తండ్రీ కొడుకులు

నిజ జీవితంలో తండ్రీ కొడుకులైన అక్కినేని నాగార్జున, అఖిల్‌ వెండితెరపైనా తండ్రీ కొడుకులుగా స్క్రీన్  షేర్‌ చేసుకోనున్నారా? అంటే అవుననే అంటున్నాయి ఫిల్మ్‌నగర్‌ వర్గాలు. అఖిల్‌ హీరోగా నటిస్తున్న యాక్షన్  లవ్‌స్టోరీ చిత్రం ‘లెనిన్ ’. మురళీ కిశోర్‌ అబ్బూరు దర్శకత్వం వహిస్తున్న సినిమాలో శ్రీలీల హీరోయిన్ గా నటిస్తున్నారు. అక్కినేని నాగార్జున, నాగవంశీ నిర్మిస్తున్నారు. ఈ సినిమాలోని ఓ కీలక పాత్రలో నాగార్జున నటించనున్నారనీ, కథ రీత్యా అఖిల్‌ పాత్రకు తండ్రి పాత్రలో కనిపిస్తారనే టాక్‌ వినిపిస్తోంది.

ఇదే వాస్తవమైతే... నిజ జీవితంలో తండ్రీకొడుకులైన నాగార్జున, అఖిల్‌ సిల్వర్‌ స్క్రీన్ పై కూడా తండ్రీకొడుకులుగా కనిపించినట్లవుతుంది. అయితే ఈ విషయంపై పూర్తిస్థాయి అధికారిక ప్రకటన రావాల్సి ఉంది. ఇటీవల పెళ్లి చేసుకున్న అఖిల్‌ అతి త్వరలోనే ‘లెనిన్ ’ రెగ్యులర్‌ షూటింగ్‌లో పాల్గొంటారని, ఈ సినిమా తర్వాతి షెడ్యూల్‌ తిరుపతిలో ప్రారంభం అవుతుందని ఫిల్మ్‌నగర్‌ టాక్‌. ఈ చిత్రం నవంబరులో రిలీజ్‌ కానుందని సమాచారం. ఈ సినిమాకు తమన్  సంగీతం అందిస్తున్నారు. మరోవైపు నాగార్జున, నాగచైతన్య ప్రధాన పాత్రల్లో నటించిన ‘మనం’ సినిమాలో అఖిల్‌ ఓ చిన్న పాత్రలో నటించిన విషయం గుర్తుండే ఉంటుంది.