సాక్షి, న్యూఢిల్లీ: దేశ వ్యాప్తంగా జిల్లా కాంగ్రెస్‌ కమిటీ (డీసీసీ)లను బలోపేతం చేయాలన్న లక్ష్యంతో వరుస భేటీలు నిర్వహిస్తున్న కాంగ్రెస్‌ అధిష్టానం మరో కీలక నిర్ణయం తీసుకోనున్నట్లు తెలుస్తోంది. జిల్లాల్లో పార్టీకి మూలస్తంభాలైన డీసీసీ అధ్యక్షులు పార్టీ కార్యలాపాలపై పూర్తి దృష్టి పెట్టేందుకు వీలుగా నియమితులైన మొదటి మూడేళ్ల పాటు ఎన్నికల్లో పోటీ చేయడాన్ని నిషేధించే విషయాన్ని పరిశీలించనున్నట్లు తెలిసింది. క్షేత్రస్థాయిలో పార్టీ బలోపేతంపై ఏఐసీసీ నియమించిన ముకుల్‌ వాస్నిక్‌ కమిటీ చేసిన మూడేళ్ల నిషేధం ప్రతిపాదనను పార్టీ పరిగణనలోకి తీసుకున్నట్లు సమాచారం. వాస్నిక్‌ కమిటీ సిఫార్సుల ప్రకారం డీసీసీ అధ్యక్షులు తమ ఐదేళ్ల పదవీ కాలంలో తొలి మూడేళ్ల పాటు ఎలాంటి ఎన్నికల్లో పోటీకి అనుమతించరు. వీరంతా క్షేత్ర స్థాయిలో పార్టీని బలోపేతం చేయడం, ఓటర్ల జాబితాలను నిర్ధారించడం, ఎన్నికల ప్రచారాన్ని నిశితంగా పరిశీలించడం, సామాజిక ఇంజనీరింగ్, పార్టీ వ్యతిరేక కార్యకలాపాలను ఎదుర్కోవడం, పార్టీ అనుకూల కథనాలను రూపొందించడం, జిల్లాల్లో ని అన్ని స్థాయిలలో మీడియా, సోషల్‌ మీడియా కార్యకర్తలకు శిక్షణ ఇవ్వడం వంటి పనులకు నాయకత్వం వహిస్తారు. అభ్యర్థుల ఎంపికలో, వివిధ పదవులకు నామినీల పరిశీలనలో వీరే క్రియాశీలంగా ఉంటారు. ఎన్నికల్లో గెలుపోటములకు బాధ్యత వహిస్తారు. ఈ మూడేళ్ల తర్వాత పదవుల ఎంపికలో డీసీసీలకు ప్రాధాన్యమిస్తారు. మూడేళ్ల ప్రతిపాదనపై వచ్చే నెలలో గుజరాత్‌లో జరిగే కాంగ్రెస్‌ వర్కింగ్‌ కమిటీ భేటీలో ఓ నిర్ణయం తీసుకునే అవకాశముందని తెలుస్తోంది.

