పొరపాట్లకు తావుండదు..

సాక్షి ప్రతినిధి, కామారెడ్డి : పంచాయతీ ఎన్నికలు ఎలాంటి పొరపాట్లకు తావులేకుండా, ఫేర్‌ అండ్‌ ఫ్రీగా నిర్వహిస్తామని కలెక్టర్‌ ఆశిష్‌ సంగ్వాన్‌ అన్నారు. ఎన్నికల నిర్వహణ కోసం అన్ని ఏర్పాట్లు చేశామని, ఇప్పటికే తొలి విడత నామినేషన్ల స్వీక రణ పూర్తయ్యిందని పే ర్కొన్నారు. జిల్లాలో మూడు విడతల్లో ఎన్నికలు జరుగుతాయని, ఏ ర్పాట్లు, పర్యవేక్షణ కోసం నోడల్‌ అధికారులను నియమించి వారికి బాధ్యతలు అప్పగించామని, అలాగే ఎఫ్‌ఎస్‌టీ, ఎస్‌ఎస్‌టీ బృందాలు 24/7 పనిచేస్తాయని అన్నారు. ఎన్నికల ఫిర్యాదులపై చర్యలు తీసుకునేందుకు ప్రత్యేక బృందాలను ఏర్పాటు చేశామని తెలిపారు. పంచాయతీ ఎన్నికల నేపథ్యంలో ఏర్పాట్లు, నిర్వహణపై ‘సాక్షి’కి ఇచ్చిన ఇంటర్వ్యూలో కలెక్టర్‌ మాట్లాడారు. ఆయన మాటల్లోనే..

బ్యాలెట్‌ బాక్సులు, బ్యాలెట్‌ పత్రాలు రెడీ..

పోలింగ్‌కు అవసరమైన సామగ్రిని సిద్ధం చేశాం. బ్యాలెట్‌ బాక్సులను పోలింగ్‌కు వారం ముందే మండలాలకు చేరవేస్తాం. బ్యాలెట్‌ పత్రాలు ఒక రోజు ముందు పంపిస్తాం. పోలింగ్‌ సిబ్బంది మండల కేంద్రంలోని రిసెప్షన్‌ కేంద్రం నుంచి సామగ్రిని తీసుకుని తమకు కేటాయించిన గ్రామాలకు వెళ్లాల్సి ఉంటుంది. పోలింగ్‌కు అవసరమైన వాహనాలను కూడా సిద్ధం చేశాం.

అందుబాటులో నోడల్‌ అఽధికారులు

13 మంది జిల్లా అధికారులను నోడల్‌ అధికారులుగా నియమించాం. శాంతిభద్రతలు – అదనపు ఎస్పీ నర్సింహారెడ్డి, ఎంసీసీ – అదనపు కలెక్టర్‌ విక్టర్‌, మ్యాన్‌పవర్‌ మేనేజ్‌మెంట్‌ – సీపీవో రఘునందన్‌, బ్యాలెట్‌ బాక్సుల నిర్వహణ – సురేందర్‌, రవాణా – డీటీవో శ్రీనివాస్‌, శిక్షణ – డీఈవో రాజు, మెటీరియల్‌ మేనేజ్‌మెంట్‌ – డీహెచ్‌వో జ్యోతి, ఎక్స్‌పెండీచర్‌ – డీటీవో వెంకటేశ్వర్లు, అబ్జర్వర్‌ – డీఎస్‌వో వెంకటేశ్వర్‌రావు, బ్యాలెట్‌ పేపర్‌ – జెడ్పీ సీఈవో చందర్‌, మీడియా కమ్యూనికేషన్‌ – డీపీఆర్‌వో తిరుమల, హెల్ప్‌లైన్‌, ఫిర్యాదులు – గ్రౌండ్‌ వాటర్‌ ఆఫీసర్‌ సతీశ్‌యాదవ్‌, రిపోర్ట్స్‌, రిటర్న్స్‌ – ఫిషరీస్‌ అధికారి డోలిసింగ్‌.

ఫెయిర్‌ అండ్‌ ఫ్రీగా ఎన్నికల నిర్వహణ

అవసరమైన ఏర్పాట్లు పూర్తి చేశాం

ఫిర్యాదులపై చర్యలకు ప్రత్యేక బృందాలు

‘సాక్షి’ ఇంటర్వ్యూలో

కలెక్టర్‌ ఆశిష్‌ సంగ్వాన్‌

జిల్లాలో 532 సర్పంచ్‌, 4,565 వార్డు పదవులకు మూడు విడతల్లో ఎన్నికలు నిర్వహిస్తున్నాం. తొలివిడతలో భిక్కనూరు, బీబీపేట, కామారెడ్డి, మాచారెడ్డి, దోమకొండ, రాజంపేట, రామారెడ్డి, తాడ్వాయి, సదాశివనగర్‌, పాల్వంచ మండలాల్లో 167 పంచాయతీ సర్పంచ్‌, 1520 వార్డులకు ఎన్నికలు జరుగుతాయి. రెండో విడతలో గాంధారి, లింగంపేట, ఎల్లారెడ్డి, మహ్మద్‌నగర్‌, నిజాంసాగర్‌, పిట్లం మండలాల్లోని 197 సర్పంచ్‌, 1654 వార్డులకు, మూడో విడతలో బాన్సువాడ, బీర్కూర్‌, బిచ్కుంద, డోంగ్లీ, జుక్కల్‌, మద్నూర్‌, నస్రుల్లాబాద్‌, పెద్దకొడప్‌గల్‌ మండలాల్లోని 168 సర్పంచ్‌, 1482 వార్డు స్థానాలకు ఎన్నికలు నిర్వహించేందుకు పకడ్బందీ ఏర్పాట్లు చేశాం.