సహజంగా ప్రతి మొక్క విడివిడిగా మొలకెత్తి వృక్షాలుగా మారుతాయి. కానీ గుమ్మఘట్ట మండలం కలుగోడుకు చేరే ప్రధాన రహదారి పక్కన జే వెంకటంపల్లి సమీపాన జువ్వి, తాటి చెట్లు ఒకే పాదులో మొలిచాయి. ఒకదానికి ఒకటి పెనేసుకొనిపోయే ఎదుగుతున్నాయి. ఈ ప్రాంతం మీదుగా వెళ్లే ప్రతి ఒక్కరూ ఈ చెట్లను చూసి ఆశ్చర్యానికి గురవుతుంటారు. 
 – గుమ్మఘట్ట


 గుమ్మఘట్ట (రాయదుర్గం) : వర్షాలు సంవృద్ధిగా కురిపించి, కష్టాల నుంచి గట్టెంక్కించు శివయ్యా అంటూ  గుమ్మఘట్ట మండలం కలుగోడు గ్రామస్తులు వేడుకున్నారు. ఆదివారం వేద మంత్రోచ్ఛారణల మధ్య శివాలయంలో మహా కుంబాభిషేకం నిర్వహించారు. గర్భ ఆలయంలో శివుడి విగ్రహాన్ని పూర్తి నీటిలో మునిగేలా రెండు ట్యాంకర్ల నీరు పట్టారు. 12 గంటల పాటు శివలింగం పూర్తి నీటిలోనే ఉంచి శివనామ స్వరాన్ని మార్మోగించారు.
 
 రాత్రంతా అఖండ భజన చేపట్టనున్నట్టు ఆలయ కమిటీ సభ్యుడు సత్యనారాయణస్వామి, అర్చకుడు ఈరణ్ణ స్వామి తెలిపారు. సోమవారం ఉదయం స్వామికి రుద్రాభిషేకం, పూర్ణాభిషేకం, కుంకుమార్చన తదితర పూజ కార్యక్రమాలు చేపడతామన్నారు. అనంతరం అన్నదానం చేపడతామన్నారు.


 గుమ్మఘట్ట (రాయదుర్గం) : గుమ్మఘట్ట మండలం కలుగోడు గ్రామ చెరువు వద్ద ఉపాధి పనులు చేస్తూ రమేశ్‌(34) అనే కూలీ కుప్పకూలి మరణించాడు. మృతుని భార్య అంజినమ్మ, తోటి కూలీల కథనం మేరకు.. ఎండ తీవ్రత ఎక్కువగా ఉండడంతో ఉన్నపళంగా స్పృహతప్పి పడిపోయాడన్నారు. వెంటనే రాయదుర్గం ఆస్పత్రికి తరలిస్తుండగా మార్గమధ్యంలోనే మరణించినట్లు వివరించారు. విషయం తెలిసిన వెంటనే ఎస్‌ఐ హైదర్‌వలి, తహశీల్దార్‌ అఫ్జల్‌ఖాన్‌, ఎంపీడీఓ మునెప్ప ఘటనా స్థలికి చేరుకున్నారు. మృతదేహాన్ని పరిశీలించి, పోస్టుమార్టం కోసం ఆస్పత్రికి తరలించారు. 


 పిడుగుపాటుకు ఐదుగురు మృతి
 మరో ఆరుగురికి తప్పిన ప్రమాదం
 
 రాష్ట్రంలోనే అత్యల్ప వర్షపాతం నమోదైన ప్రాంతంగా రికార్డులకెక్కిన గుమ్మఘట్ట మండలంలో ఆదివారం వర్షం కురిసింది. వ్యవసాయ పనులు, పశువుల మేపునకు వెళ్లిన వారంతా చెట్టు చాటుకు చేరి.. ఇక తమ కష్టాలు తీరబోతున్నాయని సంబరపడ్డారు. అయితే వారి ఆనందాన్ని ఆవిరిచేస్తూ పిడుగుపాటు వారి జీవితాలను కబళించింది. ఈ ఘటనలో అక్కడికక్కడే ఐదుగురు మృతి చెందగా, మరో ఆరుగురు గాయాలపాలయ్యారు.
  - గుమ్మఘట్ట (రాయదుర్గం)
 