సాక్షి, న్యూఢిల్లీ: పార్లమెంట్‌ శీతాకాల సమావేశాలను వచ్చే నెల 7వ తేదీ నుంచి నిర్వహించేందుకు ఇప్పటికే నోటిఫికేషన్‌ ఇచి్చనప్పటికీ..రాజ్యసభలో ప్రతిపక్ష నేత ఎవరన్న దానిపై ఇంకా కాంగ్రెస్‌ అధిష్టానం ఎటూ తేల్చలేదు. తదుపరి ప్రతిపక్ష నేత ఎంపికపై ఇంతవరకూ కాంగ్రెస్‌ ఎలాంటి చర్చలు జరుపకపోవడంతో ఉత్కంఠ మరికొద్ది రోజులు కొనసాగే అవకాశాలున్నాయి. కనీసం సమావేశాల నాటికైనా కాంగ్రెస్‌ నిర్ణయం చేస్తుందా? లేక ఏఐసీసీ అధ్యక్షుడిగా ఉన్న మల్లికార్జున ఖర్గేనే ప్రతిపక్ష„ నేతగా కొనసాగిస్తుందా? అన్నది కొంత ఆసక్తిగా మారింది. ‘ఒక వ్యక్తికి ఒకే పదవి’అన్న కాంగ్రెస్‌ నిబంధన మేరకు ఏఐసీసీ అధ్యక్షుడిగా నామినేషన్‌ వేసిన రోజునే ప్రతిపక్ష నేత పదవికి రాజీనామా చేస్తూ తన లేఖను అప్పటి పార్టీ అధ్యక్షురాలు సోనియాగాం«దీకి పంపారు. అనంతరం కొత్త నేతను కాంగ్రెస్‌ పార్లమెంటరీ పార్టీ ఛైర్‌ పర్సన్‌ హోదాలో సోనియాగాంధీ ఎంపిక చేయాల్సి ఉన్నప్పటికీ అది జరుగలేదు. ప్రధానంగా పార్టీ సీనియర్‌ నేతలు దిగ్విజయ్‌ సింగ్, జైరాం రమేశ్‌లలో ఒకరిని ప్రతిపక్ష నేతగా ఎన్నుకుంటారని ప్రచారం జరిగింది. కాంగ్రెస్‌ అధ్యక్షుడిగా దక్షిణాదికి చెందిన ఖర్గే ఉన్నందున ఉత్తరాదికి చెందిన దిగ్విజయ్‌కు ఎక్కువ అవకాశాలున్నాయని చర్చ జరిగింది. వీరితో పాటే సీనియర్‌ నేతలు పి.చిదంబరం, ముకుల్‌ వాస్నిక్, ప్రమోద్‌ తివారీలపేర్లు చర్చల్లోకి వచ్చాయి. అయితే శీతాకాల సమావేశాల సమయంలోనూ భారత్‌ జోడో యాత్ర కొనసాగనుంది. ఈ యాత్రలో జైరా, దిగి్వజయ్‌ క్రియాశీలంగా వ్యవహరిస్తున్నారు. వారిద్దరూ సభకు హాజరయ్యే అవకాశాలు తక్కువని కాంగ్రెస్‌ నేతలంటున్నారు. ఈ నేపథ్యంలో ఖర్గేను శీతాకాల సమావేశాల వరకు ప్రతిపక్ష నేతగా కొనసాగిస్తారంటున్నారు. దీనిపై ఏఐసీసీ సభ్యుడు ఒకరు మాట్లాడుతూ ‘సమావేశాలకు కొద్ది రోజుల ముందు ప్రతిపక్ష నేత ఎంపికపై నిర్ణయం చేస్తారు’అని వ్యాఖ్యానించారు. చదవండి: ఆప్ మంత్రి మసాజ్ వీడియోలో ట్విస్ట్

