మూడు గ్రామాల్లో పాతకథే..!

● నామినేషన్లు వేసేవారు లేక నిలిచిపోనున్న ఎన్నికలు

దండేపల్లి: మండలంలోని గూడెం, నెల్కివెంకటాపూర్‌, వందుర్‌గూడ గ్రామాల్లో నామినేషన్లు దాఖలు కాకపోవడంతో ఎన్నికలు నిలిచిపోనున్నాయి. గూడెంలో గిరిజనులు లేకున్నా ఏజెన్సీ గ్రామంగా ప్రకటించారు. దీంతో సర్పంచ్‌, సగం వార్డు స్థానాలు గిరిజనులకే రిజర్వు చేయడంతో అభ్యర్థులు లేని కారణంగా అక్కడ 1987 నుంచి ఇప్పటివరకు సర్పంచ్‌ ఎన్నికలు నిలిచిపోతున్నాయి. ఏజెన్సీ పరిధి నుంచి గ్రామాన్ని తొలగించాలని మిగతా రిజర్వేషన్‌ స్థానాల్లో గ్రామస్తులు పోటీ చేయకుండా నిరసన వ్యక్తం చేస్తున్నారు.

నెల్కివెంకటాపూర్‌, వందుర్‌గూడలోనూ

అంతే..

మండలంలోని నెల్కివెంకటాపూర్‌, వందుర్‌గూడ గ్రామాల్లోనూ పంచాయతీ ఎన్నికలు నిలిచిపోనున్నాయి. ఇది రెండోసారి కావడం గమనార్హం. వందుర్‌గూడ నెల్కివెంకటాపూర్‌ పంచాయతీలో ఉండేది. వందుర్‌గూడ నూతన పంచాయతీగా ఏర్పాటు చేశారు. దీన్ని గ్రామస్తులు వ్యతిరేకిస్తూ ఎన్నికలు బహిష్కరిస్తున్నారు. ఇక నెల్కివెంకటాపూర్‌ ఏజెన్సీ గ్రామం కావడంతో ఇక్కడ సర్పంచ్‌, సగం వార్డులను ఎస్టీలకు రిజర్వు చేశారు. ఈ గ్రామంలో గిరిజనులు లేని కారణంగా ఎవరూ నామినేషన్‌ వేయడం లేదు. ఈ కారణంతో ఎన్నికలు నిలిచిపోతున్నాయి.