TV
పాకిస్తాన్‌ సూపర్‌ లీగ్‌ (పీఎస్‌ఎల్‌) ఎనిమిదో ఎడిషన్‌ ఓపెనింగ్‌ మ్యాచ్‌లో నిన్న (ఫిబ్రవరి 13) లాహోర్‌ ఖలందర్స్‌- ముల్తాన్‌ సుల్తాన్స్‌ జట్లు తలపడ్డాయి. ఈ మ్యాచ్‌లో ముల్తాన్‌ సుల్తాన్స్‌పై లాహోర్‌ టీమ్‌ పరుగు తేడాతో విజయం సాధించింది. టాస్‌ ఓడి తొలుత బ్యాటింగ్‌ చేసిన లాహోర్‌ జట్టు.. ఫకర్‌ జమాన్‌ (42 బంతుల్లో 66; 3 ఫోర్లు, 5 సిక్సర్లు) మెరుపు హాఫ్‌ సెంచరీతో విరుచుకుపడటంతో నిర్ణీత ఓవర్లలో 6 వికెట్ల నష్టానికి 175 పరుగులు చేసింది. మీర్జా బేగ్‌ (32), షాయ్‌ హోప్‌ (19), సికందర్‌ రజా (19 నాటౌట్‌), తలాట్‌ (20) ఓ మోస్తరుగా రాణించారు. సుల్తాన్స్‌ బౌలర్లలో ఇహ్సానుల్లా, ఉసామా మీర్‌ తలో 2 వికెట్లు, అకీల్‌ హోసేన్‌, దహాని చెరో వికెట్‌ దక్కించుకున్నారు.
అనంతరం 176 పరుగుల లక్ష్య ఛేదనకు దిగిన సుల్తాన్స్‌.. మహ్మద్‌ రిజ్వాన్‌ (50 బంతుల్లో 75; 8 ఫోర్లు, సిక్స్‌) హాఫ్‌ సెంచరీతో చెలరేగినప్పటికీ ఉపయోగం లేకుండా పోయింది. రిజ్వాన్‌కు జతగా షాన్‌ మసూద్‌ (35), డేవిడ్‌ మిల్లర్‌ (25), కీరన్‌ పోలార్డ్‌ (20), కుష్‌దిల్‌ షా (12 నాటౌట్‌) ఓ మోస్తరుగా రాణించారు. ఖలందర్స్‌ బౌలర్‌ జమాన్‌ ఖాన్‌ వేసిన ఆఖరి ఓవర్లో సుల్తాన్స్‌ 15 పరుగులు సాధించాల్సి ఉండగా.. కేవలం 13 పరుగులు మాత్రమే వచ్చాయి. ఫలితంగా సుల్తాన్స్‌ పరుగు తేడాతో ఓడింది. నిర్ణీత ఓవర్లు ముగిసే సరికి ఆ జట్టు 6 వికెట్ల నష్టానికి 174 పరుగులు చేసింది.
ఇదిలా ఉంటే, ఈ మ్యాచ్‌లో ఖలందర్స్‌ ఓపెనర్‌ ఫకర్‌ జమాన్‌ ఓ అరుదైన మైలురాయిని చేరుకున్నాడు. పీఎస్‌ఎల్‌లో 2000 పరుగులు పూర్తి చేసిన రెండో ఆటగాడిగా రికార్డుల్లోకెక్కాడు. గతంలో బాబర్‌ ఆజమ్‌ మాత్రమే ఈ మైలురాయిని అధిగమించాడు. పీఎస్‌ఎల్‌లో 68 మ్యాచ్‌లు ఆడిన బాబర్‌ 2413 పరుగులు సాధించగా.. 64 మ్యాచ్‌లు ఆడిన ఫకర్‌ జమాన్‌ 2005 పరుగులు చేశాడు.