న్యూఢిల్లీ: మహారాష్ట్రకు చెందిన మాజీ కేంద్రమంత్రి, కాంగ్రెస్‌ పార్టీ జనరల్‌ సెక్రటరీ ముకుల్‌ వాస్నిక్‌ 60 ఏళ్ల వయసులో పెళ్లి చేసుకున్నారు. ముకుల్‌ వాస్నిక్‌, ఆయన స్నేహితురాలు రవీనా ఖురానాలు ఢిల్లీలోని ఓ ప్రైవేట్‌ హోటల్‌లో జరిగిన కార్యక్రమంలో అతికొద్ది మంది అతిథుల సమక్షంలో ఒక్కటయ్యారు. ఈ కార్యక్రమానికి రాజస్తాన్‌ ముఖ్యమంత్రి అశోక్‌ గెహ్లాట్‌, కాంగ్రెస్‌ సీనియర్‌ నాయకులు అహ్మద్‌ పటేల్‌ మరికొందరు నేతలు హాజరై వధూవరులను ఆశీర్వదించారు. ముకుల్‌ వాస్నిక్‌ గతంలో కేంద్రమంత్రిగా పనిచేశారు. ఒకానొక దశలో రాహుల్‌ గాంధీ రాజీనామా తర్వాత కాంగ్రెస్‌ అధ్యక్ష పదవికి ముకుల్‌ వాస్నిక్‌ పేరు కూడా ప్రముఖంగా వినిపించింది. కాంగ్రెస్‌ పార్టీలో ముకుల్‌ అనేక బాధ్యతలు నిర్వర్తించారు. కాగా.. ముకుల్‌ వాస్నిక్‌, రవీనా పెళ్లిపై రాజస్థాన్‌ సీఎం స్పందిస్తూ.. 'మీకు హృదయ పూర్వక శుభాకాంక్షలు. కొత్త జీవితాన్ని ప్రారంభించబోతున్నందుకు అభినందనలు. రాబోయే రోజులు మీ జీవితాల్లో సుఖసంతోషాలు నింపాలని కోరుకుంటున్నాను' అంటూ ట్వీట్‌ చేశారు. మరో సీనియర్‌ కాంగ్రెస్‌ నాయకుడు, కేంద్ర మాజీ మంత్రి మనీష్‌ తివారీ స్పందిస్తూ.. 'ముకుల్ వాస్నిక్, రవీనా ఖురానా పెళ్లి చేసుకున్నందుకు సంతోషంగా ఉంది. నేను 1984లో ముకుల్‌ను, 1985లో రవీనాను మొదటిసారిగా కలిశాను. వారిద్దరు పెళ్లి చేసుకోవడం సంతోషించదగ్గ విషయం. మేమంతా కలిసి గతంలో మాస్కోలో జరిగిన వరల్డ్‌ యూత్‌ స్టూడెంట్స్‌ ఫెస్టివల్‌కు హాజరయ్యామంటూ' తివారీ ట్విటర్‌ ద్వారా శుభాకాంక్షలు తెలిపారు.

