రోడ్డు ప్రమాదంలో షబానా అజ్మీకి తీవ్ర గాయాలు

ముంబై: బాలీవుడ్‌ సీనియర్‌ నటి షబానా అజ్మీ రోడ్డు ప్రమాదంలో తీవ్రంగా గాయపడ్డారు. ఈ ఘటన శనివారం మధ్యాహ్నం ముంబై- పూణే హైవే పై జరిగింది. షబానా అజ్మీ ప్రయాణిస్తున్న కారు... వెనుక నుంచి ఓ ట్రక్‌ను ఢీకొంది. ఈ ప్రమాదం జరిగినప్పుడు కారులో షబానా అజ్మీ భర్త జావేద్‌ అక్తర్‌ కూడా ఉన్నారు. ఆయనకు ఎలాంటి గాయాలు కాలేదు. అయితే గత రాత్రే షబానా తన భర్త 75వ జన్మదినాన్ని ముంబైలో జరిపారు. మరోవైపు వారితో ప్రయాణిస్తున్న వారిలో ఓ మహిళకు తీవ్ర గాయాలు కాగా.. కారు డ్రైవర్‌ స్వల్ప గాయాలైనట్లు తెలుస్తోంది. ప్రమాదం జరిగిన వెంటనే షబానా అజ్మీని చికిత్స నిమిత్తం ఎంజీఎం ఆస్పత్రికి తరలించి చికిత్స అందిస్తున్నారు. కాగా ప్రమాదానికి గల పూర్తి వివరాలు ఇంకా తెలియాల్సి ఉంది.