కేసుల దర్యాప్తులో జాప్యం తగదు

అమలాపురం టౌన్‌: కేసుల దర్యాప్తులో జాప్యం ఉండకూడదని, దర్యాప్తుల వేగవంతంతోపాటు నిందితుల అరెస్ట్‌, ఆస్తుల రికవరీ కూడా వేగంగా ఉండాలని ఎస్పీ రాహుల్‌ మీనా జిల్లాలోని పోలీసు అధికారులకు దిశా నిర్దేశం చేశారు. మహిళలు, బాలికలకు సంబంధించిన కేసుల్లో దర్యాప్తు పారదర్శకంగా, వేగంగా ఉండాలని సూచించారు. స్థానిక ఎస్పీ కార్యాలయంలో శనివారం నిర్వహించిన జిల్లా నేర సమీక్షా సమావేశంలో ఆయన మాట్లాడారు. జిల్లాలో నమోదైన తీవ్ర నేరాల కేసుల పురోగతిని ప్రత్యేకంగా సమీక్షించారు. ఈ కేసుల్లో నేరస్తులకు తగిన శిక్షలు పడేలా ఆధారాల సేకరణ పకడ్బందీగా ఉండాలని ఆదేశించారు. ఇండియన్‌ పీనల్‌ కోడ్‌ (ఐపీసీ) స్థానంలో వచ్చిన భారతీయ న్యాయ సంహిత (బీఎన్‌ఎస్‌) కింద నమోదైన అన్ని కేసుల దర్యాప్తును వేగంగా చేయాలని సూచించారు. అదృశ్య (మిస్సింగ్‌) కేసుల పరిశోధన, దర్యాప్తు అప్రమత్తంగా ఉండాలన్నారు. రోడ్డు ప్రమాదాల నివారణకు ప్రతి పోలీస్‌ స్టేషన్‌ పరిధిలో ప్రణాళికతో చర్యలు చేపట్టాలని చెప్పారు. లోక్‌ అదాలత్‌లో పరిష్కారమయ్యే వీలున్న కేసులను గుర్తించి కౌన్సెలింగ్‌ నిర్వహించాలని ఆదేశించారు. ఏఎస్పీ ఏవీఆర్‌పీబీ, అమలాపురం, కొత్తపేట, రామచంద్రపురం డీఎస్పీలు టీఎస్‌ఆర్‌కే ప్రసాద్‌, సుంకర మురళీమోహన్‌, రఘువీర్‌, ఏఆర్‌ డీఎస్పీ సుబ్బరాజు, ఎస్‌బీ సీఐ వి.పుల్లారావు, డీసీఆర్‌బీ సీఐ మురళీకృష్ణతోపాటు సీఐలు, ఎస్సైలు పాల్గొన్నారు.

నేడు విద్యుత్‌ బిల్లులు

చెల్లించవచ్చు

అమలాపురం రూరల్‌: అంబేడ్కర్‌ కోనసీమ జిల్లాలో అన్ని విద్యుత్‌ రెవెన్యూ కార్యాలయాల్లో ఆదివారం సెలవు రోజు అయినా విద్యుత్‌ బిల్లులు యథావిధిగా చెల్లించవచ్చని కోనసీమ జిల్లా ఎపీఈపీడీసీఎల్‌ ఎస్‌ఈ ఎస్‌.రాజేశ్వరి తెలిపారు. సెక్షన్‌ ఆఫీస్‌ కౌంటర్లు, ఏటీపీ కేంద్రాలు పనిచేస్తాయన్నారు. విద్యుత్‌ వినియోగదారులు ఈ అవకాశాన్ని సద్వినియోగం చేసుకోవాలని శనివారం ప్రకటనలో తెలిపారు.

