తెలుగులో ప్రస్తుతం రవితేజ ‘ఈగిల్‌’, సిద్ధు జొన్నలగడ్డ ‘డీజే టిల్లు స్వైర్‌’ చిత్రాల్లో హీరోయిన్‌గా నటిస్తున్నారు అనుపమా పరమేశ్వరన్‌. ఈ బ్యూటీ తాజాగా మరో సినిమాకు గ్రీన్‌సిగ్నల్‌ ఇచ్చారు. ‘సినిమా బండి’ ఫేమ్‌ దర్శకుడు ప్రవీణ్‌ ఈ సినిమాను తెరకెక్కించనున్నారు. ఈ విషయాన్ని సోషల్‌ మీడియా వేదికగా ప్రవీణ్‌ వెల్లడించి, ఓ ఫోటోను షేర్‌ చేశారు. విజయ్‌ డొంకాడ ఈ సినిమాను నిర్మిస్తారు. అతి త్వరలో ఈ సినిమా షూటింగ్‌ ప్రారంభం కానుంది. ఇది లేడీ ఓరియంటెడ్‌ ఫిల్మ్‌ అని, ట్రావెల్‌ బ్యాక్‌డ్రాప్‌లో ఈ సినిమా కథనం ఉంటుందని భోగట్టా. అలాగే తమిళంలో ‘సైరన్‌’, మలయాళంలో ‘జేఎస్‌కే: ట్రూత్‌ షల్‌ ఆల్వేస్‌ ప్రివైల్‌’ సినిమాలు చేస్తున్నారు అనుపమ. ఇలా వరుస చిత్రాలతో ఈ ఏడాది అనుపమ బిజీ బిజీ అన్నమాట.

‘‘ఫర్హానా’ నాకు స్పెషల్‌ మూవీ. నాపై నమ్మకంతో ఈ చిత్రాన్ని తెలుగు, హిందీ, తమిళ్‌లో భారీ స్థాయిలో విడుదల చేస్తున్న నిర్మాతలకు కృతజ్ఞతలు. ఓ లేడీ ఓరియంటెడ్‌ ఫిల్మ్‌ మూడు భాషల్లో విడుదల కావడం పెద్ద విషయం. డైరెక్టర్, నిర్మాతలు నాపై పెట్టుకున్న నమ్మకం నాకు ధైర్యాన్ని ఇచ్చింది’’ అన్నారు æ ఐశ్వర్యా రాజేష్‌. నెల్సన్  వెంకటేశన్  దర్శకత్వంలో ఐశ్వర్యా రాజేష్‌  ప్రధాన పాత్రలో నటించిన చిత్రం ‘ఫర్హానా’. డ్రీమ్‌ వారియర్‌ పిక్చర్స్‌ నిర్మించిన ఈ చిత్రం ఈ నెల 12న తెలుగు, హిందీ, తమిళ భాషల్లో విడుదలవుతోంది. ఈ సందర్భంగా ఐశ్వర్యా రాజేష్‌ మాట్లాడుతూ–‘‘సినిమాని సెలబ్రేట్‌ చేసే ఇండస్ట్రీ టాలీవుడ్‌. ఇక్కడ మంచి కంటెంట్‌ని సెలబ్రేట్‌ చేస్తారు. ఆ నమ్మకంతో ‘ఫర్హానా’ని తెలుగులో రిలీజ్‌ చేస్తున్నాం’’అన్నారు. ‘‘ఫర్హానా’ నా మూడో చిత్రం. ఈ సినిమాతో తెలుగు ప్రేక్షకులకు నన్ను పరిచయం చేస్తున్న నిర్మాతలకు కృతజ్ఞతలు. ఇది పక్కా తెలుగు సినిమాలా ఉంటుంది’’ అన్నారు నెల్సన్‌ వెంకటేశన్‌. ‘‘గత ఏడాది మేం రిలీజ్‌ చేసిన ‘ఒకే ఒక జీవితం’ని ప్రేక్షకులు ఆదరించారు. ఇప్పుడు ‘ఫర్హానా’తో వస్తున్నాం’’ అన్నారు నిర్మాత ఎస్‌ఆర్‌ ప్రభు. ‘‘ఫర్హానా’ ప్రేక్షకులకు నచ్చుతుంది’’ అన్నారు సంగీత దర్శకుడు జస్టిన్‌ ప్రభాకర్, నటి ఐశ్వర్యా దత్తా.  