 కలుగోడుకు చెందిన గొల్లపల్లి ఓబన్న, జయణ్ణతో పాటు బీటీ బొమ్మయ్య, నజ్‌బూన్‌బీలు మేకలు, పశువులు మేపేందుకు గ్రామ చెరువు సమీపానకు వెళ్లారు. అప్పటిదాకా భానుడి భగభగలు తట్టుకోలేకపోయిన వారు ఉన్నట్టుండి మేఘాలు కమ్ముకోవడంతో వాతావరణం చల్లబడిందని ఊపిరి పీల్చుకున్నారు. ఇంతలో చినుకులు మొదలు కావడంతో పశువులు, గొర్రెలు, మేకలు తొలుకుని ఇంటి ముఖం పట్టారు. కాసింత దూరం రాగానే కళ్లు తెరవలేనంతగా గాలి, వాన ప్రారంభమైంది. ఆ పక్కనే ఉన్న రాయదుర్గం తిప్పేస్వామి పొలం వద్ద ఏర్పాటు చేసిన గోడచాటు సిమెంట్‌ రేకుల(షెడ్డు)లోకి వెళ్లి తలదాచుకున్నారు.
 
 తాపీమేస్త్రీగా పని చేసే కరీమ్‌సాబ్‌ తోటి స్నేహితుడు రుద్ర, చిన్నాన్న కుమారుడు జెబీ, అన్న కుమారుడు దాదుతో కలసి అదే పొలం వద్దనున్న వ్యవసాయ బోరువద్దకు స్నానం కోసం వెళ్లారు. గాలి, వాన హోరు చూసి వారుకూడా అక్కడికే చేరారు. కంతార్లపల్లి గిరిరెడ్డి ఇటీవల మృతి చెందిన వదిన సరస్వతి సమాధికి గుట్టకట్టేందు కోసం చెరువు సమీపాన సున్నపు రాయి (కంకర) ఏరేందుకు గుంతలో మల్లేసి, సొట్టకాళ్లప్ప గారి వెంకటేశులుతో వెళ్లాడు. ఈ మగ్గురు కూడా రేకుల చప్పరం కిందకే చేరారు. ఎంబీఏ విద్యార్థి బోయ శివప్ప పక్క పొలంలో రాగులు కుప్ప చేస్తూ వర్షం చూసి వారి వద్దకు వెళ్లాడు. ఇలా మొత్తం పది మంది ఒకేచోటకు చేరారు.
 
 అంతా నిమిషాల వ్యవధిలోనే..
 వర్షం కురిస్తే చాలని మాట్లాడుతుండగానే రేకులకు ఆనుకుని ఉన్న వేపమానుపై భీకర శబ్ధంతో పిడుగు పడింది. దీంతో అక్కడున్న పది మంది కుప్పకూలిపోయారు. వీరిలో మొదటగా పోస్టు రుద్ర, జెబీ అనే ఇద్దరు స్నేహితులకు స్పృహ వచ్చింది. వారు ఒకరి కొకరు అలింగనం చేసుకుని గట్టిగా ఏడ్చారు. ఆ తరువాత మిగిలిన వారందరినీ అటు ఇటు ప్లొరిస్తూ..అరచి లేపినా పలకలేదు. పది నిమిషాల తరువాత మరో ముగ్గురు లేవగా.. మిగిలిన ఐదుగురు గొల్లపల్లి ఓబన్న (38), అంపణ్ణగారి జయణ్ణ (58), కరీమ్‌సాబ్‌ (32), కంతార్లపల్లి గిరిరెడ్డి (38), బోయ శివప్ప (25) ప్రాణాలు వదిలారు. గ్రామంలోకి పరుగున వచ్చి విషయాన్ని తెలియజేశారు. ఆర్డీఓ రామారావు, తహసీల్ధార్‌ అఫ్జల్‌ఖాన్, వైద్యాధికారి రమేష్, సీఐ చలపతిలు సంఘటన స్థలానికి చేరుకుని మృతుల వివరాలు సేకరించారు. పిడుగు పడడంతోనే మృతి చెందారని వైద్యులు నిర్ధారించారు. ఐదుగురు మృతితో కలుగోడులో విషాదం చోటు చేసుకుంది. దేవుడా తమ బతుకులు ఇలా ఆర్పావా అంటూ మృతుల కుటుంబ సభ్యులు రోదించడం అందరినీ కలచివేసింది.
  
