చాంపియన్స్ టెన్నిస్ లీగ్
 
  పుణే: చాంపియన్స్ టెన్నిస్ లీగ్‌లో హైదరాబాద్ ఏసెస్ జట్టుకు చుక్కెదురైంది. సోమవారం ఇక్కడ జరిగిన ఆఖరి మ్యాచ్‌లో ఏసెస్ 24-25 గేమ్‌ల తేడాతో పుణే మరాఠాస్ చేతిలో ఓటమిపాలైంది. లీగ్ దశ ముగిసిన అనంతరం సౌత్‌జోన్‌నుంచి అగ్ర స్థానంలో నిలిచిన పుణే తుది పోరుకు అర్హత సాధించింది. ఇరు జట్ల మధ్య జరిగిన ఆఖరి లీగ్ పోరులో... లెజెండ్స్ మ్యాచ్‌లో హైదరాబాద్ ఆటగాడు మార్క్ ఫిలిప్పోసిస్ 6-3తో ప్యాట్ క్యాష్‌ను చిత్తు చేశాడు.
 
 మిక్స్‌డ్ డబుల్స్‌లో పుణే జోడి బాగ్దాటిస్-రద్వాన్‌స్కా 6-3 తేడాతో యూజ్నీ-హింగిస్‌పై గెలుపొందింది. మహిళల సింగిల్స్‌లో హింగిస్ (ఏసెస్) 6-4తో రద్వాన్‌స్కాను ఓడించింది.  పురుషుల డబుల్స్‌లో బాగ్దాటిస్-సాకేత్ మైనేని 6-3తో యూజ్నీ-జీవన్(ఏసెస్)పై గెలుపొందారు. చివరి పురుషుల సింగిల్స్ మ్యాచ్‌లో యూజ్నీ 6-5తో బాగ్దాటిస్‌ను ఓడించాడు. దీంతో ఇరు జట్లు 24-24 గేమ్‌లతో సమంగా నిలిచాయి. కానీ టైబ్రేక్‌లో బాగ్దాటిస్‌ను విజయం వరించింది. రేపు జరిగే ఫైనల్లో ఢిల్లీ డ్రీమ్స్‌తో పుణే తలపడుతుంది.


 పుణే చేతిలో ఓడిన ఏసెస్
 
  సాక్షి, హైదరాబాద్: తొలి పోరులో గెలిచి శుభారంభం చేసిన హైదరాబాద్ ఏసెస్‌కు రెండో మ్యాచ్‌లో చుక్కెదురైంది. చాంపియన్స్ టెన్నిస్ లీగ్‌లో భాగంగా మంగళవారం ఇక్కడి ఎల్బీ స్టేడియం సెంటర్‌కోర్టులో జరిగిన లీగ్ మ్యాచ్‌లో పుణే మరాఠాస్ 26-25 గేమ్‌ల (3-2 మ్యాచ్‌లు) తేడాతో హైదరాబాద్ ఏసెస్‌పై విజయం సాధించింది. ఈ మ్యాచ్‌తో చాంపియన్స్ టెన్నిస్ లీగ్ హైదరాబాద్ రౌండ్ పోటీలు ముగిశాయి.
 
  రద్వాన్‌స్కా జోరు
  మహిళల సింగిల్స్ మ్యాచ్‌లో రద్వాన్‌స్కా 6-3 తేడాతో హింగిస్ పై విజయం సాధించింది. వరల్డ్ నంబర్ 6 రద్వాన్‌స్కా ముందు అలనాటి చాంపియన్ హింగిస్ తలవంచింది. లెజెండ్స్ మ్యాచ్ లో హైదరాబాద్ ప్లేయర్ మార్క్ ఫిలిప్పోసిస్ 6-3 స్కోరుతో ప్యాట్‌క్యాష్‌ను చిత్తు చేశాడు. ఆ తర్వాత మిక్స్‌డ్ డబుల్స్ మ్యాచ్ లో ఏసెస్ జోడి యూజ్నీ-హింగిస్ 6-5 (5-3)తో పుణే జంట బాగ్దాటిస్-రద్వాన్‌స్కాపై విజయం సాధించింది.
 
 అనంతరం హోరాహోరీగా సాగిన పురుషుల డబుల్స్‌లో మరాఠా ద్వయం బాగ్దాటిస్-సాకేత్ మైనేని 6-5 తేడాతో ఏసెస్ టీమ్ యూజ్నీ-జీవన్ నెడుంజెళియన్‌ను ఓడించింది. ఈ మ్యాచ్‌లో నెట్ వద్ద చక్కటి ఆటతీరుతో సాకేత్ ఆకట్టుకున్నాడు. ఈ ఫలితంలో ఇరు జట్లు 2-2 మ్యాచ్‌లతో సమంగా నిలిచాయి. కీలకమైన ఆఖరి మ్యాచ్ పురుషుల సింగిల్స్‌లో బాగ్దాటిస్ 6-5 (5-2) తేడాతో యూజ్నీపై గెలుపొంది తన జట్టుకు విజయాన్ని అందించాడు.