ఇది కూడా పాయె!

సాక్షి, అమలాపురం: దశాబ్దాలు పోరాడి సాధించుకున్న రామచంద్రపురం రెవెన్యూ డివిజన్‌ కనుమరుగయ్యే పరిస్థితి దాపురించింది. ఈ రెవెన్యూ డివిజన్‌ దశల వారీగా కుచించుకుపోతోంది. ఎనిమిది మండలాలతో మొదలై చివరకు రెండు మండలాలకు పరిమితమైంది. సుదీర్ఘ చరిత్ర... రెవెన్యూ డివిజన్‌ కన్నా ఎక్కువ హంగులు, అవకాశాలు ఉన్న ఈ డివిజన్‌ ఇప్పుడు కొనసాగే పరిస్థితి లేకుండా పోయింది. మిగిలిన రెండు మండలాలను ఇటు జిల్లా కేంద్రమైన అమలాపురంలో కాని.. అటు కాకినాడ జిల్లా కాకినాడ రెవెన్యూ డివిజన్‌లోకాని కలపాల్సిన దుస్థితి నెలకొంది. ఇక్కడ నుంచి రాష్ట్రమంత్రిగా ప్రాతినిధ్యం వహిస్తున్న వాసంశెట్టి సుభాష్‌ వైఫల్యం రామచంద్రపురం డివిజన్‌కు శాపంగా మారింది.

ఉద్యమాల ఫలితంగా...

ఉమ్మడి తూర్పు గోదావరి జిల్లాలో రామచంద్రపురం రెవెన్యూ డివిజన్‌ను 2013లో ఏర్పాటు చేశారు. అంతకు ముందు ఈ డివిజన్‌ పరిధిలో చాలా మండలాలు రాజమహేంద్రరం డివిజన్‌ పరిధిలో ఉండేవి. తరువాత ఎనిమిది మండలాలతో దీనిని ఏర్పాటు చేశారు. రామచంద్రపురం నియోజకవర్గం పరిధిలో రామచంద్రపురం, కాజులూరు, కె.గంగవరం, మండపేట ని యోజకవర్గం పరిధిలో కపిలేశ్వరపురం, మండపేట, రాయవరం, అనపర్తి నియోజకవర్గం పరిధిలో అనపర్తి, బిక్కవోలు మండలాలతో దీనిని ఏర్పాటు చేశారు. ఇక్కడ డివిజన్‌ ఏర్పాటు చేయాలని స్థానికులు పెద్ద ఎ త్తున ఉద్యమాలు చేసిన ఫలితంగా ఇది ఏర్పడింది. ఈ కారణంగానే ఇక్కడ రెవెన్యూ డివిజన్‌ కార్యాలయాన్ని పుర్వపు రామచంద్రపురం సంస్థాన రాచరికానికి గుర్తుగా అద్భుత నిర్మాణ శైలిలో నిర్మించుకున్నారు. ఇది అందమైన లాన్‌లు, మొక్కలతో అలరిస్తోంది.

