Jawaharlal Nehru Architecture and Fine Arts University

చిరిగిన బట్టనైనా తొడుక్కో ఓ మంచి పుస్తకం కొనుక్కో.. అన్నది పాత సామెత...‘పాతబట్టలైనా ఉంచుకో... ఓ మంచి డిజైన్‌తో మళ్లీ కొత్తగా మలుచుకో’ అన్నది ఈతరం వినిపిస్తున్న కొత్త సామెత. ఎంత ఇష్టమైన దుస్తులైనా పాతబడక తప్పదు కాని సృజనకు పదును పెడితే కొత్త హంగులు అద్దవచ్చు... ఆ పాత జ్ఞాపకాన్ని మరోసారి నెమరేయవచ్చని చెబుతోంది మన హైదరాబాద్‌కు చెందిన చిత్రకారిణి, ప్రీతి సంయుక్త.జవహర్‌లాల్‌ నెహ్రూ ఆర్కిటెక్చర్‌ అండ్‌ ఫైన్ ఆర్ట్స్‌ యూనివర్సిటీలో అసిస్టెంట్‌ ప్రొఫెసర్‌ ప్రీతి సంయుక్త. ఉజ్బెకిస్థాన్ రాజధాని తాష్కెంట్‌లో ఇటీవలే జరిగిన ‘అంతర్జాతీయ కాంటెంపరరీ ఆర్ట్‌ బియెన్నాలే’లో తన వినూత్న కళా రీతితో తృతీయ విజేతగా నిలిచింది. ఈనెల 16న పురస్కారం అందుకుని నగరానికి తిరిగి వచ్చిన సందర్భంగా ఆమె గురించి ఆమె మాటల్లోనే విందాం.కలంకారీ అంటే ఇష్టం...హైదరాబాద్‌ విశ్వవిద్యాలయం నుంచి 2001లో పెయింటింగ్‌ లో మాస్టర్స్‌ డిగ్రీ పూర్తి చేశాను. చదువుకునే రోజుల నుంచి కలంకారీ అంటే బాగా ఇష్టం. కలంకారీ, బాతిక్‌ పెయింటింగ్‌లపై డాక్టరేట్‌ కూడా చేశాను. అమెరికాలోని అలబామా వర్సిటీలో పీహెచ్‌డీ చేస్తున్నప్పుడు ఒకసారి ఆఫ్రికావాసుల జీవనశైలిని దగ్గర నుంచి పరిశీలించాను. వారు వినియోగించే బొంతలు కేవలం బొంతలు కావు... వారి జీవితాలకు దిశానిర్దేశం చేసే దిక్సూచీలని తెలిసిన తర్వాత కాస్ట్యూమ్‌ ఆర్ట్‌ ఆలోచన వచ్చింది. పాత బట్టలే రంగులుగా...వస్త్రకళ ద్వారా మన జ్ఞాపకాలు, వ్యక్తిగత అనుభవాలకు రూపమివ్వడమే నా ఆలోచన. తాష్కెంట్‌లో నేను సమర్పించిన ఆర్ట్‌ సిరీస్‌ను స్టిచ్చింగ్‌ మెమోరీస్‌గా పేర్కొనడానికి కారణం ఇదే. ఈ ఆర్ట్‌ వర్క్‌లో పెయింటింగ్‌కు ఉపయోగించే కాన్వాస్‌లలో కలర్లు ఏవీ ఉండవు. వాటికి బదులుగా గుడ్డ ముక్కలు ఉంటాయి. ఓ రకంగా ఇది కూడా కుట్టుపనే. ఇప్పటికి 40కిపైగా కళాకృతులు నా దగ్గర ఉన్నాయి అన్నారు ప్రీతి.– సత్యబాబు, సాక్షి


 
 ఓపెన్‌ కోటాలో పూర్తి సీట్లు భర్తీ చేయకపోవడంపై ఆందోళన
 
 సాక్షి, హైదరాబాద్‌: జవహర్‌లాల్‌ నెహ్రూ ఆర్కిటెక్చర్, ఫైన్‌ఆర్ట్స్‌ వర్సిటీ ప్రవేశాల్లో గందరగోళం జరిగిందని విద్యార్థులు, తల్లిదండ్రులు ఆరోపిస్తున్నారు. ఓపెన్‌ కోటాలో సీట్లను భర్తీ చేయకుండా వాటిని పక్కనపెట్టి అర్హులైన వారికి అన్యాయం చేస్తున్నారని వాపోతున్నారు. వర్సిటీలోని ఫైన్‌ఆర్ట్స్‌ విభాగంలో బీఎఫ్‌ఏ కోర్సు కింద అప్లైడ్‌ ఆర్ట్స్, పెయింటింగ్, యానిమేషన్, ఫొటోగ్రఫీ, శిల్పకళతో పాటు ఇంటీరియర్‌ డిజైనింగ్‌ కోర్సులు ఉన్నాయి. వీటిలో 60 సీట్ల చొప్పున ఉన్న యానిమేషన్, ఇంటీరియర్‌ డిజైనింగ్‌ విభాగాలు అన్ని సెల్ఫ్‌ ఫైనాన్స్‌ కోర్సులే.
 
 ఇవికాక మిగిలిన విభాగాల్లో రెగ్యులర్‌ కోర్సులున్నాయి. రెగ్యులర్‌ కోర్సుల్లోని సీట్లలో 15% సీట్లు ఓపెన్‌ కోటాలో భర్తీ చేయాల్సి ఉండగా, మిగిలిన 85% సీట్లను ఆంధ్రా, ఉస్మానియా, శ్రీ వేంకటేశ్వర వర్సిటీల వారికి 42:36:22 నిష్పత్తిలో కేటాయిస్తారు. సాధారణంగా ఓపెన్‌ కోటా సీట్లను భర్తీ చేశాక రిజర్వేషన్‌ కోటా సీట్లు భర్తీ చేస్తారు. ఓపెన్‌ కోటాలో అన్ని సీట్లు భర్తీ చేయకుండా పక్కన పెట్టడం అనుమానాలకు తావిస్తోంది.
 
 ఇదీ ఉదాహరణ..
 ఫొటోగ్రఫీ విభాగంలో 30 జనరల్, 15 సెల్ఫ్‌ ఫైనాన్స్‌ సీట్లుండగా తొలి జాబితాలో 26 జనరల్, 9 సెల్ఫ్‌ ఫైనాన్స్‌ సీట్లు కేటాయిం చారు. ముందు ఓపెన్‌ కోటా సీట్లు భర్తీ చేశాక యూనివర్సిటీల నిష్పత్తి, రిజర్వేషన్ల ప్రకారం సీట్లు భర్తీ చేయాల్సి ఉంది. అధికారులు ఓపెన్‌ కోటాలో రెండు సీట్లే భర్తీ చేసి, రెండు ఖాళీలు ఉంచి జాబితా ప్రకటించారు. ఓపెన్‌ కోటాలోని 4 సీట్లను, సెల్ఫ్‌ ఫైనాన్స్‌లో 6 సీట్లను భర్తీ చేయకుండా పక్కన పెట్టడంపై ఆందోళన వ్యక్తమవుతోంది.


 మాసబ్‌ట్యాంక్‌లోని జేఎన్‌ఏఎఫ్‌ఏయూలో శనివారం సాయంత్రం జరిగిన ‘యువతరంగం’జోష్ నింపింది. విద్యార్థులు చిత్ర, విచిత్ర విన్యాసాలతో ఆహూతులను మెప్పించారు.