 మృతులంతా నిరుపేదలే..
 పిడుగుపాటు మృతులు ఐదుగురూ నిరుపేదలే. గొల్లపల్లి ఓబన్నకు భార్య పార్వతితో పాటు నాగరాజు, మారుతి అనే చిన్న పిల్లలు ఉన్నారు. మేకలు కాస్తూ కుటుంబాన్ని పోషించేవాడు. ఇంటి పెద్ద దిక్కును కోల్పోవడంతో భార్యా, పిల్లలు అనాథలయ్యారు.
 - అంపణ్ణగారి జయణ్ణకు భార్య గిరిజమ్మ తో పాటు కుమారుడు హంపణ్ణ ఉన్నాడు. ఇతను బతుకు తెరవు కోసం భార్యతో కలసి బెంగళూరుకు వెళ్లగా, ఇంటివద్ద ఉన్న పశువులను మేపుతూ కూలి పనుల వల్ల జీవనం సాగించేవాడు.
 -  కరీమ్‌సామ్‌ తాపీమేస్త్రీ. భార్య జబీనాబీతో పాటు ఇద్దరు చిన్న కుమార్తెలు ఉన్నారు. అత్యంత నిరుపేద. కనీసం ఇల్లు కూడా లేదు. అన్న ఇంట్లోనే కాపురం ఉంటున్నాడు.
 - కంతార్లపల్లి గిరిరెడ్డికి రెండెకరాల పొలం ఉంది. నీళ్లులేక బీడుపెట్టి బతుకుదెరువు కోసం బెంగళూరుకు కూలి పనికోసం వెళ్లేవాడు. ఇతడికి భార్య లక్ష్మితో పాటు ప్రవీణ్, సంధ్య అనే ఇద్దరు ఇంటర్‌ చదువుతున్న పిల్లలు ఉన్నారు. తండ్రి మరణంతో వీరి భవిష్యత్తు ప్రశ్నార్థకంగా మారింది.
 - బోయ శివప్ప ఇటీవల ఎంబీఏ పూర్తి చేశాడు. ఉద్యోగం సాధిస్తాడనుకున్న కుమారుడు పిడుగు రూపంలో కుప్పకూలి పోవడంతో కుటుంబంలో తీరని విషాదం మిగిలింది.  
 
 మృతుల కుటుంబ సభ్యులకు పరామర్శ
 పిడుగుపాటుకు గురైన ఐదుగురు మృతదేహాలను పోస్టుమార్టం నిమిత్తం రాయదుర్గం ప్రభుత్వాస్పత్రికి తరలించారు. ఎంపీపీ పాలయ్య, మాజీ ఎంపీపీలు రాఘవరెడ్డి, గిరిమల్లప్ప, వైఎస్సార్‌సీపీ జిల్లా స్టీరింగ్‌ కమిటీ సభ్యులు మహేష్‌లు మృతుల కుటుంబ సభ్యులను పరామర్శించి, ధైర్యం చెప్పారు. జాయింట్‌ కలెక్టర్‌ టి.కె.రమామణి ఆస్పత్రికి వచ్చి పరిస్థితి గురించి అడిగి తెలుసుకున్నారు.
 