చిన్న జిల్లాల ఏర్పాటుతో

ఐదు మండలాలకే పరిమితం

గత వైఎస్సార్‌ సీపీ ప్రభుత్వ హయాంలో చిన్న జిల్లాల ఏర్పాటులో భాగంగా ఉమ్మడి తూర్పు గోదావరిని కాకినాడ, డాక్టర్‌ బి.ఆర్‌.అంబేడ్కర్‌ కోనసీమ, తూర్పు గోదావరి జిల్లాలుగా విడదీశారు. రామచంద్రపురం రెవెన్యూ డివిజన్‌ పరిధిలో ఉన్న అనపర్తి, బిక్కవోలు తూర్పు గోదావరి జిల్లా పరిధిలోకి వెళ్లడంతోపాటు రాజమహేంద్రవరం డివిజన్‌లో కలిసిపోయాయి. పరిపాలనా సౌలభ్యం కోసం కాజులూరు మండలాన్ని కాకినాడ జిల్లాలో కలిపారు. ఇది కాకినాడ రెవెన్యూ డివిజన్‌ పరిధిలోకి వెళ్లింది. దీంతో రామచంద్రపురం రెవెన్యూ డివిజన్‌ మండపేట, రామచంద్రపురం నియోజకవర్గాల పరిధిలో ఐదు మండలాలకు పరిమితం అయ్యింది. జిల్లాలు ఏర్పడిన కొత్తలో అమలాపురం రెవెన్యూ డివిజన్‌ పరిధిలో ఉన్న కొత్తపేట నియోజకవర్గం పరిధిలోని కొత్తపేట, ఆలమూరు, ఆత్రేయపురం, రావులపాలెం మండలాలను రామచంద్రపురం రెవెన్యూ డివిజన్‌లో కలపాలని నిర్ణయించారు. అయితే కొత్తపేట కేంద్రంగా రెవెన్యూ డివిజన్‌ ఏర్పాటు చేయాలని అప్పటి కొత్తపేట ఎమ్మెల్యే, ప్రభుత్వ విప్‌ చిర్ల జగ్గిరెడ్డి చేసిన కృషి ఫలితంగా పి.గన్నవరం, కొత్తపేట నియోజకవర్గాల పరిధిలోని మండలాలను కలుపుతూ కొత్తపేట రెవెన్యూ డివిజన్‌ కేంద్రాన్ని ఏర్పాటు చేశారు.

ఎత్తివేస్తారా?

తాజాగా చంద్రబాబు ప్రభుత్వం జిల్లాలను పునర్వ్యవస్థీకరణ చేయడంతో మండపేట నియోజకవర్గం తూర్పు గోదావరిలో విలీనం కానుంది. దీని పరిధిలోని కపిలేశ్వరపురం, మండపేట, రాయవరం మండలాలు రాజమహేంద్రవరం డివిజన్‌లో కలవనున్నాయి. దీనితో రామచంద్రపురం రెవెన్యూ డివిజన్‌ కేవలం రామచంద్రపురం, కె.గంగవరం మండలాలకు పరిమితమైంది. దీనితో ఈ డివిజన్‌ ఎత్తివేస్తారనే ప్రచారం జోరందుకుంది. వీటిని కాకినాడ జిల్లాలో విలీనం చేసి, కాకినాడ రెవెన్యూ డివిజన్‌లో కలిపివేస్తారని లేదా అమలాపురం రెవెన్యూ డివిజన్‌లో కలుపుతారనే ప్రచారం జోరందుకుంది. చంద్రబాబు ప్రభుత్వం తీసుకున్న నిర్ణయంపై స్థానికులు మండిపడుతున్నారు. ఎన్నో ఆశలతో ఏర్పాటు చేసుకున్న ఈ డివిజన్‌ను పుష్కర కాలం తరువాత ఎత్తివేసే దిశగా ప్రభుత్వం చూస్తోందని మండిపడుతున్నారు. డివిజన్‌ ఏర్పాటుకు ముందే ఇక్కడ జిల్లా కోర్టులు, ఏరియా ఆస్పత్రి, విద్యాలయాలు, ఆర్టీసీ డిపో ఉన్నాయి. ఇటీవల మూడవ అడిషనల్‌ జిల్లా కోర్టును కూడా ఏర్పాటు చేశారు. చుట్టుపక్కల గ్రామాలకు అందుబాటులో ఉన్న అతి పెద్ద పట్టణం ఇది. గత వైఎస్సార్‌ సీపీ ప్రభుత్వ హయాంలో శరవేగంగా అభివృద్ధి చెందింది. మరింత అభివృద్ధి చెందుతుందనే దశలో ప్రభుత్వం తీసుకున్న నిర్ణయం రామచంద్రపురం అభివృద్ధికి శరాఘాతంగా మారింది.