సాక్షి ప్రతినిధి, న్యూఢిల్లీ: నాయకత్వలేమితో కొట్టుమిట్టాడుతున్న కాంగ్రెస్‌ పార్టీకి నూతన అధ్యక్షుడు ఎవరో మరికొన్ని గంటల్లో తెలియనుంది. లోక్‌సభ ఎన్నికల్లో ఘోర పరాజయం అనంతరం పార్టీ అధ్యక్ష పదవికి రాహుల్‌ రాజీనామా చేయడం, ఆ తర్వాత నుంచి ఆ స్థానం ఖాళీగా ఉండటం తెలిసిందే. కొత్త సారథిని ఎన్నుకునేందుకు పార్టీ అత్యున్నత నిర్ణాయక మండలి అయిన కాంగ్రెస్‌ వర్కింగ్‌ కమిటీ (సీడబ్ల్యూసీ) శనివారం భేటీ కానుంది. కొత్త అధ్యక్షుడిని ఎంపిక చేయడంపై ఓ ఉన్నతస్థాయి సన్నాహక సమావేశాన్ని శుక్రవారమే కాంగ్రెస్‌ మాజీ అధ్యక్షురాలు సోనియా ఇంట్లో నిర్వహించారు. ఏకే ఆంటోనీ, అహ్మద్‌ పటేల్, కేసీ వేణుగోపాల్‌ తదితర కాంగ్రెస్‌ ప్రధాన నాయకులు ఈ సమావేశానికి హాజరయ్యారు. నూతన సారథి రేసులో ఇద్దరి పేర్లే వినబడుతున్నాయి. వారిలో ఒకరు కర్ణాటకకు చెందిన, లోక్‌సభలో కాంగ్రెస్‌ పక్ష నేతగా పనిచేసిన ఖర్గే కాగా, మరొకరు ముకుల్‌ వాస్నిక్‌.   ఖర్గేకే ఎక్కువ అవకాశం.. మల్లికార్జున ఖర్గే తదుపరి అధ్యక్షుడిగా నియమితులయ్యే అవకాశాలు అత్యధికంగా ఉన్నాయని విశ్వసనీయ వర్గాలు చెప్పాయి. ఆయనకు వయస్సు ఎక్కువగా ఉండటం తప్ప మరో ప్రతికూలత ఏదీ లేదు. ప్రస్తుతం 78 ఏళ్ల వయసున్న ఖర్గే.. లోక్‌సభలో కాంగ్రెస్‌ పక్ష నేతగా ఉన్నప్పుడు బీజేపీని చేతనైన మేరకు సమర్థవంతంగా ఎదుర్కొన్నారు. ఇక ముకుల్‌ వాస్నిక్‌ కూడా కొత్త అధ్యక్షుడిగా నియమితులయ్యే అవకాశం ఉందని కొందరు అంటున్నప్పటికీ, ఆయనకు ప్రతికూలతలు ఎక్కువగా ఉన్నాయి. ముకుల్‌ వాస్నిక్‌ సమర్థుడు కాడనీ, వివాదాలకు కేంద్ర బిందువని పార్టీ నాయకులే చాలా మంది ఫిర్యాదు చేశారు. మళ్లీ రాజ్యసభకు మన్మోహన్‌ సింగ్‌ మాజీ ప్రధాని మన్మోహన్‌ను మరోసారి రాజ్యసభకు పంపేందుకు కాగ్రెస్‌ సిద్ధమైంది. బీజేపీ రాజస్తాన్‌ అధ్యక్షుడిగా ఉంటూ రాజ్యసభ ఎంపీ అయిన మదన్‌ లాల్‌ సైనీ ఇటీవలే కన్నుమూయడంతో ఆయన స్థానం ప్రస్తుతం ఖాళీ అయ్యింది. ఇప్పుడు రాజస్తాన్‌లో కాంగ్రెస్‌ అధికారంలో ఉండటంతో ఆ సీటు కాంగ్రెస్‌కు దక్కనుంది. మన్మోహన్‌ 1991 నుంచి ఈ ఏడాది జూన్‌ వరకు అస్సాం నుంచి రాజ్యసభ ఎంపీగా ఉన్నారు.  

సాక్షి, ముంబై : అందరూ ఊహించినట్టుగానే బాలీవుడ్‌నటి  ఊర్మిళ మటోండ‍్కర్  (45) లోక్‌సభ​ ఎన్నికల బరిలోనిలిచారు.  ముంబై నార్త్ లోక్‌సభ అభ్యర్థిగా ఊర్మిళను బరిలో నిలపాలని కాంగ్రెస్  నిర్ణయించింది. ఈ మేరకు  సీఈసీ జనరల్ సెక్రటరీ ఇన్‌చార్జి ముకుల్ వాస్నిక్ అధికారిక ప్రకటన జారీ చేశారు. పార్టీ సెంట్రల్ ఎలక్షన్ కమిటీ పార్టీ అభ్యర్థిగా ఊర్మిళ అభ్యర్థిత్వాన్ని ఆమోదించిందని వెల్లడించారు. తద్వారా కాంగ్రెస్‌కు ఎంతో ప్రతిష్టాత్మకమైన  ఈ స్థానంలో మరోసారి బాలీవుడ్ అస్త్రాన్ని ప్రయోగిస్తోంది. కాంగ్రెస్‌  పార్టీ అధ్యక్షుడు రాహుల్ గాంధీ సమక్షంలో ఈ  బుధవారం పార్టీలో  చేరిన ఊర్మిళ అపుడే మోదీపై విమర్శనాస్త్రాలు సంధించారు. ప్రధాని వ్యక్తిగతంగా మంచి వ్యక్తేనని..కానీ ప్రధానిగా ఆయన అనుసరిస్తున్న విధానాలే మంచివి కావని అన్నారు. ప్రజాస్వామ్యదేశంలో ప్రజలు ఏం తినాలో, ఏం మాట్లాడాలో నిర్ణయించుకునే హక్కును మోదీ కాలరాశారని విమర్శించిన సంగతి తెలిసిందే.  కాగా బాల నటిగా మరాఠీ చిత్రంతో సినిమా రంగంలోకి ప్రవేశించిన ఊర్మిళ మటోండ్కర్‌ హీరోయిన్‌గా పలు బాలీవుడ్ చిత్రాలతో పాటు మరాఠీ, దక్షిణాది చిత్రాల్లోనూ నటించారు. పార్టీలో చేరిన రెండు రోజుల్లోనే ప్రత్యక్ష రాజకీయాల్లోకి ఎంట్రీ ఇవ్వడం ఒక విశేషమైతే బీజేపీకి కంచుకోటలాంటి ముంబై నార్త్‌ నియోజవర్గంలో బరిలోకి  దిగడం మరో విశేషం.   


