అమెరికాలో పిల్లలను కనే టీనేజ్‌ తల్లుల సంఖ్య బాగా తగ్గుతోంది. 2015తో పోల్చితే కిందటేడాది ఇలాంటి ‘చిట్టి తల్లుల’ సంఖ్య 9శాతం తగ్గిందని ప్రభుత్వ తాజా నివేదిక ఒకటి వెల్లడించింది. 1970లు, 80ల్లో అమెరికాను కలవరపెట్టిన టీనేజ్‌ తల్లుల సంఖ్య గత కొంత కాలంగా పడిపోతూనే ఉంది. 1991 నుంచి దేశంలో టీనేజ్‌ ఆడపిల్లలు కనే సంతానం సంఖ్య 67శాతం తగ్గిపోయిందని అమెరికా ఆరోగ్య గణాంక కేంద్రం వివరించింది. టీనేజీ పిల్లలు తల్లులు కావడం కావాలని జరిగేది కాదని, సంతాన నిరోధక సాధనాల విస్తృత వినియోగం వల్లే ఇలాంటి జననాలు తగ్గుతున్నాయని ప్రఖ్యాత వైద్యురాలు డా.ఎలిస్‌ బెర్లాన్‌ చెప్పారు. 2016లో మొత్తం జననాల సంఖ్య 39, 41, 109. అంటే 2015తో పోల్చితే జననాలు ఒక శాతం తగ్గాయి. ప్రతి వేయి మంది స్త్రీలు సగటున 62 మంది పిల్లలను కనడమంటే అమెరికాలో ఆడవాళ్లు పిల్లలు కనడం బాగా తగ్గించేశారనే భావించాలి.
 
 లేటు వయసులో తల్లులు!
 ఓ పక్క టీనేజ్‌ తల్లుల సంఖ్య తగ్గుతుంటే, లేటుగా జన్మనిచ్చే స్త్రీలు అమెరికాలో పెరుగుతున్నారు. 30, 34 ఏళ్ల మధ్య తల్లులవుతున్నవారి సంఖ్య 1964 తర్వాత మొదటిసారి ఒక శాతం పెరిగింది. ఇక 40-44 ఏళ్ల వయసులో పిల్లలు కనే స్త్రీల సంఖ్య అంతకుముందు ఏడాది కన్నా(2015) నాలుగు శాతం (1966 తర్వాత మొదటిసారి) పెరగడం విశేషం. 45 ఏళ్లు దాటాక పిల్లలు కనే మహిళల సంఖ్య పెరగలేదుగాని నిలకడగా ఉంది. అలాగే, పెళ్లాడని జంటలకు పుట్టే సంతానం సంఖ్య 3 శాతం తగ్గింది. అందరికీ ఆరోగ్య-వైద్య సౌకర్యాలు అందుబాటులోకి వచ్చి వాటిని యువతులు ఉపయోగించుకోవడం వల్లే మహిళలకు ముఖ్యంగా గర్భధారణ, ప్రసూతికి సంబంధించిన మంచి ఫలితాలు వచ్చాయని ఈ నివేదిక విశ్లేషించిన బెర్లాన్‌, సారా వెర్బియెస్ట్‌ చెప్పారు.
 
 కోత కాన్పులు వరుసగా నాలుగో ఏడాది తగ్గాయి!
 
 అమెరికాలో కొన్ని దశాబ్దాల క్రితం ప్రజలను బెంబేలెత్తించిన కోత కాన్పులు వరుసగా నాలుగో ఏడాది కూడా తగ్గాయి. దేశవ్యాప్తంగా అన్ని వర్గాలు, సంస్థల ప్రచారం వల్ల సిజేరియన్‌ ఆపరేషన్ల ద్వారా చేసే కాన్పుల సంఖ్య 32 శాతానికి పడిపోయింది. 2009లో ఇలాంటి కోత కాన్పులు 33 శాతం దాకా పెరిగి అప్పటి నుంచి తగ్గనారంభించాయి. మహిళా సంఘాలు, బీమా కంపెనీలు, వైద్యసహాయ సంస్థలు, వైద్యులు, మంత్రసానులు, నర్సులు చేసిన కృషి వల్చేల ఇది ఽసాధ్యమైంది. అదీగాక టీనేజ్‌ ఆడపిల్లల్లో వైద్య, ఆరోగ్య విషయాల్లో పెరిగిన చైతన్యం, సామాజిక మార్పుల కారణంగా సంతాన నిరోధక సాధనాలను ఉపయోగిస్తున్నారు.
 