 ఈ నరకం ఎవరికీ వద్దు
 అప్పటిదాకా ఆనందంగా గడిపాం. వర్షం వస్తే పశువులకు గడ్డి కష్టాలు కూడా తీరుతాయి, మూగజీవాలకు కొద్దో గొప్పో తాగేందుకు నీరుకూడా లభిస్తుందనుకున్నాం. ఇంతలోనే ఆదేవుడు మాపై పగపట్టినట్టు పిడుగు రూపంలో కకావికలం చేశాడు. మేము ప్రాణాలతో బయటపడి ఊపిరిపీల్చుకున్నాం. తోటి వ్యక్తులు ప్రాణాలు వదిలారు. ఇప్పటికీ ఆ షాక్‌ నుంచి తేరుకోలేకపోయాం. ఇటువంటి నరకం ఎవరికీ రాకూడదు.
 - పోస్టు రుద్ర, జెబీ, ప్రత్యక్ష సాక్షులు, కలుగోడు
 
 రూ.15 లక్షల ఎక్స్‌గ్రేషియా ఇవ్వాలి
 ఒకే గ్రామానికి చెందిన ఐదుగురు పిడుగు పాటుతో మృతి చెందడం అత్యంత బాధకరం. తీరనిలోటు. మృతుల కుటుంబాలకు అన్ని విధాలా అండగా ఉంటాం. మృతులంతా పేదలు కావడంతో ఒక్కో కుటుంబానికి రూ.15 లక్షల ఎక్స్‌గ్రేషియాను ప్రభుత్వం తక్షణం ప్రకటించాలి. గాయపడ్డ వారికి రూ.5 లక్షల పరిహారం అందించాలి.
 - కాపు రామచంద్రారెడ్డి, మాజీ ఎమ్మెల్యే, రాయదుర్గం


 గుమ్మఘట్ట : మండలంలోని కలుగోడు సమీపంలో పెను ప్రమాదం త్రుటిలో తప్పింది. వరిగడ్డి లోడుతో బయలుదేరిన ట్రాక్టర్‌ ప్రమాదవశాత్తు విద్యుత్‌ ప్రమాదానికి గురైంది. ఆ సమయంలో డ్రైవర్‌ సహా అందులో ప్రయాణిస్తున్న ముగ్గురు వ్యక్తులు అత్యంత చాకచక్యంగా తప్పించుకోవడంతో అందరూ ఊపిరిపీల్చుకున్నారు. గ్రామానికి చెందిన గొల్ల చిన్నబడప్ప అనే రైతు బొమ్మనహాళ్‌ మండలం నుంచి వరిగడ్డి కొనుగోలు చేసి ట్రాక్టర్‌లో స్వగ్రామానికి తరలిస్తున్నారు.
 
 మార్గమధ్యంలో వ్యవసాయ బోర్లకు సరఫరా అవుతున్న విద్యుత్‌ తీగలు తగలి నిప్పురవ్వలు ఎగిసిపడ్డాయి. దీంతో మంటలు చెలరేగి ట్రాక్టర్‌పై పడ్డాయి.  డ్రైవర్‌తో సహ మరో ఇద్దరు ఇంజ¯ŒSలో కుర్చుకుని ప్రయాణిస్తుండగా ప్రమాదాన్ని గమనించి కిందకు దూకేశారు. మంటలు గమనించిన స్థానికులు పెద్ద ఎత్తున తరలివెళ్లి గడ్డిని ట్రాక్టర్‌ నుంచి కిందకు పడేశారు. ఇంజన్, ట్రాలి దగ్ధం కాకుండా కాపాడారు. సంఘటనలో రూ.15 వేల వరిగడ్డి కాలిపోయింది.