 కాంగ్రెస్ పార్టీని భ్రష్టు పట్టిస్తున్నవారిపై చర్యలు తీసుకోలేని పరిస్థితి ఉంటే రాబోయే రోజుల్లో కష్టమేనని ఆ పార్టీ నేతలు హెచ్చరించారు. అన్నింటికీ హైకమాండ్ అనుమతి పొందాలంటే ఎలా అంటూ మంగళవారం జరిగిన టీఎన్‌సీసీ సమావేశంలో జాతీయ నేతలను నిలదీశారు.
  
  చెన్నై, సాక్షి ప్రతినిధి :రాష్ట్రంలో కాంగ్రెస్ పార్టీని బలోపేతం చేస్తూ సంస్కరణలు చేపట్టేందుకు ఏఐసీసీ ప్రధాన కార్యదర్శి ముకుల్‌వాస్నిక్ రాష్ట్రంలో పర్యటిస్తున్నారు. రాష్ట్ర కాంగ్రెస్‌ను నాలుగు మండలాలుగా విభజించి ఆయా జిల్లాల అధ్యక్షులతో సమావేశాలు జరుపుతున్నారు. ఇప్పటికి మూడు మండలాలు పూర్తికాగా నాలుగో మండల సమావేశం మంగళవారం చెన్నైలోని సత్యమూర్తి భవన్ (పార్టీ రాష్ట్రశాఖ కార్యాలయం)లో నిర్వహించారు. చెన్నై మండల పరిధిలోని కాంచీపురం, తిరువళ్లూరు తదితర 11 జిల్లాలకు చెందిన అధ్యక్షులు హాజరయ్యారు. సమావేశానికి హాజరైన నేతల్లో అధిక శాతం హైకమాండ్‌పై తమ అసంతృప్తిని వెళ్లగక్కారు. కేంద్ర మాజీ మంత్రి పీ చిదంబరం, అతని కుమారుడు కార్తి చిదంబరంలో మూడు నెలలుగా పార్టీని అల్లకల్లోలం చేస్తున్నారు. వేరు సమావేశాలు నిర్వహించడం, పార్టీని చీలికదిశగా తీసుకెళ్లడం, టీఎన్‌సీసీ అధ్యక్షుడు ఈవీకేఎస్ ఇళంగోవన్‌పై ప్రత్యక్ష విమర్శలు గుప్పించడం ద్వారా వర్గపోరు సాగిస్తున్నారు.
  
