రత్యేక రాష్ట్ర సాధన కోసం 1969 నుంచి ఉద్యమం చేస్తే అప్పటి కాంగ్రెస్‌ ప్రభుత్వం 100 యువకులను బలితీసుకున్నారని అన్నారు. 2001లో టీఆర్‌ఎస్‌ అవిర్బవించినప్పటి నుంచి కేసీఆర్‌ తెలంగాణ కోసం ప్రాణ త్యాగానికై న సిద్ధమయ్యాయరన్నారు. 11 రోజుల పాటు నిరాహార దీక్ష చేస్తే కేసీఆర్‌ శక్తి చూసి ప్రతిపక్షాల మద్దతుతో తెలంగాణ సాధించుకున్నామన్నారు. కేసీఆర్‌ సీఎం అయ్యాక పింఛన్లు, కల్యాణలక్ష్మి, రైతు బంధు, రైతు బీమా తదితర సంక్షేమ పథకాలు అమలు చేశారని గుర్తు చేశారు. కేసీఆర్‌ బాన్సువాడకు అధిక నిధులు ఇచ్చినా కాంగ్రెస్‌ పార్టీ అధికారంలోకి రాగానే పోచారం పార్టీ మారరని విమర్శించారు. ప్రస్తుతం వ్యవసాయ సలహాదారులుగా ఉన్న పోచారం సీఎం రేవంత్‌రెడ్డికి వ్యవసాయంపై ఏం సలహాలు ఇచ్చారో చెప్పాలని డిమాండ్‌ చేశారు. వచ్చే స్థానిక ఎన్నికల్లో బీఆర్‌ఎస్‌ అభ్యర్థుల గెలుపునకు ప్రతి కార్యకర్త కృషి చేయాలన్నారు. అనంతరం మలిదశ ఉద్యమకారులను ఆయన సన్మానించారు.

● కాంగ్రెస్‌ పార్టీ అధికారంలోకి

రాగానే పోచారం పార్టీ మారారు

● దీక్ష దివాస్‌లో మాజీ ఎమ్మెల్యే

బాజిరెడ్డి గోవర్ధన్‌