రామన్నకు షాక్‌

సాక్షి, చైన్నె: పీఎంకే ఎవరిది అన్న చర్చ కేంద్ర ఎన్నికల కమిషన్‌ శనివారం ముగింపు పలికింది. అన్బుమణి గుప్పెట్లోకి పీఎంకే వెళ్లే విధంగా సీఈసీ చేసిన ప్రకటనతో ఆ పార్టీ వ్యవస్థాపకుడు రాందాసు శిబిరం షాక్‌కు గురైంది. అన్బుమణిపై రాందాసు తీవ్రస్థాయిలో విరుచుకు పడ్డారు. వివరాలు.. పీఎంకేలో రాందాసు, అన్బుమణి రాందాసు మధ్యసాగుతున్న వివాదం గురించి తెలిసిందే. అన్బుమణిని పార్టీ నుంచి రాందాసు తొలగించారు. తానే అధ్యక్షుడ్ని అంటూ ఓ వైపు అన్బుమణి నేతృత్వంలో సర్వసభ్య సమావేశం నిర్వహించి కేంద్ర ఎన్నికల కమిషన్‌కు తీర్మానాలు పంపించారు. పార్టీకి తానే వ్యవస్థాపక అధ్యక్షుడ్ని అంటూ రాందాసు నేతృత్వంలో ప్రత్యేక సర్వ సభ్య సమావేశం నిర్వహించి తీర్మానాలను ఎన్నికల కమిషన్‌కు పంపించారు. అలాగే అన్బుమణి స్థానంలో తన కుమార్తె శ్రీగాంధీని వర్కింగ్‌ ప్రెసిడెంట్‌గా రాందాసు నియమించారు. ఈ పరిస్థితులలో అన్బుమణిని పార్టీ అధ్యక్షుడిగా అంగీకరిస్తూ గత నెల కేంద్ర ఎన్నికల కమిషన్‌ పంపిన ఓ లేఖ చర్చకు దారి తీసింది. ఇక పీఎంకే అన్బుమణి గుప్పెట్లో అన్న సంకేతాలు వెలువడ్డాయి. అయితే, అన్బుమణికి పంపిన లేఖకు వ్యతిరేకంగా రాందాసు తరపున కేంద్ర ఎన్నికల కమిషన్‌ను న్యాయవాదులు కలిసి వివరణ ఇవడంతో పార్టీ ఎవరిది? అన్న చర్చ సాగుతూ వచ్చింది. తన పదవీ కాలం ముగిసిన విషయాన్ని దాచి పెట్టి, సర్వ సభ్యసమావేశం తీర్మానాలతో ఎన్నికల కమిషన్‌ను అన్బుమణి తప్పుదోవ పట్టించినట్టుగా రాందాసు తరపున ఫిర్యాదు చేశారు. అదే సమయంలో తన పదవీకాలాన్ని 2026 ఆగస్టు వరకు పొడిగించినట్టు కేంద్ర ఎన్నికల కమిషన్‌కు అన్బుమణి తరపున వివరణ ఇచ్చారు. దీంతో పార్టీని ఎవరికి అప్పగించాలో అని తర్జన భర్జన పడుతూ వచ్చిన ఎన్నికల కమిషన్‌ చివరకు అన్బుమణి గుప్పెట్లోకి అప్పగించడం రాందాసుకు షాక్‌గా మారింది. అన్బుమణికి కేంద్రంలోని బీజేపీ ప్రభుత్వం అండగా ఉండటంతోనే ఎన్నికల కమిషన్‌ పార్టీని ఆయనకు అప్పగించినట్టు ప్రచారం ఊపందుకుంది.

రామన్న ఆగ్రహం

ఎన్నికల కమిషన్‌ తీరుపై రాందాసు తీవ్ర ఆగ్రహంతో ఉన్నారు. ఆయన తరపున అప్పీలు పిటిషన్‌కు న్యాయవాది, ఎమ్మెల్యే బాలు నేతృత్వంలోని బృందం కసరత్తు చేపట్టింది. తమకు షాక్‌ ఇచ్చే విధంగా ఎన్నికల కమిషన్‌ తీసుకున్న నిర్ణయంపై రాందాసు నిశితంగా పరిశీలించే పనిలో పడ్డారు. మీడియాతో ఆయన మాట్లాడుతూ, అన్బుమణి తన వద్ద నుంచి అన్ని లాగేసుకున్నాడని, ఒక్క ప్రాణం తప్పా? అని ఆవేదనతో వ్యాఖ్యలు చేశారు. అన్బుమణి రాజకీయ జీవితం త్వరలో సమాప్తం కానున్నట్టు ఆగ్రహం వ్యక్తం చేశారు. తన సామాజిక వర్గం ప్రజలు తన వెన్నంటే ఉన్నారని , హక్కులను ఎన్నటికీ వదులుకోనని స్పష్టం చేశారు. కాగా, అప్పీలు పిటిషన్‌లో ఏదేని తిరకాసు తలెత్తిన పక్షంలో తక్షణం కొత్త పార్టీ దిశగా సైతం రాందాసు కసరత్తులలో ఉన్నట్టు ప్రచారం ఊపందుకుంది.