కర్నూలు జిల్లా వాసిగా భావిస్తున్న పోలీసులు
 
  
 ఫిరంగిపురం:  గుంటూరు జిల్లా ఫిరంగిపురం మండల కేంద్రంలో ఉన్న బాలయేసు కధెడ్రల్‌ దేవాలయ ప్రాంగణంలోని కార్మెల్‌ భవన్‌ వద్ద సోమవారం అనుమానాస్పద స్థితిలో  వ్యక్తి మృతి చెంది పడి ఉన్నాడు. పోలీసులు తెలిపిన వివరాల ప్రకారం... సుమారు 45–50 ఏళ్ల వయస్సు కలిగిన వ్యక్తి కార్మెల్‌ భవన్‌ సమీపంలో పడి ఉండటాన్ని సోమవారం తెల్లవారుజామున భక్తులు గుర్తించి ఆలయ పెద్దలకు తెలిపారు. వారు పోలీసులకు సమాచారం అందించడంతో ఎస్‌ఐ ఎం.ఆనందరావు, సిబ్బంది సంఘటనా స్థలానికి చేరుకొని పరిశీలించారు. మృతుడు ఆదివారం మధ్యాహ్నం దేవాలయ ప్రాంగణంలో తలనీలాలు తీయించుకొని  మొక్కుబడి తీర్చుకున్నట్లు ప్రా«థమికంగా గుర్తించారు. మృతుని ఎడమచేతిపై‘ఎన్‌.రామకృష్ణ్ణ’ అని పచ్చబొట్టు వుంది. బ్యాగులో వున్న రైల్వే టిక్కెట్టును పరిశీలిస్తే కర్నూలు జిల్లా బేతంచర్ల నుంచి ఫిరంగిపురం ప్రయాణం చేసినట్లు ఉంది. దేవాలయ ప్రాంగణంలోని సీసీ కెమెరా ఫుటేజిలను పరిశీలిస్తున్నారు. గుండెపోటు, మూర్చ, విషసర్పాల కాటు లాంటి వాటిలో ఏదైనా జరిగి ఉండవచ్చని పోలీసులు అనుమానిస్తున్నారు. మృతదేహాన్ని పోస్టుమార్టం నిమిత్తం నరసరావుపేట మార్చురీకి తరలించి అనుమానాస్పద మృతిగా కేసు నమోదు చేసి దర్యాప్తు ప్రారంభించారు. మృతుని ఆచూకీ గుర్తించిన వారు ఫిరంగిపురంలోని పోలీస్‌ స్టేషన్‌లో నేరుగా, లేదా 0863–257223 ఫోన్‌ నంబర్లో  సంప్రదించాలని ఎస్‌ఐ కోరారు. 
  
  


   
 విజయపురిసౌత్‌(గుంటూరు): స్నానానికి నదిలో దిగి ప్రమాదవశాత్తూ నీట మునిగి వ్యక్తి మృతిచెందిన ఘటన కృష్ణవేణి ఘాట్‌ సమీపంలో గురువారం చోటు చేసుకుంది. వివరాలిలా ఉన్నాయి. గుర్తు తెలియని వృద్ధుడు(85) మధ్యాహ్నం రెండు గంటల సమయంలో కృష్ణవేణి ఘాట్‌కు కొద్దిదూరంలో నదిలో స్నానానికి దిగాడు. ప్రమాదవశాత్తూ లోతైన ప్రదేశంలోకి జారిపోవడంతో నీటిలో మునిగిపోయాడు. ఇది గమనించిన సమీపంలోని కొందరు మత్స్యకారులు హుటాహుటిన వృద్ధుడిని నీటిలోంచి ఒడ్డుకు చేర్చారు. కొనప్రాణంతో ఉన్న వృద్ధుడు ఆ తరువాత కొద్దిసేపటికే మృతి చెందాడు. మత్స్యకారులు పోలీసులకు సమాచారం అందించారు. వృద్ధుడి జేబులో మాచర్ల నుంచి హిల్‌కాలనీకి తీసుకున్న ఆర్టీసీ బస్‌ టికెట్‌ ఉంది. మృతుడి ఒంటిపై తెల్ల చొక్కా, తెల్ల పంచె ఉన్నాయి. పోస్ట్‌మార్టం  నిమిత్తం మృతదేహాన్ని మాచర్ల ప్రభుత్వాసుపత్రికి తరలించారు. విజయపురి సౌత్‌ ఎస్‌ఐ వై.కోటేశ్వరావు కేసు నమోదు చేసుకొని దర్యాప్తు చేస్తున్నారు.