   తండ్రీ కొడుకుల వ్యవహారం టీఎన్‌సీసీకి తలనొప్పిగా పరిణమించగా సోనియా, రాహుల్‌కు చెప్పుకోవడం మినహా మరేమీ చేయలేని నిస్సహాయతను ఇళంగోవన్ ఎదుర్కొంటున్నారు. పీ చిదంబరానికి హైకమాండ్ వద్ద మంచి పలుకుబడి ఉన్న కారణంగా సోనియా, రాహుల్ సైతం చూసి చూడనట్లు ఊరుకుంటున్నారు. రాష్ట్రంలో గడ్డుపరిస్థితుల్లో ఉన్న కాంగ్రెస్‌ను గట్టెక్కించాలని ముకుల్‌వాస్నిక్ చేస్తున్న బోధనలను క్యాడర్ తిప్పికొట్టింది. పార్టీలో కొనసాగుతున్న వేర్పాటు వాదుల పనిపట్టే అధికారాలు లేని టీఎన్‌సీసీ పదవి వల్ల ఎంతమాత్రం మేలులేదని వారు స్పష్టం చేశారు. ప్రతి చిన్న విషయానికి డిల్లీకి వెళ్లి హైకమాండ్ అనుమతి పొందే విధానానికి స్వస్తి పలకాలని ముకుల్‌వాస్నిక్‌కు వారు విజ్ఞప్తి చేశారు.
  
  రాహుల్ విశ్రాంతి తప్పుకాదు
  కాంగ్రెస్ సమావేశం ముగిసిన అనంతరం ఇళంగోవన్ మీడియాతో మాట్లాడుతూ, పార్లమెంటు బడ్జెట్ సమావేశాలకు రాహుల్‌గాంధీ హాజరుకాకపోవడంపై వస్తున్న విమర్శలపై స్పందించారు. రాహుల్ గాంధీ విశ్రాంతి తీసుకోవడంలో ఎంత మాత్రం తప్పులేదు, ప్రధానిగా ఉన్నపుడు వాజ్‌పేయి కూడా తీసుకున్నారని వెనకేసుకు వచ్చారు. చిదంబరం, కార్తీ చేస్తున్న విమర్శలపై మాట్లాడి తన సమయాన్ని వృథా చేసుకోనని వ్యాఖ్యానించారు. అసెంబ్లీలో డీఎండీకే ఎమ్మెల్యేల సస్పెన్షన్‌ను నిరసిస్తూ అండగా నిలిచిన కాంగ్రెస్, డీఎంకే పార్టీలకు డీఎండీకే అధినేత విజయకాంత్ ధన్యవాదాలు తెలిపారు.
  


 సాక్షి, ముంబై: విదర్భలోని పది లోక్‌సభ నియోజకవర్గాల పోలింగ్‌కు సర్వం సిద్ధమైంది. ఇన్ని రోజులు రాజకీయ నేతల ప్రసంగాలను విన్న ఓటర్లు నేడు తమ ఓటుతో అభ్యర్థుల తలరాతలు రాసేందుకు సిద్ధమయ్యారు. 19,184 పొలింగ్ కేంద్రాల్లో 1.5 కోట్లకుపైగా ఉన్న ప్రజలు తమ ఓటు వేయనున్నారు. పోలింగ్ కేంద్రాలకు చేరుకునే ఓటర్లకు ఎటువంటి ఇబ్బందులు కలగకుండా ఎన్నికల సంఘం(ఈసీ) అన్ని ఏర్పాట్లు చేసింది.  మావోయిస్టుల ప్రాబల్యమున్న గడ్చిరోలి-చిమూర్, చంద్రాపూర్ ప్రాంతాల్లో కేంద్ర పారా మిలటరీ బలగాలను మొహరించింది.
 