బాలీవుడ్‌ బ్యూటీ కంగనా రనౌత్‌ ఈ మధ్య ఎక్కువగా లేడీ ఓరియంటెడ్‌ సినిమాలపైనే దృష్టి పెట్టారు. ఇప్పటికే తమిళనాడు దివంగత ముఖ్యమంత్రి, నటి జయలలిత పాత్రలో ‘తలైవి’ సినిమాను పూర్తి చేసిన కంగన ఇప్పుడు మరో పవర్‌ఫుల్‌ పాత్రలో నటించేందుకు పచ్చజెండా ఊపారు. అది కూడా దేశ తొలి మహిళా ప్రధానమంత్రి, ఉక్కు మహిళగా (ఐరన్‌ లేడీ) పేరున్న ఇందిరా గాంధీ పాత్ర చేయనున్నారు. ‘‘ఈ సినిమా ఇందిరా గాంధీ జీవిత చరిత్ర కాదు... అయితే ఆమె జీవితంలో జరిగిన ప్రధాన ఘట్టం నేపథ్యంలో ఉంటుంది. ఇప్పటికే స్క్రిప్ట్‌ పనులు చివరి దశకు చేరుకున్నాయి. భారతదేశంలో నెలకొన్న రాజకీయాలపై ఇప్పటి తరం వారికి మా సినిమా అవగాహన కల్పిస్తుంది. నా స్నేహితుడు సాయి కబీర్‌ (చిత్రదర్శకుడు)తో కలిసి రాజకీయ నేపథ్యం ఉన్న ఈ కథలో నటిస్తున్నందుకు హ్యాపీ. ‘మణికర్ణిక’ చిత్రబృందమే ఈ సినిమాకు కూడా పని చేస్తుంది’’ అని కంగనా రనౌత్‌ పేర్కొన్నారు. కాగా ఇప్పటికే కంగనపై ఫొటోషూట్‌ కూడా చేశారు. ఇందిరాగాంధీ లుక్‌లో కంగన బాగున్నారంటూ కామెంట్లు పెడుతున్నారు అభిమానులు. ఓ పుస్తకం ఆధారంగా ఈ సినిమా రూపొందనుందని కంగన పేర్కొన్నారు. ఇందులో లాల్‌బహదూర్‌ శాస్త్రి, మొరార్జీ దేశాయ్, సంజయ్‌ గాంధీ, రాజీవ్‌ గాంధీ పాత్రలు కూడా ఉంటాయి. 

‘లవ్లీ, అడ్డా, రౌడీ’ సినిమాలతో తెలుగు ప్రేక్షకులను అలరించారు శాన్వీ. ఆ తర్వాత కన్నడ సినిమాలతో బిజీ అయ్యారామె. తాజాగా కన్నడంలో ఓ క్రేజీ లేడీ ఓరియంటెడ్‌ ప్రాజెక్ట్‌ చేస్తున్నారు. కన్నడ దర్శకుడు దినేష్‌ బాబు దర్శకత్వంలో తెరకెక్కనున్న 50వ చిత్రం ‘కస్తూరి మహల్‌’లో లీడ్‌ రోల్‌ చేయనున్నారు శాన్వీ. ఇదో సైకలాజికల్‌ థ్రిల్లర్‌. ఇంతకీ కస్తూరి మహల్‌ కథేంటి? అందులో ఏం జరిగింది? అనేది ప్రస్తుతానికి సస్పెన్స్‌. అక్టోబర్‌ మొదటివారంలో ఈ సినిమా చిత్రీకరణ ప్రారంభం కానుంది. కర్ణాటక పరిసర ప్రాంతాల్లో ఒకే షెడ్యూల్‌లో చిత్రీకరణ మొత్తాన్ని పూర్తి చేయాలన్నది చిత్రబృందం ప్లాన్‌ అని టాక్‌.