14న యూటీఎఫ్‌ సమావేశం

రాయవరం: మండలంలోని పసలపూడిలో డిసెంబర్‌ 14న నిర్వహించే యూటీఎఫ్‌ జిల్లా కౌన్సిల్‌ సమావేశాన్ని విజయవంతం చేయాలని యూటీఎఫ్‌ జిల్లా అధ్యక్ష, ప్రధాన కార్యదర్శులు పి.సురేంద్రకుమార్‌, ఎంటీవీ సుబ్బారావు పిలుపునిచ్చారు. పసలపూడిలో శనివారం యూటీఎఫ్‌ జిల్లా కౌన్సిల్‌ సన్నాహక సమావేశం రాయవరం మండల శాఖ అధ్యక్షుడు కడలి శ్రీనివాస్‌ అధ్యక్షతన నిర్వహించారు. ముఖ్య అతిథులుగా పాల్గొన్న సురేంద్రకుమార్‌, సుబ్బారావు మాట్లాడుతూ యూటీఎఫ్‌ నిరంతరం పోరుబాటలో పయనిస్తుందన్నారు. జిల్లా గౌరవ అధ్యక్షులు పెంకే వెంకటేశ్వరరావు, మహి విభాగం జిల్లా అధ్యక్షురాలు గరగ సీతాదేవి, రాష్ట్ర కార్యదర్శి జ్యోతిబసు, యూటీఎఫ్‌ సీనియర్‌ నాయకుడు గారా చిట్టిబాబు మాట్లాడారు. ఈ సందర్భంగా యూటీఎఫ్‌ ఆధ్వర్యంలో రూపొందించిన పదవ తరగతి మోడల్‌ పేపర్లను వారు ఆవిష్కరించారు.

5న మెగా పేరెంట్‌, టీచర్‌ మీట్‌

అమలాపురం రూరల్‌: మెగా పేరెంట్‌ – టీచర్‌ మీట్‌ 3.0 డిసెంబర్‌ 5వ తేదీన ప్రతిష్టాత్మకంగా నిర్వహించాలని కలెక్టర్‌ ఆర్‌.మహేష్‌కుమార్‌ ఆదేశించారు. ఆ రోజు ఉదయం 9 నుంచి మధ్యాహ్నం 12.45 గంటల వరకు సమావేశం ఉంటుందని శనివారం ప్రకటనలో తెలిపారు. విద్యార్థులు తల్లిదండ్రులు పూర్వపు విద్యార్థులు హాజరవుతారన్నారు. మొదటి 80 నిమిషాలు ఎఫ్‌ఎల్‌ఎం అసెస్‌మెంట్‌ బుక్‌లెట్‌పై సమీక్ష ఉంటుందన్నారు. స్కూల్‌ మేనేజ్‌మెంట్‌ కమిటీలు తల్లిదండ్రులు టీచర్లు విద్యార్థుల భవిష్యత్తు గురించి విస్తృతంగా చర్చిస్తారని పేర్కొన్నారు. డొక్కా సీతమ్మ మధ్యాహ్నం బడి భోజన పథకం ద్వారా సహ పంక్తి భోజనం నిర్వహించాలని తెలిపారు.

ఉపాధ్యాయ క్రీడా

పోటీలకు ఎంపికలు

ఐ.పోలవరం: ఉపాధ్యాయుల క్రీడా పోటీలలో భాగంగా జిల్లా వ్యాప్తంగా క్రికెట్‌, త్రోబాల్‌ ఎంపికలు సాగాయి. ఐ.పోలవరం, అంబాజీపేట, గొలవిల్లి, ముక్తేశ్వరం, అమలాపురం ఎంపికల పోటీల్లో ఉపాధ్యాయులు ఉత్సాహంగా పాల్గొన్నారు. పురుషులకు క్రికెట్‌, మహిళలకు త్రో బాల్‌ విభాగాల్లో ఈ పోటీలు నిర్వహిస్తున్నారు. ఈనెల 29, 30లలో మండల స్థాయిలోను, 13వ, 14వ తేదీలలో డివిజన్‌ స్థాయిలోను, 20 నుంచి 22వ తేదీ వరకు జిల్లా స్థాయిలోను, వచ్చే ఏడాది జనవరి 2 నుంచి 4వ వరకు రాష్ట్ర స్థాయి పోటీలు జరగనున్నాయి. ఐ.పోలవరం మండల స్థాయి ఎంఈఓ ఎన్‌. కొండారెడ్డి ప్రారంభించారు.