నియమావళి అమలు చేయాలి

● మంచిర్యాల డీసీసీ భాస్కర్‌ ● పోలింగ్‌ కేంద్రాల సందర్శన

బెల్లంపల్లి/రామకృష్ణాపూర్‌/దండేపల్లి: ఎన్నికల ప్రవర్తన నియమావళిని సమర్థవంతంగా అమలు చేయాలని మంచిర్యాల డీసీపీ ఎగ్గడి భాస్కర్‌ అన్నారు. శనివారం బెల్లంపల్లి పద్మశాలి భవన్‌లో గ్రామ పంచాయతీ ఎన్నికలను పురస్కరించుకుని సబ్‌ డివిజన్‌ పోలీసు అధికారులు, సిబ్బందికి విధులు, ప్రవర్తన నియమావళి తదితర అంశాలపై అవగాహన సదస్సు నిర్వహించారు. ఈ సందర్భంగా ఆయన మాట్లాడుతూ ఎన్నికలు ప్రశాంతంగా జరిగేలా చర్యలు తీసుకోవాలని అన్నారు. మందమర్రి మండలం పులిమడుగు గ్రామాన్ని డీసీపీ భాస్కర్‌ శనివారం సందర్శించారు. స్థానిక సంస్థల ఎన్నికల నేపథ్యంలో గ్రామంలోని పోలింగ్‌ కేంద్రాన్ని పరిశీలించారు. దండేపల్లి మండలం వెల్గనూర్‌ గ్రామంలో శనివారం రాత్రి పంచాయతీ ఎన్నికలపై గ్రామస్తులతో సమావేశం నిర్వహించారు. గ్రామాభివృద్ధికి పాటుపడే వ్యక్తిని ఎన్నుకోవాలని, వివాదాలకు పాల్పడవద్దని, నిబంధనలు అతిక్రమిస్తే ఉపేక్షించబోమని తెలిపారు. ఈ కార్యక్రమాల్లో బెల్లంపల్లి ఏసీపీలు ఏ.రవికుమార్‌, ప్రకాశ్‌, సీఐలు కె.శ్రీనివాసరావు, సీ.హెచ్‌.హనోక్‌, ఎన్‌.దేవయ్య, శశిధర్‌రెడ్డి, రమణమూర్తి, ఎస్సై తహాసీనొద్దీన్‌ పాల్గొన్నారు.