‘మహానటి’ ఫేమ్‌ కీర్తీ సురేష్‌ లీడ్‌ రోల్‌లో నటిస్తున్న లేడీ ఓరియంటెడ్‌ ఫిల్మ్‌ ‘గుడ్‌లక్‌  సఖి’. నగేష్‌ కుకునూర్‌ ఈ చిత్రానికి దర్శకత్వం వహిస్తున్నారు. నిర్మాత ‘దిల్‌’ రాజు సమర్పిస్తున్న  ఈ చిత్రాన్ని సుధీర్‌ చంద్ర పాదిరి, శ్రావ్య వర్మ నిర్మిస్తున్నారు. ఈ చిత్రంలో గోలీ రాజు పాత్రలో హీరో ఆది పినిశెట్టి నటిస్తున్నారు. శనివారంతో గోలీ రాజు పాత్రధారి ఆది పినిశెట్టి సన్నివేశాలు పూర్తయ్యాయి. దీంతో చిత్రబృందం గోలీ రాజుకి బై బై చెప్పింది. ఈ సందర్భంగా చిత్ర దర్శక–నిర్మాతలు మాట్లాడుతూ– ‘‘ఒక చురుకైన గ్రామీణ యువతి క్రీడల్లో అడుగుపెట్టి షూటర్‌గా ఎలా ఎదిగి ఊరికి పేరు తెచ్చిందనే కథాంశంతో తయారవుతున్న చిత్రమిది. షూటింగ్‌ ట్రైనర్‌గా జగపతిబాబు నటిస్తున్నారు. తెలుగు, తమిళ, మలయాళం భాషల్లో ఏక కాలంలో నిర్మిస్తున్న చిత్రమిది. ప్రస్తుతం ఈ సినిమా షూటింగ్‌ హైదరాబాద్‌లో జరుగుతోంది. ఆగస్ట్‌ 15న రిలీజ్‌ చేసిన మా సినిమా టీజర్‌కు మంచి స్పందన వచ్చింది. అధిక శాతం మహిళా సాంకేతిక నిపుణులు ఈ చిత్రానికి పనిచేస్తుండటం విశేషం’’ అన్నారు. ఈ చిత్రానికి సంగీతం: దేవిశ్రీప్రసాద్, కెమెరా: చిరంతన్‌ దాస్‌.


 ‘అరుంధతి’లో జేజెమ్మగా అనుష్క అభినయాన్ని అంత సులువుగా మర్చిపోలేం. పవర్‌ఫుల్ పాత్రలంటే అనుష్కే చేయాలని ఆ సినిమా నిరూపించింది. ‘రుద్రమదేవి’తో ఆ స్టాంప్ బలంగా పడింది. ‘బాహుబలి’ తొలి భాగంలో దేవసేనగా వృద్ధ గెటప్‌లో కనిపించారు కాబట్టి.. మలి భాగంలో ఏ రేంజ్‌లో రెచ్చిపోతారో చూడాలి. మొత్తం మీద లేడీ ఓరియంటెడ్ సినిమాలపరంగా అనుష్కకు మంచి మార్కెట్ ఏర్పడింది. ఇప్పుడామె మరో లేడీ ఓరియంటెడ్ చిత్రంలో నటిస్తున్నారు. ‘పిల్ల జమిందార్’ ఫేమ్ అశోక్ దర్శకత్వంలో అనుష్క నాయికగా ‘భాగమతి’ అనే చిత్రం రూపొందనుందనే ప్రకటన వచ్చిన విషయం తెలిసిందే.
  
   ఇది జరిగి ఏడాదైనా ఈ సినిమా పట్టాలెక్కిన దాఖలాలు కనిపించలేదు. ఒకానొక దశలో ఈ చిత్రం ఉండదనే వార్త కూడా వినిపించింది. అయితే, ఆ అనుమానాలన్నిటినీ పటాపంచలు చేస్తూ, బుధవారం ఈ చిత్రం పూజా కార్యక్రమాలు జరిగాయి. యూవీ క్రియేషన్స్ పతాకంపై వంశీ, ప్రమోద్ ఉప్పలపాటి ఈ చిత్రాన్ని నిర్మిస్తున్నారు. తెలుగు, తమిళ భాషల్లో ఏకకాలంలో రూపొందనున్న ఈ చిత్రానికి తమిళంలో జ్ఞానవేల్ రాజా నిర్మాత. అనుష్క, అశోక్, వంశీ, ప్రమోద్‌లు పాల్గొనగా, సంస్థ కార్యాలయంలో పూజా కార్యక్రమాలు జరిగాయి.
  
