మరో ఫ్రాంచైజీతో ఒప్పందం చేసుకున్న ఆర్సీబీ హెడ్‌ కోచ్‌

మహిళల ఆర్సీబీ హెడ్‌ కోచ్‌ లూక్‌ విలియమ్స్‌ మహిళల హండ్రెడ్‌ లీగ్‌లోకి ఎంట్రీ ఇచ్చాడు. 2025 సీజన్‌ కోసం సథరన్‌ బ్రేవ్‌ హెడ్‌ కోచ్‌గా ఎంపికయ్యాడు. ప్రస్తుత కోచ్‌ చార్లోట్‌ ఎడ్వర్డ్స్‌ ఇంగ్లండ్‌ మహిళల జట్టుకు హెడ్‌ కోచ్‌గా వెళ్లడంతో లూక్‌ నియామకం జరిగింది.

లూక్‌ హండ్రెడ్‌ లీగ్‌ ప్రారంభ ఎడిషన్‌ నుంచి చార్లోట్‌ ఎడ్వర్డ్స్‌కు డిప్యూటీగా వ్యవహరించాడు. వీరి ఆధ్వర్యంలో బ్రేవ్‌ 2021, 2022 ఎడిషన్లలో రన్నరప్‌గా.. 2023 ఎడిషన్‌లో విజేతగా నిలిచింది.

లూక్‌ మహిళల ఐపీఎల్‌లో స్మృతి మంధన నేతృత్వంలోని ఆర్సీబీకి తొలి టైటిల్‌ను అందించాడు. 2024 ఎడిషన్‌లో లూక్‌ ఆధ్వర్యంలో ఆర్సీబీ టైటిల్‌ ఎగరేసుకుపోయింది. లూక్‌కు మహిళల బిగ్‌బాష్‌ లీగ్‌లోనూ ఘనమైన ట్రాక్‌ రికార్డు ఉంది. అతని ఆథ్వర్యంలో అడిలైడ్‌ స్ట్రయికర్స్‌ వరుసగా 2022, 2023 ఎడిషన్లలో విజేతగా నిలిచింది.

బ్రేవ్‌ ఫ్రాంచైజీ రానున్న సీజన్‌ కోసం లూక్‌తో పాటు మరో కీలక నియామకం చేపట్టింది. ఆ ఫ్రాంచైజీ తమ బ్యాటింగ్‌ కోచ్‌గా ఇంగ్లండ్‌ మాజీ ఓపెనర్‌ మార్కస్‌ ట్రెస్కోధిక్‌కు నియమించుకుంది. జిమ్మీ కానర్స్‌ స్థానంలో ట్రెస్కోధిక నియామకం జరిగింది.

సథరన్‌ బ్రేవ్‌ గత సీజన్‌లో ఘోర ప్రదర్శన చేసింది. 8 మ్యాచ్‌ల్లో ఒకే ఒక విజయం సాధించి పాయింట్ల పట్టికలో చిట్టచివరి స్థానంలో నిలిచింది.

2025 మహిళల హండ్రెడ్‌ లీగ్‌ కోసం సథరన్ బ్రేవ్ జట్టు.. 
లారా వోల్వార్డ్, డాని వ్యాట్-హాడ్జ్, మైయా బౌచియర్, లారెన్ బెల్, ఫ్రెయా కెంప్, జార్జియా ఆడమ్స్, టిల్లీ కోర్టీన్-కోల్‌మన్, రియానా సౌత్‌బై, సోఫీ డెవిన్, క్లోయ్ ట్రయాన్, మాడీ విలియర్స్, జోసీ గ్రోవ్స్, ఫోబ్ గ్రాహం