TV
ఐపీఎల్‌-2024లో ఢిల్లీ క్యాపిటల్స్‌కు బిగ్‌ షాక్‌ తగిలింది. ఆస్ట్రేలియా టీ20 కెప్టెన్‌, ఆ జట్టు స్టార్‌ ఆల్‌రౌండర్‌ మిచెల్‌ మార్ష్‌ గాయం కారణంగా ఈ ఏడాది సీజన్‌ మధ్య నుంచి వైదొలిగాడు. మార్ష్‌ ప్రస్తుతం తొడ కండరాల గాయంతో బాధపడుతున్నాడు. ఈ క్రమంలో తన గాయానికి శస్త్ర చికిత్స చేయించుకోవడం కోసం మార్ష్‌ తన స్వదేశానికి వెళ్లినట్లు ప్రముఖ క్రీడా వెబ్‌సైట్‌ ఈఎస్పీఎన్‌ క్రిక్‌ ఇన్‌ఫో తెలిపింది.
ఢిల్లీ టీమ్ మేనేజ్‌మెంట్‌తో సంప్రదింపుల తర్వాతే అతడు ఆస్ట్రేలియాకు వెళ్లినట్లు ఈఎస్పీఎన్‌ పేర్కొంది. కాగా ఈ ఏడాది జూన్‌లో జరగనున్న టీ20 వరల్డ్‌కప్‌ దృష్ట్యా మార్ష్‌ తన గాయానికి సర్జరీ చేసుకోవాలని నిర్ణయించుకున్నాడు. ఈ గాయం కారణంగానే ఢిల్లీ ఆడిన ఆఖరి రెండు మ్యాచ్‌లకు మార్ష్‌ దూరమయ్యాడు.
అయితే మార్ష్‌ ఈ ఏడాది సీజన్‌లో తన స్ధాయికి తగ్గ ప్రదర్శన చేయలేకపోయాడు. రాజస్తాన్‌ రాయల్స్‌పై చేసిన 23 పరుగులకే అతడి టాప్‌ స్కోర్‌గా ఉంది. బౌలింగ్‌లో కూడా కేవలం ఒకే వికెట్‌ సాధించాడు.