  ఈ నెలాఖరున షూటింగ్ ఆరంభమవుతుందనీ, ఇదే ఏడాది విడుదల చేయాలను కుంటున్నారనీ విశ్వసనీయ వర్గాల ద్వారా తెలిసింది. ముహమ్మద్ కులీ కుతుబ్ షా, భాగమతిల ప్రణయ గాథతో ఈ చిత్రం ఉంటుందనే ప్రచారం జరుగుతోంది. కానీ, ఇది చారిత్రక కథా చిత్రం కాదట. ‘‘ఇది సోషల్ డ్రామా. ప్రేమకథతోనే సినిమా సాగుతుంది’’ అని చిత్ర వర్గాల సమాచారం.
  


 సౌత్ ఇండస్ట్రీలో టాప్ హీరోయిన్గా వెలిగిపోతున్న సమంత త్వరలోనే ఓ లేడీ ఓరియంటెడ్ సినిమాలో నటించనుంది. ఇప్పటివరకు గ్లామర్ పాత్రలు మాత్రమే చేస్తూ వస్తున్న ఈ బ్యూటీ ఈ మధ్య కాలంలో కాస్త కొత్తగా ట్రై చేస్తోంది. ఈ శుక్రవారం రిలీజ్ అయిన నవమన్మథుడు సినిమాలో గ్లామర్ షో ఏ మాత్రం లేని సాధారణ గృహిణి పాత్రలో కనిపించి ఆకట్టుకుంది. ఇదే జోష్లో విక్రమ్ కుమార్ దర్శకత్వంలో ఓ లేడీ ఓరియంటెడ్ సినిమాకు రెడీ అవుతోంది.
 
 ప్రస్తుతం సూర్య హీరోగా తెరకెక్కుతున్న 24 సినిమాతో పాటు, నితిన్, త్రివిక్రమ్ల కాంబినేషన్లో రూపొందుతున్న అ.. ఆ సినిమాల్లో హీరోయిన్గా నటిస్తోంది ఈ బ్యూటీ. మనం, 24 సినిమాల్లో సమంత యాక్టింగ్కు ఫిదా అయిన దర్శకుడు విక్రమ్ కుమార్ సమంత లీడ్ రోల్లో ఓ లేడీ ఓరియంటెడ్ సినిమాను ప్లాన్ చేస్తున్నాడట. అయితే ఈ సినిమా ఎప్పుడు సెట్స్ మీదకు వెళ్లేది మాత్రం కన్ఫామ్ చేయలేదు.


  సమంత... హాట్ హీరోయిన్ ఆఫ్ తెలుగు, తమిళ్ ఫిల్మ్ ఇండస్ట్రీస్. అభినయంతో మెప్పించాలన్నా, అందంతో ఆకట్టుకోవాలన్నా ఇప్పుడు ఈ చెన్నై బ్యూటీ పేరు చెప్పుకోవాల్సిందే. మొన్న సమ్మర్‌లో రిలీజైన త్రివిక్రమ్ - అల్లు అర్జున్‌ల ‘సన్నాఫ్ సత్యమూర్తి’ తరువాత సమంత మళ్ళీ తెలుగు సెట్స్‌లో కనిపించడం లేదు. చెన్నైలో షూటింగ్‌లతో బిజీగా ఉన్నారు. విక్రమ్ సరసన ‘పత్తు ఎణ్రదు కుళ్ళ’, ‘మనం’ ఫేమ్ విక్రమ్ కుమార్ దర్శకత్వంలో సూర్య సరసన ‘24’ సహా మరో పేరు పెట్టని తమిళ సినిమాలతో ఆమెకు సరిపోతోంది. ఎంత బిజీగా అంటే... ఈ మధ్య హైదరాబాద్‌కు రావడమే తగ్గింది.
 
 కంటి నిండా నిద్ర పోవడానికి కూడా తీరిక లేదని సన్నిహితుల వద్ద ఆమె వాపోతున్నారట. అయితే, ఈ పరిస్థితుల్లోనూ మరిన్ని మంచి పాత్రలు చేయాలన్న కోరిక మాత్రం ఆమెలో తగ్గలేదు. నటనకే పరిమితం కాకుండా, సామాజిక స్పృహతో సహాయ సేవా కార్యక్రమాల్లోనూ పాల్గొనే సమంత అందుకు తగ్గట్లే ఒక మహిళా ప్రధాన చిత్రంలో పాల్గొనాలని యోచిస్తున్నారట! అగ్ర దర్శకుడు త్రివిక్రమ్ అందు కోసం స్క్రిప్టు సిద్ధం చేస్తున్నట్లు కృష్ణానగర్ కబురు.  ప్రస్తుతం చిన్న ఎన్టీఆర్‌తో సినిమాకు ఆయన సిద్ధమవుతున్నట్లు భోగట్టా. కానీ, ఆ సినిమా పట్టాలెక్కడానికి కాస్తంత టైమ్ ఉంది కాబట్టి, ఈ సమంత సినిమా చేస్తారని వార్త.
 