  భద్రత దృషి  కోణంతో మావోయిస్టు ప్రభావిత ప్రాంతాల్లో ఉదయం ఏడు నుంచి మద్యాహ్నం మూడు గంటల వరకు పోలింగ్ నిర్వహించనుంది. మిగతాప్రాంతాల్లో మాత్రం సాయంత్రం ఆరు గంటల వరకు పోలింగ్ కొనసాగనుంది. సమస్యాత్మక ప్రాంతాలతోపాటు మావోయిస్టు ప్రభావిత ప్రాంతాలపై నిఘాతోపాటు ఏదైన సంఘటన జరిగితే వెంటనే స్పందించేందుకు రెండు హెలిక్యాప్టర్లను కూడా సిద్ధంగా ఉంచింది. అలాగే పొలింగ్ కేంద్రాల్లో ఈవీఎంలు మొరాయించిన ప్రత్యామ్నాయ ఏర్పాట్లను ముందే చేసిపెట్టింది. ఎన్నికల విధులు నిర్వహించే ప్రభుత్వ సిబ్బందికి ఇబ్బంది కలగకుండా కనీస వసతులు కల్పించడంపై దృష్టి సారించింది.  ఎండలో వచ్చి ఓటువేసే వారికి పొలింగ్ కేంద్రం వద్ద మంచినీరు అందుబాటులో ఉంచింది.
 
  వృద్ధులు, వికలాంగులకు తగిన ఏర్పాట్లు చేసింది. ఇదిలావుండగా లోక్‌సభ ఎన్నికల బరిలో ఉన్న అభ్యర్థులకు టెన్షన్ మొదలైంది. ఓటర్లు ఎటువైపు మొగ్గు చూపుతారో అన్న ఆందోళన వారిలో కనబడుతోంది. కేంద్ర మంత్రి ప్రఫుల్ పటేల్‌తోపాటు ముఖుల్ వాస్నిక్, నితిన్ గడ్కారి, విలాస్ ముత్తెంవార్ మొదలగు దిగ్గజ నాయకులకు ఈ ఎన్నికలు ప్రతిష్టాత్మకంగా మారాయి. విదర్భలోని 1.5 కోట్లకుపైగా ఉన్న ఓటర్లు మంగళవారం 201 మంది అభ్యర్థుల భవితవ్యాన్ని ఈవీఎంలలో భద్రపరచనున్నారు.
 
  ఎన్నికలు జరిగే నియోజకవర్గాలివే...
  బుల్డానా, అకోలా, అమరావతి, వర్ధా, రాంటెక్, నాగపూర్, భండారా-గోండియా, గడ్చిరోలి-చిమూర్, చంద్రాపూర్, యావత్మాల్-వాషీం.
 
  ప్రముఖ అభ్యర్థులు...
  నితిన్ గడ్కారీ, ప్రఫుల్ పటేల్, విలాస్ ముత్తెంవార్, ముఖుల్ వాస్నిక్, అంజలి దమానియా, శివాజీరావ్ మోఘే, సంజయ్ దేవతలే, నామదేవ్ ఉసెండి, సాగర్ మోఘే, ఆనంద్ అడ్సూల్, భావనా గావ్లీ, ప్రతాప్ జాధవ్, సంజయ్ ధోత్రే, రామ్‌దాస్ తడస్, హంసరాజ్ ఆహీర్, అశోక్ నేతే, నవనీత్ కౌర్, ప్రకాష్ అంబేద్కర్
 
  ముఖ్యమైన వివరాలు..
      10 లోకసభ నియోజకవర్గాల్లోని ఓటర్ల సంఖ్యః  1,66,39,267
      పోలింగ్ కేంద్రాల సంఖ్యః 19,184
      సమస్యాత్మక  పోలింగ్ కేంద్రాలుః 556
      ఈవీఎంల సంఖ్యః 41,661
      ఎన్నికల సిబ్బంది సంఖ్యః 1,43,880


