కర్నూలు(అగ్రికల్చర్): అంగన్‌వాడీ సెంటర్లకు కూడా ఈ- పాస్ విధానంలోనే సరుకులు అందించాలని ముఖ్యమంత్రి కార్యాలయ అధికారి ప్రద్యుమ్న జిల్లా యంత్రాంగాన్ని ఆదేశించారు. బుధవారం ఆయన స్త్రీ శిశు సంక్షేమశాఖ కమిషనర్ చక్రవర్తితో కలసి విడియో కాన్ఫరెన్స్ నిర్వహించారు. ఏ చౌకదుకాణం పరిధిలో ఎన్ని అంగన్‌వాడీ కేంద్రాలున్నాయో పరిశీలించి మ్యాపింగ్ చేయాలన్నారు.
 
 అంగన్‌వాడీ కార్యకర్త విధిగా ఈ-పాస్‌లో వేలి ముద్ర వేస్తేనే సరుకులు ఇవ్వాలన్నారు. కర్నూలు నుంచి ఐసీడీఎస్ పీడీ అరుణ మాట్లాడుతూ  జిల్లావ్యాప్తంగా 2414 చౌకదుకాణాలున్నాయని, ఇందులో 2043 షాపులకు అంగన్‌వాడీ కేంద్రాలను మ్యాపింగ్ చేసినట్లు తెలిపారు. కర్నూలు నుంచి వీడియో కాన్ఫరెన్స్‌లో సీడీపీఓలు, సూపర్‌వైజర్లు పాల్గొన్నారు.