గవర్నర్‌కు టీఎస్‌పీఎస్సీ వార్షిక నివేదిక

హైదరాబాద్‌: తెలంగాణ పబ్లిక్‌ సర్వీస్‌ కమిషన్‌ వార్షిక నివేదికను రాష్ట్ర గవర్నర్‌ ఈఎస్‌ఎల్‌ నరసింహన్‌కు అందజేసింది. కమిషన్‌ చైర్మన్‌ ఘంటాచక్రపాణి నేతృత్వంలో సభ్యులు గవర్నర్‌ను గురువారం కలిసి నివేదిక అందజేశారు. అనంతరం చక్రపాణి మాట్లాడుతూ ఇప్పటి వరకు తాము నిర్వహించిన పరీక్షలు, ప్రకటించిన ఫలితాలు, ఇచ్చిన ఉద్యోగాలకు సంబంధించిన వివరాలు, వాటితోపాటు మిగతా మొత్తం పబ్లిక్ సర్వీస్ కమిషన్ ఏడాది కాలంలో సాధించిన ప్రగతికి సంబంధించిన అన్ని వివరాలను నివేదికలో పొందుపరిచామన్నారు. తమ పనితీరుపై గవర్నర్ సంతృప్తి వ్యక్తం చేశారని చెప్పారు. మరింత ప్రగతిశీలంగా పురోగామి దిశగా పని చేయాలని ఆకాంక్షను వ్యక్తం చేశారన్నారు.