 (సాక్షి నాలెడ్జ్‌ సెంటర్‌)


 బుకారెస్ట్: ఇక్కడ కనిపిస్తున్న ఫొటో చూసి.. ఆ పాలబుగ్గల చిన్నారిని ఎత్తుకుని ఆడిస్తున్నది.. ఆమె అక్క అనుకుంటే మీరు పొరబడినట్లే. ఎందుకంటే ఆ బాలికే (15) ఆ చిన్నారికి కన్నతల్లి. నిజమే, ఈ ఒక్క ఇంట్లోనే కాదు రొమేనియాలో ఎన్నో కుటుంబాల్లో ఇలాంటి దృశ్యాలు కనిపిస్తాయి. గట్టిగా టీనేజి కూడా రాకముందే కొంతమంది అమ్మాయిలు తల్లులవుతున్నారు. బాల్యవివాహాలకు తోడు ఆరోగ్యం గురించి ఏమాత్రం అవగాహన లేకపోవడం కూడా ఇందుకు కారణమవుతోంది. ఈ విషయంపై ఐక్యరాజ్యసమితి కూడా విచారం వ్యక్తం చేస్తోంది. యూరోపియన్ యూనియన్ జనాభా లెక్కల ప్రకారం 2013 ఏడాదిలో 15.6 శాతం చిన్నారులకు టీనేజీ యువతులే జన్మనిచ్చారట. రెండో స్థానంలో ఉన్న బల్గేరియాలో 14.7 శాతం చిన్నారులు చిట్టి తల్లులకు పుడుతున్నారు.
 
 గర్భం దాల్చకముందు ఎప్పుడూ తాము అసలు వైద్యులను చూడలేదని, కేవలం ఆ సమయంలోనే చూశామని.. గర్భం దాల్చినపుడు చాలా భయమేస్తుందని ఓ యువతి చెప్పింది. టీనేజీలో పెళ్లిచేసుకుంటే తలెత్తే ఇబ్బందులు తాను చూశానని, అందుకే తాను పెళ్లి చేసుకోనని డయానా (15) అనే మరో యువతి చెప్పింది. తనకు పిల్లలు వద్దు.. పెళ్లి వద్దు అంటూ ఆమె ఆందోళన చెందుతోంది. తన ఆలనాపాలనా కోసమే మరొకరిపై ఆధారపడే వయసులో మరో చిన్నారికి తల్లిగా మారడం చాలా దురదృష్టకరమని ఆ ఫొటోలో కనిపిస్తున్న బాలిక లోరెనా (15) అంటోంది. తోటి చిన్నారులతో ఆడుకోవాల్సిన సమయంలో తన చిన్నారికి లాలిపాటలు పాడాల్సి వస్తుందని వాపోయింది. తల్లులవుతున్న టీనేజీ వాళ్లలో 12-15 ఏళ్ల మధ్య ఉన్నవారు  2,212 మంది ఉన్నారని సర్వేలో తేలింది.
 
 మూడింట రెండు వంతుల మంది గ్రామీణ ప్రాంతాల్లోనే నివసిస్తున్నారట. ఆర్థిక పరిస్థితులు బాగా లేని కుటుంబాలు తొందరపడి బాల్య వివాహాలు చేయడం, వారి భర్తలు పని నిమిత్తం వలసలు వెల్లడంతో బాలికల కష్టాలు రెట్టింపవుతున్నాయి. దాంతో ఇంట్లో వృద్ధులకు వీరే ఆయాలుగా మారాల్సి వస్తోందని, కొన్ని సందర్భాలలో భర్త ఇంట్లో ఎవరూ లేకపోతే పుట్టింటికి వచ్చి వారితో కలిసి ఉండాల్సి వస్తుందని లోరేనా మాత్రమే కాదు మరికొంత మంది చిట్టి తల్లులు తమ బాధను వెల్లడించారు.