రత్నగిరిపై భక్తుల రద్దీ

● సత్యదేవుని దర్శించిన 40 వేల మంది

● రూ.40 లక్షల ఆదాయం

అన్నవరం: వేలాదిగా వచ్చిన భక్తులతో రత్నగిరి శనివారం రద్దీగా మారింది. సత్యదేవుని సన్నిధితో పాటు రాష్ట్రంలోని వివిధ ప్రాంతాల్లో శుక్రవారం రాత్రి, శనివారం తెల్లవారుజామున పెద్ద సంఖ్యలో వివాహాలు జరిగాయి. ఆ పెళ్లిబృందాలు, నవదంపతులతో పాటు ఇతర భక్తులు కూడా సత్యదేవుని ఆలయానికి వేలాదిగా తరలి వచ్చారు. దీంతో, ఆలయంలో తెల్లవారుజాము నుంచీ తీవ్ర రద్దీ ఏర్పడింది. సుమారు 40 వేల మంది భక్తులు సత్యదేవుని దర్శించుకున్నారు. సర్వ దర్శనానికి రెండు గంటలు, రూ.200 టికెట్టుపై అంతరాలయ దర్శనానికి గంట సమయం పట్టింది. మూడు వేల వ్రతాలు జరిగాయి. అన్ని విభాగాల ద్వారా దేవస్థానానికి రూ.40 లక్షల ఆదాయం సమకూరింది. ఆరు వేల మంది భక్తులు సత్యదేవుని అన్నప్రసాదం స్వీకరించారు. సత్యదేవుడు, అనంతలక్ష్మీ సత్యవతీదేవి అమ్మవారిని ఉదయం తిరుచ్చి వాహనంపై ఘనంగా ఊరేగించారు. దశమి పర్వదినం కావడంతో ఆదివారం కూడా రత్నగిరిపై తీవ్ర రద్దీ ఉండే అవకాశం ఉంది. నేటి ఉదయం 10 గంటలకు సత్యదేవుడు, అమ్మవారిని టేకు రథంపై ఊరేగిస్తారు.