కొత్తగా లక్ష ఎకరాల్లో కాఫీ తోటల పెంపకం

పాడేరు : జిల్లా వ్యాప్తంగా రాబోయే ఐదేళ్లలో లక్ష ఎకరాల్లో కొత్తగా కాఫీ తోటల పెంపకం చేపడుతున్నట్లు కలెక్టర్‌ దినేష్‌కుమార్‌ వెలల్లడించారు. శనివారం తన కార్యాలయంలో విలేకరుల సమావేశం నిర్వహించారు. కాఫీ ప్రాజెక్టు నిమిత్తం రూ.202.19కోట్లు మంజూరైందన్నారు. పాడేరు ఐటీడీఏ పరిధిలో 30 ఏళ్లు పైబడిన కాఫీ తోటలను తిరిగి పునరుద్ధరిస్తామన్నారు. సేంద్రియ విధానంలో కాఫీ తోటలను సాగు చేసి గిరిజన రైతులు అధిక దిగుబడులు సాధించాలన్నారు. 14 శాతం రైతు వాటాగా 86 శాతం సబ్సిడీతో 9902 బేబీ పల్పింగ్‌ యూబిట్లు, మరో వెయ్యి బొకే యూనిట్లను రైతులకు అందజేస్తామన్నారు. గూడెంకొత్తవీధి, జి.మాడుగుల మండల కేంద్రాల్లో రూ.7కోట్లతో నిర్మిస్తున్న ఎకో పల్పింగ్‌ యూనిట్ల నిర్మాణాలు త్వరితగతిన పూర్తి చేసి వచ్చే ఏడాది నాటికి అందుబాటులోకి తెస్తామన్నారు. ఈ ఏడాది జీసీసీ కాఫీ ధరలను ఇప్పటికే ప్రకటించిందన్నారు. అరాబికా కాఫీ పార్చమెంట్‌ కిలో రూ.450లు, చెర్రి కాఫీకు రూ.270 ప్రకటించామన్నారు. ఏ గ్రేడ్‌ కాఫీ పండ్లు కిలో రూ.60లు, బీ గ్రేడ్‌ రూ.55లుగా నిర్థారించామన్నారు. బెర్రీబోరర్‌ ఆశించిన అరకువ్యాలీ, డుంబ్రిగుడ మండలాల్లో కాఫీ క్రయ, విక్రయాల కోసం ఎఫ్‌ఈవోలు, ఎన్జీవోలు, బయ్యర్లు, ట్రేడర్లు ముందస్తుగా లైసెన్సులు తీసుకోవాలన్నారు. లైసెన్స్‌లు లేకుండా క్రయ,విక్రయాలు చేస్తే కఠిన చర్యలు తప్పవని కలెక్టర్‌ హెచ్చరించారు.

వచ్చేనెల 5న మెగా పేరెంట్స్‌ మీట్‌ :

రాష్ట్ర ప్రభుత్వ ఆదేశాల మేరకు వచ్చేనెల 5న జిల్లా వ్యాప్తంగా 2945 అన్ని రకాల ప్రభుత్వ పాఠశాలలు, ప్రభుత్వ జూనియర్‌ కళాశాలల్లో మెగా పేరెంట్స్‌ మీట్‌ నిర్వహిస్తున్నట్లు కలెక్టర్‌ దినేష్‌కుమార్‌ తెలిపారు. ఈ మెగా పేరెంట్స్‌ మీట్‌లో జిల్లా వ్యాప్తంగా 1.8లక్షల మంది విద్యార్థులు, 1.2లక్షల మంది తల్లిదండ్రులు పాల్గొంటారన్నారు. 5న ఉదయం 9గంటల నుంచి మధ్యాహ్నం 12.45గంటల వరకు ఈ కార్యక్రమం నిర్వహిస్తామని చెప్పారు. మెగా పేరెంట్స్‌ మీట్‌ను విజయవంతం చేసేందుకు విద్యాశాఖ అధికారులు, సంబంధిత శాఖ అధికారులు కృషి చేయాలన్నారు. ఈ సమావేశంలో ఇన్‌చార్జి జేసీ, ఐటీడీఏ పీవో తిరుమణి శ్రీపూజ, డీఈవో బ్రహ్మాజీరావు, సమగ్ర శిక్ష ఏపీసీ స్వామి నాయుడు, హార్టికల్చర్‌ అధికారులు పాల్గొన్నారు.