 అయితే, ఆయన కేవలం స్క్రిప్ట్ అందిస్తారా, దర్శకత్వం కూడా చేస్తారా అన్నది తెలీదు. ఇటీవలే డేట్ల కోసం తన వద్దకు వచ్చిన దర్శక, నిర్మాతలకు సమంతే స్వయంగా ఈ లేడీ ఓరియెంటెడ్ సినిమా గురించి చెప్పారట! రచయిత, దర్శకుడెవరన్నది మాత్రం సస్పెన్స్‌లో పెట్టారు. ప్రస్తుతానికి చేతి నిండా సినిమాలతో బిజీగా ఉన్నా, కాస్తంత ఖాళీ దొరికే సమంత ఈ కొత్త ప్రాజెక్ట్‌తో తన ముచ్చట తీర్చుకుంటారేమో చూడాలి!


  కోలీవుడ్‌లో ప్రస్తుతం ఒక ఆశ్చర్యకరమైన చర్చ సాగుతోంది. అదేమిటంటే నయనతార సన్యాసం స్వీకరించాలని తలుస్తున్నారట. నిజానికి నయనతార నట జీవితం ఉజ్వలంగా సాగుతోంది. సెకండ్ ఇన్నింగ్స్‌లోను సక్సెస్‌ఫుల్ హీరోయిన్‌గా కొనసాగుతున్న అరుదైన నటీమణుల్లో ఒకరీమె. రాజారాణి, ఆరంభం, ఇదు కదిర్‌వేల్ కాదల్ లాంటి చిత్రాల విజయాలు నయనతారకు సెకండ్ ఇన్నింగ్‌లో చాలా హెల్ప్ అయ్యాయి. ఈ మధ్య వచ్చిన అన్భే నీ ఎంగే చిత్రం నిరాశ పరచినా నటిగా ఆమె కెరీర్‌కు ఎలాంటి ఢోకా లేదు. ఎందుకంటే ప్రస్తుతం ఈ సంచలన నటి సూర్యతో మాస్, ఉదయనిధి సరసన నన్భేండా, జయంరవికి జంటగా తనీ ఒరువన్ చిత్రాలతో పాటు లేడి ఓరియంటెడ్ చిత్రం మాయ  చేస్తూ బిజీగా వున్నారు.
  
  అయితే వ్యక్తిగత జీవితంలో ఈ బ్యూటీ రెండు మూడుసార్లు ప్రేమలో ఓడిపోయారు. నటుడు శింబు, ప్రభుదేవాలతో ప్రేమ కథలు కంచికి చేరడంతో విరక్తి చెందిన నయనతార ప్రేమ, పెళ్లి వద్దు అని సన్యాసం స్వీకరించాలనే నిర్ణయానికి వచ్చారా అనే వార్త ప్రచారంలో ఉంది. ఇది చిత్ర పరిశ్రమను విస్మయం కలిగించిన వార్త. అంతేకాదు ఏడాది క్రితం ఈ భామ హిమాలయాలకు వెళ్లి అక్కడి సన్యాసులతో మాట్లాడి మనశ్శాంతి పొందారట. ఇంతకుముందు బాలీవుడ్ బ్యూటీ తనుశ్రీ దత్తా, కోలీవుడ్ నటి రాగసుధ లాంటి వారు సన్యాసం పుచ్చుకున్నారు.
  
  అయితే నటి రాగసుధ మాత్రం మళ్లీ మనసు మార్చుకుని ఇటీవల నటుడు రంజిత్‌ను వివాహం చేసుకుని సంసార జీవితం అనుభవిస్తున్నారు. జీవితం లో పలు ఒడిదుడుకులను చవి చూసిన నయనతార సన్యాసం స్వీకరించాలని భావిస్తున్నట్లు కోలీవుడ్ టాక్. ఇటీవల ఆమె చిత్రాలను తగ్గించుకుంటున్నట్లు గుసగుసలు వినిపిస్తున్నాయి.