ఉడాల్‌గురి(అస్సాం): ఒక ఉపాధ్యాయుడు, ఆయన కుటుంబం కలిసి తమ మూడేళ్ల చిన్నారిని బలి ఇచ్చేందుకు చేసిన యత్నాన్ని గ్రామస్తులు, పోలీసులు కలిసి అడ్డుకున్నారు. ఈ ఘటన అస్సాంలోని ఉడాల్‌గురి జిల్లా గనక్‌పారలో జరిగింది. గ్రామానికి చెందిన ఓ ఉపాధ్యాయుడి ఇంట్లోంచి శనివారం ఉదయం దట్టమైన పొగ రావడం గ్రామస్తులు గమనించి, అప్రమత్తమయ్యారు. వారు వెళ్లి లోనికి చూడగా మహిళలు సహా ఇంట్లోని వారంతా నగ్నంగా కూర్చుని పెద్దగా మంత్రాలు చదువుతున్నారు. మధ్యలో మూడేళ్ల చిన్నారిని కూర్చోబెట్టారు. ఆమె మెడ నరికేందుకు ఓ మంత్రగాడు పెద్దకత్తిని పట్టుకుని ఉన్నాడు. విషయం తెల్సి పోలీసులురాగానే రాళ్లు, ఇతర వస్తువులను ఇంట్లోనివాళ్లు విసిరారు. పోలీసులు గాలిలోకి ఐదు రౌండ్ల కాల్పులు జరిపి, అందరినీ అదుపులోకి తీసుకున్నారు. ఈ కాల్పుల్లో టీచర్‌తోపాటు అతని కొడుకు గాయపడ్డారు. బలి ఇవ్వడానికి సిద్ధం చేసిన బాలిక సదరు ఉపాధ్యాయుడి మరదలి కూతురనీ, ఆమె తల్లీ ఆ పూజల్లో పాల్గొందని సమాచారం.


 విశాఖ జిల్లాలో గంజాయి అక్రమ రవాణా సంఘటన మరొకటి వెలుగులోకి వచ్చింది. జి.మాడుగుల మండలం సందులొవ గ్రామానికి చెందిన కె.కొండబాబు, మాకవరంపాలెం మండలం సీతానగరం గ్రామానికి చెందిన నమ్మి రమణ అనే ఇద్దరు గంజాయిని తరలిస్తూ పట్టుబడ్డారు.  సోమవారం మధ్యాహ్నం తహశీల్దార్ కార్యాలయం జంక్షన్ వద్ద చేపట్టిన తనిఖీల్లో వీరి వద్ద 20 కిలోల గంజాయి లభించింది. వారిద్దరినీ అదుపులోకి తీసుకుని, గంజాయితోపాటు బైక్‌ను సీజ్ చేశారు. కేసు దర్యాప్తు చేస్తున్నారు.