dance music

ఒక పాట హిట్‌ అయితే చాలు.. ప్రపంచవ్యాప్తంగా గుర్తింపు తెచ్చుకోవచ్చు! కానీ, ఆ గుర్తింపును నిలబెట్టుకుంటూ తనదైన సంగీతంతో అభిమానులను అలరించడం అంత సులభం కాదు. ఇదే బాటలో సాగుతున్న ఐర్లాండ్‌ సింగర్‌, డీజే జాజీ ఇప్పుడు తన తొలి ఆల్బమ్‌తో సంగీత ప్రియుల ముందుకు వస్తోంది.30 ఏళ్ల జాజీ అసలు పేరు యాస్మిన్‌ బైరన్‌. ఆమె పాటలు ఇప్పటికే ప్రపంచవ్యాప్తంగా వందల కోట్ల మంది సంగీత ప్రియులను అలరించాయి. అయితే, ప్రముఖ సంగీత కళాకారుడు కాల్విన్‌ హారిస్‌తో కలిసి పనిచేసిన ఆమె.. ఇప్పటివరకు ఎన్నో పాటలను ఒక్కొక్కటిగా విడుదల చేసింది. ఇప్పుడు ‘పీస్‌ అండ్‌ పేషెన్స్‌’ పేరుతో తన తొలి పూర్తి స్థాయి ఆల్బమ్‌ను విడుదల చేయనుంది.ప్రస్తుతం యువతలో డాన్స్‌ మ్యూజిక్‌కు ఆదరణ పెరుగుతోంది. 2020 నుంచి ప్రపంచవ్యాప్తంగా 25 ఏళ్లలోపు వారు ఈ తరహా సంగీతాన్ని వినడం 73 శాతానికి పైగా పెరిగినట్లు స్పాటిఫై గతంలో తెలిపింది. అయితే, చాలామంది కళాకారులు పూర్తి ఆల్బమ్‌ల కంటే సింగిల్స్‌, చిన్న ఆల్బమ్‌లకే ప్రాధాన్యమిస్తున్నారు. అయినా, పాటలు వైరల్‌ కావడం కంటే నాణ్యమైన సంగీతాన్ని అందించడమే తనకు ముఖ్యమని జాజీ చెబుతోంది.సంగీత ప్రపంచంలో ఎదగాలంటే ఆన్‌లైన్‌లో గుర్తింపు రావడమే కాదు.. ప్రత్యక్షంగా ప్రదర్శనలు ఇచ్చే అవకాశాలు కూడా అవసరమే. అయితే, అనేక నైట్‌ క్లబ్‌లు మూతపడుతుండటంతో కొత్త కళాకారులకు అవకాశాలు తగ్గుతున్నాయని జాజీ ఆవేదన వ్యక్తం చేసింది. కరోనా తర్వాత బ్రిటన్‌లో రాత్రి వేళల్లో కార్యకలాపాలు నిర్వహించే రంగం కూడా దెబ్బతిన్నట్లు గణాంకాలు సూచిస్తున్నాయి. దీంతో క్లబ్‌ కల్చర్‌ను కాపాడుకోవాల్సిన అవసరం ఉందని ఆమె అభిప్రాయపడింది.మరోవైపు, తన తొలి ఆల్బమ్‌తో వచ్చే నెల నుంచి బ్రిటన్‌ అంతటా పర్యటించేందుకు జాజీ సిద్ధమవుతున్నట్లుగా తెలుస్తోంది. అంతకంటే ముందు డబ్లిన్‌లోని అరేనాలో భారీ సంగీత కార్యక్రమంలో జాజీ పాల్గొననుంది. 'కోచెల్లా సంగీత ఉత్సవంలో ప్రదర్శన ఇవ్వడంతో పాటు కాల్విన్‌ హారిస్‌కు సహాయక కళాకారిణిగా పనిచేసిన నాకు.. స్వస్థలంలో అభిమానుల ముందు ప్రదర్శన ఇవ్వడం నా కెరీర్‌లో ప్రత్యేకమైన మైలురాయి' అని జాజీ అభిమానులతో ఆనందాన్ని పంచుకుంది.ఈ ఆల్బమ్‌లో ఉత్సాహభరితమైన పాటలతో పాటు తన వ్యక్తిగత అనుభవాలనూ జాజీ పంచుకోనుంది. ముఖ్యంగా ‘ఇన్విజిబుల్‌’ పాట సంగీత పరిశ్రమలో తనకు ఎదురైన చేదు అనుభవాన్ని ప్రతిబింబిస్తున్నట్లుగా, అభిమానులు తన గురించి మరింత తెలుసుకోవాలన్నదే ఈ ఆల్బమ్‌ వెనుక ఉన్న ఉద్దేశమని ఆమె చెబుతోంది. ప్రతి పాటలోనూ తన జీవితానికి సంబంధించిన ఓ సందేశం ఉంటుందని పేర్కొంది. ఇలా తన జీవితంలో ఎదురైన అనుభవాలను పాటల ద్వారా అభిమానులతో పంచుకుంటూ, తన పాటలతో వారిని మరింతగా ఆకట్టుకోవాలని జాజీ భావిస్తున్నట్లుగా తెలిపింది.ఇదీ చదవండి: 'వేర్‌ ఈజ్‌ మై హజ్బెండ్‌?' సంగీత ప్రపంచంలో సరికొత్త రికార్డు!


