ఒక్కో పార్టీ.. ఒక్కో తీరు..

మోర్తాడ్‌: బాల్కొండ నియోజకవర్గంలోని వివిధ గ్రామాలలో సర్పంచ్‌, వార్డు సభ్యుల స్థానాలకు పోటీ చేసే అభ్యర్థులను ఎంపిక చేయడానికి మూడు ప్రధాన పార్టీలు ఒక్కో మార్గంను ఎంచుకున్నాయి. బాల్కొండ నియోజకవర్గంలో పట్టు నిలుపుకున్న బీఆర్‌ఎస్‌ పంచాయతీ ఎన్నికల్లోనూ సత్తా చాటాలని భావిస్తోంది. ఇందుకోసం సర్పంచ్‌ అభ్యర్థుల ఎంపిక కోసం తీవ్రంగా కసరత్తు చేస్తున్నారు. ఈ నియోజకవర్గంలో మూడో విడతలోనే ఎన్నికలు కొనసాగనున్నాయి. నామినేషన్లకు ఇంకా సమయం ఉన్నా అభ్యర్థుల ఎంపికలో బీఆర్‌ఎస్‌ పార్టీ నేతలు ఆచితూచి అడుగు వేస్తున్నారు. 2019 ఎన్నికల్లో మెజార్టీ గ్రామాలలో బీఆర్‌ఎస్‌ బలపరిచిన అభ్యర్థులు కాకుండా కాంగ్రెస్‌, బీజేపీ బలపరిచిన అభ్యర్థులే గెలుపొందారు. అప్పటి తప్పిదాలను దృష్టిలో ఉంచుకుని ఈసారి అలాంటి పరిస్థితి పునరావృతం కాకుండా ఉండటానికి అభ్యర్థుల ఎంపికను సీరియస్‌గా తీసుకున్నారు. ఎనిమిది మండలాల్లో పార్టీ మండల అధ్యక్షులు, ఇతర నాయకులు కలిసి అన్ని గ్రామాలలో తిరిగి ఆశావహుల పేర్లను నమోదు చేసుకున్నారు. ఒక్కో గ్రామంలో ఇద్దరు కంటే ఎక్కువ మంది బీఆర్‌ఎస్‌ మద్దతుతో పోటీ చేయాలని ఆసక్తి ఉంటే వారి పేర్లు ఎమ్మెల్యే ప్రశాంత్‌రెడ్డికి చేరవేశారు. గతంలో పోటీ చేసి ఓటమిపాలైవారు, ఇప్పుడు గెలిచే అవకాశం ఉందా లేదా అనే కోణంలో పరిశీలన చేస్తున్నారు. ఎమ్మెల్యే ప్రశాంత్‌రెడ్డి సూచించిన వారే ఆయా గ్రామాలలో బీఆర్‌ఎస్‌ మద్దతుతో బరిలో నిలిచే అవకాశం కనిపిస్తుంది.

కాంగ్రెస్‌ పార్టీ నియోజకవర్గ ఇన్‌చార్జి ముత్యాల సునీల్‌రెడ్డి, ఇతర నేతలు కలిసి ప్రతి మండలానికి ఐదుగురు సభ్యుల బృందాన్ని నియమించారు. ఈ కమిటీ ఆశావహుల పేర్లను నమోదు చేసుకుని వారి బలాబలాలు ఎలా ఉన్నాయో ఒక నివేదికను తయారు చేశారు. గతంలో బీఆర్‌ఎస్‌ ప్రభుత్వం అధికారంలో ఉన్నా కాంగ్రెస్‌ మద్దతుదారులే ఎక్కువ గ్రామాలలో సర్పంచ్‌లుగా గెలుపొందారు. స్థానిక సంస్థల్లో పార్టీకి ఉన్న బలాన్ని దృష్టిలో ఉంచుకుని ఈసారి కూడా తమ బలం నిలుపుకోవాలని ఆ పార్టీ నాయకులు భావిస్తున్నారు. అందుకే సర్పంచ్‌ పదవులను గెలుపొందాలంటే బలమైన నాయకులను ఎంపిక చేయడానికి కసరత్తు చేస్తున్నారు.

2023 అసెంబ్లీ ఎన్నికల్లో బాల్కొండ నియోజకవర్గంలో బీజేపీ బలం పెరగడంతో స్థానిక సంస్థల ఎన్నికల్లో సత్తా చాటాలని ఆ పార్టీ నేత డాక్టర్‌ మల్లికార్జున్‌రెడ్డి భావిస్తున్నారు. 2019 పంచాయాతీ ఎన్నికల్లో వేల్పూర్‌, గుమ్మిర్యాల్‌తో పాటు మరికొన్ని పంచాయతీలకు ఆయన మద్దతుదారులు ఎంపికై బీజేపీకి కూడా స్థానిక సంస్థల్లో చోటు ఉందని అందరూ గ్రహించేలా చేశారు. ఈసారి ఇంకా స్థానాలను పెంచుకోవాలని అభ్యర్థుల ఎంపికను మల్లికార్జున్‌రెడ్డి స్వయంగా పరిశీలిస్తుండటం విశేషం. మూడు ప్రధాన పార్టీల నేతలు అభ్యర్థుల ఎంపికకు తీవ్రంగా కసరత్తు చేస్తున్నారు. ఫలితాలు ఎలా ఉండబోతాయో వేచి చూడాలి.

పంచాయతీ ఎన్నికల్లో అభ్యర్థుల

ఎంపిక కోసం వినూత్న పద్ధతులు

మండలానికో కమిటీ ఏర్పాటు

చేసిన కాంగ్రెస్‌

ఆశావహుల పేర్లు నమోదు

చేసుకుంటున్న బీజేపీ

గ్రామాల సందర్శన చేస్తున్న

బీఆర్‌ఎస్‌ నేతలు