Jeevajothi Santhakumar Biopic: జీవజ్యోతి బయోపిక్‌ సినిమాగా రూపొందనుంది. జీవజ్యోతి పేరు కొనేళ్ల క్రితం పత్రికల్లో మారుమోగింది. ప్రముఖ హోటల్‌ శరవణ భవన్‌ అధినేత రాజగోపాల్‌ తన హోటల్‌లో పని చేసే కార్మికురాలైన జీవజ్యోతిని వశపరచుకోవడానికి ఆమె భర్తను చంపించారు. రాజగోపాల్‌పై కార్మికురాలైన జీవజ్యోతి 18 ఏళ్లు పెద్ద పోరాటమే చేసి గెలుపు సాధించింది. ఈ సంఘటనతో జీవజ్యోతి బయోపిక్‌ను జంగిల్‌ పిక్చర్స్‌ చిత్ర నిర్మాణ సంస్థ సినిమాగా రూపొందించడానికి సన్నాహాలు చేస్తోంది. ఇందులో జీవజ్యోతి, రాజగోపాల్‌ పాత్రల్లో నటించే నటీనటులు, సాంకేతిక వర్గాన్ని ఎంపిక చేస్తున్నారు. దీనిపై స్పందించిన జీవజ్యోతి అర్థబలం, అంగబలం కలిగిన ఒక హోటల్‌ అధినేతపై తన 18 ఏళ్ల పోరును జంగిల్‌ పిక్చర్స్‌ సంస్థ సినిమాగా రూపొందించడానికి ముందుకు రావడం సంతోషంగా ఉందన్నారు. తన జీవిత గాథను తెరపై చూసిన తర్వాత పురుషాధిక్యం కారణంగా తాను అనుభవించిన బాధ అందరికీ తెలుస్తుందని భావిస్తున్నట్టు పేర్కొన్నారు.

అందంతో కుర్రకారును, నటనతో ప్రేక్షకుల మనసును దోచేశారు ‘ఆర్‌ఎక్స్‌ 100’ ఫేమ్‌ హీరోయిన్‌ పాయల్‌ రాజ్‌పుత్‌. ఈ సినిమా తర్వాత చాలా ఆఫర్లు ఈ పంజాబీ బ్యూటీ తలుపు తట్టాయి. కానీ మనసుకు నచ్చిన పాత్రలనే ఎంచుకునే దిశగా అడుగులు వేస్తున్నారీ సొగసరి. అలా ఓ కథ నచ్చి కోలీవుడ్‌లో నటించడానికి పచ్చజెండా ఊపారామె. ఉదయనిధి స్టాలిన్‌ హీరోగా కేఎస్‌ అదియమాన్‌ దర్శకత్వంలో ఓ సినిమా రూపొందనుంది. ఇందులో ఒక హీరోయిన్‌గా పాయల్‌ రాజ్‌పుత్‌ ఎంపికయ్యారు. ఈ సినిమాకు ‘ఏంజిల్‌’ అనే టైటిల్‌ను పరిశీలిస్తున్నారు. ఈ సినిమాలో మరో హీరోయిన్‌గా ఆనంది నటిస్తారని టాక్‌. ఆల్రెడీ పాయల్‌ తన పాత్రకు సంబంధించిన ప్రిపరేషన్‌ను స్టార్ట్‌ చేశారట. ఈ సంగతి ఇలా ఉంచితే.. బెల్లంకొండ శ్రీనివాస్, కాజల్‌ జంటగా తేజ దర్శకత్వంలో రూపొందుతున్న సినిమాలో ఓ స్పెషల్‌ సాంగ్‌లో నర్తించనున్నారు పాయల్‌ రాజ్‌పుత్‌. మరోవైపు తెలుగులో హిట్‌ సాధించిన ‘ఆర్‌ఎక్స్‌ 100’ మూవీ తమిళంలో రీమేక్‌ కానుంది. ఆది పినిశెట్టి హీరోగా నటిస్తారు. ఇందులో కథానాయికగా ఇంకా ఎంపిక కాలేదు. పాయల్‌నే తీసుకున్నా ఆశ్చర్యపోవడానికి లేదు.


 తమిళసినిమా:  ప్రముఖ మలయాళ నటి మంజువారియర్‌ కోలీవుడ్‌కు పరిచయం కానున్నారు. 1995లో నటిగా రంగప్రవేశం చేసిన ఈ ప్రౌఢ వయసు నటి ఇన్నాళ్లకు తమిళ సినిమాలో నటించే అవకాశం పొందడం నిజంగా విశేషమే. మాలీవుడ్‌ నటుడు దిలీప్‌ను వివాహమాడి నటనకు దూరం అయిన మంజువారియర్‌కు ఒక కూతురు కూడా ఉంది. కాగా మనస్పర్ధల కారణంగా నటుడు దిలీప్‌ నుంచి విడాకులు పొందిన ఈమె మళ్లీ నటనపై దృష్టి సారించారు.
 
 హౌ ఓల్డ్‌ ఆర్‌యూ చిత్రంతో రీ ఎంట్రీ అయిన మంజువారియర్‌ మళ్లీ హిట్‌ జాబితా హీరోయిన్లలో చేరారు. నటి జ్యోతిక నటించిన 36 వయదినిలే చిత్రం హౌ ఓల్డ్‌ ఆర్‌యూ చిత్రానికి రీమేక్‌నేన్నది గమనార్హం. కాగా ఈరం చిత్రంతో దర్శకుడిగా మోగాఫోన్‌ పట్టిన అరివళగన్‌ ఆ తరువాత పలు చిత్రాలకు దర్శకత్వం వహించారు. ఇటీవల ఆయన తెరకెక్కించిన కుట్రం–23 చిత్రం కమర్షియల్‌గా మంచి విజయాన్ని అందించింది. ఆయన తాజా చిత్రానికి సిద్ధమయ్యారు. ఈ సారి హీరోయిన్‌ ఇతివృత్తంతో కూడిన కథను హ్యాండిల్‌ చేయడానికి రెడీ అయ్యారు.
 
 సంచలన సన్నివేశాలతో కూడిన థ్రిల్లర్‌ కథాంశంతో కూడిన ఇందులో నాయకిగా నటి నయనతారను నటింపజేయాలని ముందుగా భావించారట. అయితే ఆమె రూ.4 కోట్లు పారితోషికం డిమాండ్‌ చేయడం, అందకు ముందు నటించిన డోరా, తిరునాళ్, కాష్మోరా వంటి చిత్రాలు ఆశించిన విజయాలను సాధించక పోవడం వంటి విషయాలను దృష్టిలో పెట్టుకుని మనసు మార్చుకున్నారని టాక్‌. కాగా తాజాగా తన చిత్ర నాయకి పాత్రకు మలయాళ సంచలన నటి మంజువారియర్‌ను ఎంపిక చేసుకున్నారని సమాచారం. చిత్ర షూటింగ్‌ నవంబర్‌ లేదా డిసెంబర్‌లో ప్రారంభం కానున్నట్లు తెలిసింది.