ఏరియా ఆసుపత్రికి ఆధునిక లాండ్రి మంజూరు

బెల్లంపల్లి: బెల్లంపల్లిలోని ప్రభుత్వ వంద పడకల ఏరియా ఆస్పత్రికి మెకనైజ్డ్‌ లాండ్రి మంజూరైంది. రాష్ట్ర వ్యాప్తంగా కొత్తగా 19 ప్రభుత్వ ఏరియా ఆస్పత్రులకు మెకనైజ్డ్‌ లినెన్‌ లాండ్రి సర్వీసెస్‌ మంజూరు చేస్తూ రాష్ట్ర వైద్య, విధాన పరిషత్‌ నిర్ణయం తీసుకుంది. ఇందులో బెల్లంపల్లి ఒకటి కాగా.. రూ.25లక్షల అంచనా వ్యయంతో యంత్రాలు ఏర్పాటు చేస్తున్నారు. ఇందుకోసం ఆస్పత్రిలో పక్కా భవన నిర్మాణం చేపట్టగా పనులు తుది దశకు చేరాయి. ఆస్పత్రిలో వినియోగించే బెడ్‌షీట్స్‌, పిల్లో కవర్స్‌, ఓపీ గౌన్స్‌, మాస్క్‌ ఇతర వస్త్రాలను ప్రస్తుతం దోభీ ద్వారా శుభ్రం చేయిస్తున్నారు. ఆస్పత్రిలో ఒక్కరే దోభీ ఉండడంతో ఉతకడం కష్టతరం అవుతున్నట్లు గ్రహించిన రాష్ట్ర వైద్య, విధాన పరిషత్‌ కమిషనర్‌ యంత్రాలు మంజూరు చేశారు. ఇకపై మెకనైజ్డ్‌ లాండ్రి ద్వారా దుస్తులు శుభ్రం చేయనున్నారు. తద్వారా దుస్తుల శుభ్రత వేగవంతం అవుతుంది. ఇందుకు సంబంధించి టెండర్‌ ప్రక్రియ పూర్తి కాగా.. జోన్‌–1 పరిధిలోని ప్రభుత్వ ఏరియా ఆస్పత్రుల్లో ప్రైవేటు కంపెనీ లాండ్రిని నిర్వహించనుంది.