 అనిత చేగూరి.. మల్టీ టాలెంటెడ్ గాళ్.
  తల్లిదండ్రులు కాదన్నా... ఇష్టంతో ఆప్షనల్‌గా డ్యాన్స్ మ్యూజిక్ నేర్చుకుంది. ఇప్పుడు అదే మెయిన్ ఆప్షన్ అయ్యింది. పలు కార్యక్రమాలకు యాంకరింగ్ చేస్తూ తెలుగు ప్రేక్షకులకు చిరపరిచితమైంది. పెర్ఫార్మెన్స్‌కి అవకాశమున్న రోల్ చేయడమే తన గోల్ అంటూ ఆమె చెబుతున్న కబుర్లు...
  ..:: శిరీష చల్లపల్లి
  
  నేను పుట్టి పెరిగిందంతా హైదరాబాద్‌లోనే. నేను చిన్నప్పటినుంచే చాలా చురుకు. చదువులోనే కాదు... ఆటపాటల్లో కూడా. కబడ్డీ అంటే పిచ్చి. నేను బొద్దుగా ఉండటంతో నా పర్సనాలిటీని చూసే అవతలి టీం వాళ్లు జంకేవాళ్లు. అలా కాలేజీ, డిస్ట్రిక్ట్ లెవల్ వరకూ ఆడాను. అమ్మా, నాన్న ఇద్దరూ ఎంప్లాయీస్ కావడంతో నాకు రెస్పాన్సిబులిటీస్ కాస్త ఎక్కువగా ఉండేవి. అవి మా తమ్ముడు, చెల్లిని గైడ్ చేయడం, వాళ్ల కేర్ తీసుకోవడం అంతే.
  
  యాంకరింగ్‌లో అవకాశం..
  ఎనిమిదో తరగతిలో ఉన్నప్పుడనుకుంటా దూరదర్శన్‌లో పాట పాడటానికి ఛాన్స్ వచ్చింది. అప్పుడు వాళ్లు నాలో చురుకుదనం చూసి ఓ పిల్లల ప్రోగ్రామ్‌కి యాంకరింగ్ చేయమని అడిగారు. కానీ అమ్మవాళ్లు ఒప్పుకోలేదు. ఇక ఇంటర్‌లో ఉండగా జెమినీలో ఆడిషన్స్‌కి అటెండ్ అయ్యాను. ఫుల్‌టైం చేయమన్నారు. చదువుకు ఇబ్బందవుతుందని నేను ఒప్పుకోలేదు. తరువాత మెల్లగా పార్ట్‌టైమ్‌గా యాంకరింగ్ మొదలుపెట్టాను. ఇప్పడు వివిధ ఛానల్స్‌లో చేస్తున్నాను. ఎన్ని చేసినా యాంకర్ అనిత అనగానే అందరికీ గుర్తొచ్చేది సఖి మాత్రమే. ఎప్పటికైనా మంచి క్యారెక్టర్ ఆర్టిస్టుగా పేరు తెచ్చుకోవాలన్నది ఆల్‌టైం గోల్. పెర్ఫార్మెన్స్ ఓరియెంటెడ్ రోల్స్ చేయాలన్నది ధ్యేయం.
  మొండిదాన్ని...
  నా స్కూల్ డేస్ నుంచే డాన్సన్నా, సింగింగ్ అన్నా చాలా ఇష్టం. ఏ ఫంక్షన్ జరిగినా ఐదు నుంచి ఆరు ప్రోగ్రామ్స్ నావే ఉండేవి. కానీ మా పేరెంట్స్‌కి చదువు తప్పించి ఇతర యాక్టివిటీస్ మీద నేను దృష్టి పెట్టడం ఇష్టం ఉండేది కాదు. ఆడపిల్ల అనే చిన్న భయంతో స్పోర్ట్స్‌కి, డ్యాన్స్‌కి కొంచెం దూరంగా ఉంచేవాళ్లు. మొండిదాన్నవ్వడం వల్ల ఇంట్లో వాళ్లకు తెలియకుండా డాన్స్, సింగింగ్ క్లాసుల్లో జాయినయ్యాను.
  
  పచ్చదనం కరువైన నగరం
  హైదరాబాద్ బ్యూటిఫుల్ షాపింగ్ స్పాట్. నా చిన్నప్పుడు హైదరాబాద్ మొత్తం చెట్లు, గుట్టలతో పచ్చదనం ఎక్కువగా ఉండేది. కానీ ఇప్పుడు టోటల్ రివ ర్స్ అయింది. డ్రాస్టిక్ ఛేంజ్ వచ్చింది. ఆ ప్రశాంతమైన వాతావరణం చూడాలంటే ఏ అన్నపూర్ణస్టూడియోకో, ఇతర స్టూడియోలకో వెళ్లాల్సి వస్తోంది.