వాడపల్లికి పోటెత్తిన భక్తజనం | - | Sakshi
Sakshi News home page

వాడపల్లికి పోటెత్తిన భక్తజనం

Nov 30 2025 2:25 PM | Updated on Nov 30 2025 2:25 PM

వాడపల

వాడపల్లికి పోటెత్తిన భక్తజనం

కొత్తపేట: అనాథ రక్షకా.. ఆపద్బాంధవా.. గోవిందా.. అంటూ వేలాది భక్తుల గోవింద నామస్మరణతో కోనసీమ తిరుమల వాడపల్లి క్షేత్రం మార్మోగింది. ఆత్రేయపురం మండలం వాడపల్లి శ్రీదేవి, భూదేవి సమేత శ్రీ వేంకటేశ్వరస్వామి ఆలయానికి శనివారం భక్తులు పోటెత్తారు. ఆలయ ప్రధాన అర్చకుడు ఖండవిల్లి ఆదిత్య అనంతశ్రీనివాసరావు, అర్చకులు, వేద పండితులు సుప్రభాత సేవతో ప్రారంభించి వివిధ సేవలు నిర్వహించారు. సుగంధ భరిత పుష్పాలతో స్వామివారిని విశేషంగా అలంకరించారు. వేకువజాము నుంచే వేలాదిగా భక్తులు వాడపల్లి బాట పట్టారు. పావన గౌతమీ గోదావరి నదిలో భక్తులు పుణ్యస్నానాలు చేసి తలనీలాలు సమర్పించారు. సాధారణ భక్తులతో పాటు ఏడు శనివారాల వెంకన్న దర్శనం నోము ఆచరించే భక్తులు ఏడు ప్రదక్షిణలు నిర్వహించి స్వామివారిని దర్శించుకున్నారు. ముడుపులు, మొక్కుబడులు చెల్లించారు. స్వామి దర్శనం, తీర్థ ప్రసాదాల స్వీకరణ అనంతరం వేలాది మంది అన్న ప్రసాదం స్వీకరించారు. దేవదాయ – ధర్మదాయ శాఖ డిప్యూటీ కమిషనర్‌, దేవస్థానం ఈఓ నల్లం సూర్యచక్రధరరావు ఏర్పాట్లను పర్యవేక్షించారు. రావులపాలెం సీఐ సీహెచ్‌ విద్యాసాగర్‌ ఆధ్వర్యంలో ఆత్రేయపురం ఎస్‌ఐ ఎస్‌ రాము, వాడపల్లిలో ట్రాఫిక్‌ను నియంత్రించారు. ఏపీఎస్‌ ఆర్టీసీ వాడపల్లికి ప్రత్యేక బస్సు సర్వీసులను నడిపింది.

మార్మోగిన గోవింద నామ స్మరణ

మామిడికుదురు: అప్పనపల్లి శ్రీబాల బాలాజీ స్వామి వారి సన్నిధిలో శనివారం గోవింద నామ స్మరణ మార్మోగింది. ఏడుకొండలవాడా గోవిందా.. వెంకటరమణా గోవిందా.. అంటూ భక్తులు ఆలయం చుట్టూ ఏడు ప్రదక్షిణలు చేసి స్వామి, అమ్మ వార్లను దర్శించుకున్నారు. ప్రాతః కాలంలో స్వామి వారికి సుప్రభాత సేవలను అర్చకులు శాస్త్రోక్తంగా జరిపించారు. తొలి హారతిని భక్తులు దర్శించుకున్నారు. పవిత్ర వైనతేయ గోదావరి నదిలో పుణ్య స్నానాలు ఆచరించారు. స్వామివారికి ముడుపులు, మొక్కుబడులు చెల్లించారు. తమ కోర్కెలు నెరవేరాలని స్వామికి ప్రణమిల్లారు. వివిధ సేవల ద్వారా స్వామివారికి రూ.2,72,239 ఆదాయం వచ్చిందని ఈఓ ముదునూరి సత్యనారాయణరాజు తెలిపారు. నిత్య అన్నదానం ట్రస్టుకు రూ.89,450 విరాళాలుగా అందించారన్నారు. అయిదు వేల మంది స్వామి వారిని దర్శించుకున్నారని, 2,800 మంది స్వామి వారి అన్న ప్రసాదం స్వీకరించారని తెలిపారు. పాశర్లపూడిలంకకు చెందిన పితాని సూర్యనారాయణ, వెంకటరమాదేవి దంపతులు స్వామివారి నిత్య అన్న ప్రసాదం ట్రస్టుకు రూ.10,116 విరాళంగా అందించారు. ఈ విరాళాన్ని వంశ పారంపర్య ధర్మకర్త మొల్లేటి చక్రపాణికి అందజేశారు.

వాడపల్లికి పోటెత్తిన భక్తజనం 1
1/1

వాడపల్లికి పోటెత్తిన భక్తజనం

Advertisement

Related News By Category

Related News By Tags

Advertisement
 
Advertisement
Advertisement