రెండు విధాలుగా అన్యాయం

మా నియోజకవర్గాన్ని కాకినాడలో విలీనం చేయాలని కోరాంలేదా రెవెన్యూ డివిజన్‌కు ఇబ్బంది లేకుండా కొనసాగించాలని డిమాండ్‌ చేశాం. కాని మాకు రెండు విధాలుగానూ అన్యాయం జరిగింది. రామచంద్రపురం పట్టణానికి జిల్లా కేంద్రానికి ఉండాల్సిన అన్ని హంగులూ ఉన్నాయి. అలాంటిది ఇప్పుడు రెవెన్యూ డివిజన్‌ కేంద్రంగా కూడా కొనసాగేలా లేదు.

– యర్రంశెట్టి రామరాజు, రామచంద్రపురం

మంత్రి సుభాష్‌ వైఫల్యమే శాపం

ఉమ్మడి జిల్లాలో సుదీర్ఘ పోరాటల ఫలితంగా రామచంద్రపురం డివిజన్‌ ఏర్పడింది. స్థానికుల ఆకాంక్షలకు విరుద్ధంగా రెవెన్యూ డివిజన్‌ కనుమరుగయ్యే పరిస్థితి నెలకొంది. జిల్లాలను విభజన చేస్తే ఈ నియోజకవర్గాన్ని కాకినాడలో విలీనం చేయాలనే డిమాండ్‌ ఉంది. లేకుంటే రెవెన్యూ డివిజన్‌కు ఇబ్బంది లేకుండా చూడమని స్థానికులు కోరారు. అయితే ఈ రెండూ నెరవేరకుండా పోయాయి. ఇంత జరుగుతున్నా రామచంద్రపురం అసెంబ్లీ నుంచి ప్రాతినిధ్యం వహిస్తున్న రాష్ట్ర కార్మిక శాఖమంత్రి వాసంశెట్టి సుభాష్‌ నోరుమెదకపోవడంపై నియోజకవర్గ వ్యాప్తంగా నిరసన వ్యక్తమవుతోంది. వైఎస్సార్‌ సీపీ నేతల మీద, మరీ ముఖ్యంగా సొంత సామాజికవర్గం శెట్టిబలిజ నేతల మీద నోరు పారేసుకోవడం, వ్యక్తగత దూషణలకు దిగడంలో ఉత్సాహం చూపిస్తున్న మంత్రి నియోజకవర్గ ప్రజల ఆకాంక్షలకు అనుగుణంగా పనిచేయడం లేదనే విమర్శలు వెల్లువెత్తుతున్నాయి. పక్కనే ఉన్న టీడీపీకి చెందిన మండపేట ఎమ్మెల్యే వేగుళ్ల జోగేశ్వరరావు తన రాజకీయ అవసరాలకు అనుగుణంగా నియోజకవర్గాన్ని ఏకంగా జిల్లానే మార్చగా లేనిది మంత్రి హోదాలో ఉండి ఉన్న రెవెన్యూ డివిజన్‌ను కాపాడుకోలేకపోయారనే ఘాటు విమర్శలు వెల్లువెత్తుతున్నాయి. మంత్రి వైఫల్యమే తమకు శాపంగా మారిందని ఈ ప్రాంత వాసులు మండిపడుతున్నారు.

రామచంద్రపురం రెవెన్యూ డివిజన్‌

కనుమరుగు

తొలుత ఎనిమిది మండలాలతో ఏర్పాటు

పునర్విభజనతో మిగిలినవి కె.గంగవరం, రామచంద్రపురం మండలాలే

తూర్పులోకి వెళ్లిన మండపేట

నియోజకవర్గం

నోరుమెదపని రాష్ట్ర మంత్రి సుభాష్‌

మండిపడుతున్న

రామచంద్రపురం వాసులు

ఇది కూడా పాయె!

ఇది కూడా పాయె!