విహార యాత్రలో విషాదం

సదాశివనగర్‌(ఎల్లారెడ్డి): కామారెడ్డి జిల్లా సదాశివనగర్‌ ఉన్నత పాఠశాల ప్రధానోపాధ్యాయుడు దామోదర్‌రెడ్డి విహారయాత్రలో ఉండగా శనివారం తెల్లవారుజామున గుండెపోటుతో మృతి చెందాడు. ఈనెల 27న విద్యార్థులతో కలిసి ఆయన విహారయాత్రకు బయలుదేరారు. యాత్రలో భాగంగా శుక్రవారం రాత్రి భద్రాచలం చేరుకున్నారు. అందరూ భోజనం చేసి నిద్రకు ఉపక్రమించారు. ప్రధానోపాధ్యాయుడు రాత్రి 11 గంటల వరకు తమతో ముచ్చటించినట్లు విద్యార్థులు పేర్కొన్నారు. తెల్లవారుజామున నిద్ర నుంచి సార్‌ లేవడం లేదని తోటి ఉపాధ్యాయులు దగ్గరికి వెళ్లి చూడగా అప్పటికే మృతి చెంది ఉన్నట్లు పేర్కొన్నారు. వారు వెంటనే కుటుంబీకులకు సమాచారం అందించారు. దామోదర్‌ రెడ్డి రెండున్నర ఏళ్ల క్రితం బదిలీపై సదాశివనగర్‌ ఉన్నత పాఠశాలకు వచ్చాడు. అందరితో కలుపుగోలుగా ఉండే ప్రధానోపాధ్యాయుడు అకస్మాత్తుగా గుండెపోటుకు గురికావడంతో విషాదఛాయలు అలుముకున్నాయి. నేడు (నవంబర్‌ 30) పదవీవిరమణ పొందనున్న నేపథ్యంలో ఈ ఘటన చోటు చేసుకోవడం అందరి మనస్సులను కలచివేసింది. విద్యార్థులు దు:ఖసాగరంలో మునిగారు. మృతుని భార్య కూడా ఇటీవల ప్రధానోపాధ్యాయురాలుగా బాధ్యతలు చేపట్టి పదవీవిరమణ పొందినట్లు పేర్కొన్నారు. మృతునికి కూతురు,కుమారుడు ఉన్నారు. మృతుని స్వగ్రామం బస్వాపూర్‌, కానీ ప్రస్తుతం కామారెడ్డిలో నివాసం ఉంటున్నారు.

● నిద్రలోనే గుండెపోటుకు గురై

ప్రధానోపాధ్యాయుడు మృతి

● గుండెలు బాదుకున్న విద్యార్థులు

● నేటితో ముగియనున్న సర్వీస్‌