ఎయిడ్స్ నియంత్రణకు నడుం బిగిద్దాం
అమలాపురం టౌన్: సమాజంలో ఎయిడ్స్ మహమ్మారి నియంత్రణకు అందరం నడుం బిగిద్దామని డీఎం అండ్ హెచ్వో డాక్టర్ ఎం. దుర్గారావు దొర పిలుపునిచ్చారు. స్థానిక ప్రభుత్వ ఏరియా ఆస్పత్రి ప్రాంగణంలో శనివారం రాత్రి జరిగిన ప్రపంచ ఎయిడ్స్ దినోత్సవ కార్యక్రమాన్ని ఆయన ప్రారంభించి ప్రసంగించారు. తొలుత ఎయిడ్స్ వ్యాధి నియంత్రణపై చైతన్యం కలిగిస్తూ ఆస్పత్రి ప్రాంగణం నుంచి మొదలైన కొవ్వొత్తుల ర్యాలీని డీఎం అండ్ హెచ్వో జెండా ఊపి ప్రారంభించారు. ఎయిడ్స్ నియంత్రణ నినాదాలతో కొవ్వొత్తుల ర్యాలీ ఏరియా ఆస్పత్రి నుంచి స్థానిక నల్ల వంతెన వరకూ సాగింది. అనంతరం ఆస్పత్రి ఆవరణలో ఎయిడ్స్పై ముగ్గుల పోటీలు నిర్వహించారు. డిప్యూటీ డీఎం అండ్ హెచ్వో డాక్టర్ సీహెచ్వీ భరతలక్ష్మి, ఎయిడ్స్ నిర్మూలన అధికారులు పాల్గొన్నారు.