  న్యూఢిల్లీ: ఆమ్ ఆద్మీ పార్టీకి తమ మద్దతు ఉపసంహరించుకునే విషయంలో తొందరపడబోమని కాంగ్రెస్ పార్టీ పేర్కొంది. అయితే ఆ పార్టీ పాలనాతీరుపై అసంతృప్తిగానే ఉన్నామని తెలిపింది. సోమ్‌నాథ్ భారతి వ్యవహారం, రాష్ట్రపతి తన గణతంత్ర దినోత్సవ ప్రసంగంలో ఆ పార్టీపై చేసిన వ్యాఖ్యల నేపథ్యంలో కాంగ్రెస్ పైవిధంగా స్పందించింది. ఈ విషయమై కాంగ్రెస్ పార్టీ అధికార ప్రతినిధి ముకుల్ వాస్నిక్ మాట్లాడుతూ.. ‘ఆమ్ ఆద్మీ పార్టీకి మద్దతు ఉపసంహరణ విషయంలో తుది నిర్ణయం తీసుకునే ముందు అనేక విషయాలను పరిగణనలోకి తీసుకోవాల్సి ఉంటుంది. ఇవాళ మద్దతు పలికి రేపు ఉపసంహరించుకునే తొందర మాకు లేదు. అయితే ఆప్ ఆగడాలను చిన్న విషయాలుగా కొట్టిపారేయలేం. దేన్నీ తేలికగా తీసుకోం. అదే సమయంలో సహనంతో వ్యవహరిస్తామ’న్నారు.
  
  ఢిల్లీలో రాజకీయంగా చోటుచేసుకుంటున్న పరిణామాలను కాంగ్రెస్ పార్టీ క్షణక్షణం గమనిస్తూనే ఉందని, వాటిని సరిదిద్దుకునేందుకు ఆ పార్టీకి తాము ఎటువంటి డెడ్‌లైన్‌ను కూడా విధించడంలేదన్నారు. ఎన్నికల భారాన్ని ప్రజలపై మరోమారు మోపకుండా ఉండేందుకే ఆమ్ ఆద్మీ పార్టీకి తాము మద్దతునిచ్చామని, ఆ పార్టీ ఏది చేసినా చూస్తూ ఊరుకుంటామనుకోవడం సరికాదన్నారు. ఇక బిన్నీ వివాదం గురించి విలేకరులు అడిగిన ప్రశ్నకు వాస్నిక్ సమాధానమిస్తూ... ఆ వివాదం గురించి తాను మాట్లాడడం సరికాదన్నారు. అయితే బిన్నీ డిమాండ్లలో ఒకటైన సోమ్‌నాథ్‌ను తొలగించాలన్న వాదనకు తాము కూడా మద్దతు పలుకుతామన్నారు. రాష్ట్రపతి వ్యాఖ్యలను తప్పుబట్టేటంత సాహసం చేయడం సరికాదన్నారు. ఈ విషయంలో సోమ్‌నాథ్ వైఖరిని తాము ఖండిస్తున్నామని చెప్పారు.
  
  బిన్నీ లేవనెత్తిన అంశాలు తీవ్రమైనవే...
  ఇదిలా ఉండగా ఆప్ పాలనపై బీజేపీ నేతలు కూడా అసంతృప్తిని వ్యక్తం చేశారు.  వినోద్‌కుమార్ బిన్నీ ఆప్ పాలనపై, ఆ పార్టీ నేతలపై లేవనెత్తిన అంశాలు తీవ్రమైనవేనని, వాటిని కొట్టి పారేయడానికి వీలు లేదని,  వాటిపై ఆప్ ఆత్మ విమర్శ చేసుకోవాలని అసెంబ్లీలో ప్రతిపక్ష నేత డాక్టర్ హర్షవర్ధన్ పేర్కొన్నారు. బిన్నీ ప్రశ్నలకు ఆప్ నేతలు సమాధానం ఇవ్వాల్సిందేనని, ప్రజలు కూడా ఆప్ ఏం సమాధానమిస్తుందోనని ఎదురు చూస్తున్నారన్నారు.  ఈ విషయంపై ముఖ్యమంత్రి అరవింద్ కేజ్రీవాల్ వెంటనే స్పందించాలని తాము కోరుతున్నామన్నారు. బాధ్యతాయుతమైన పదవి లో ఉన్న ఆయన ప్రజలకు జవాబుదారిగా ఉండా ల్సిన అవసరముందన్నారు.